Read Q'anjob'al Is 22 Bible Online

Is 22 - Q'anjob'al bible

Is 22

¹A ton juntzan k'anej ti' max al-laycan el yin jobeal bay chi tx'oxlay el tzet nabil yuj Jehová: ¿Tzet chex oni, xan e masanilxac'al chex ajtok yibanlak na?

²Toxac'al chex weklab yuj tzalojc'ulal, chi el e yaw yuj k'in. Manak yuj espada, tamwal xol owal max cam eb e camnak.

³Masanil eb e yajaw, ok tok eb elajok, palta ok michchaj eb, yet c'amto chi julwaj eb. A wal eb soldado tol caw wal jelan, najattac'al ok tok eb elajok, palta ok michchajc'alta' eb.

⁴Yuj tu' xan chi wala': Elanek in c'atan, tol chi wochej chin ok' sic'libil. C'amxa chin e mimanc'ulnej, yuj jantak yatakilal ok jayoc yiban in conob.

⁵Yujtol a Jehová, Cham Yajaw yin Masanil, mayal yala' tol ok jay wal oc jun c'ual yet ay mimek xiwc'ulal, uchlejbail, c'al somc'ulalil bay jobeal bay chi tx'oxlay el tzet nabil yuj Cham. Ok uchlay ay muralla, ok ablay yel yaw eb aj conob tac'al bay jolomlak witz.

⁶A eb aj Elam, lanan watx'nen eb is julbal, ayxa oc eb yulak is carruaje tu', c'al yiban is chej. Axa eb aj Kir, lanan yion eltek eb is makbal julbalej.

⁷A masanil juntzan jobe watx' yili e yinlak, nojnakxac'al el yuj carruaje; axa eb ayoc yiban chej, lanan yoc eb yak'on owal bay puertail e conob.

⁸A tzet ayoc yenelok Judá, mayal lajwi ayok. A yet jun c'ual tu', max e yaoc e nabal yin juntzan mitx'k'abej yet owal wajan ec' bay Salón K'akte' yet Líbano.

⁹Max e yiloni, tol xiwilxa bay ay pojilal is murallail conobal David, max c'oli e yilon nalak bay Jerusalén; max e yuchon ay juntzanok na tu', yuj e yaon oc yipomalok muralla tu'. Max e yak'on noj jun bay chi wajay a' aej bay yalan tu'.

¹¹A bay nan xol cab muralla max e watx'nej jun wajbal aej, a tu' max tojcan a' aej ay yul jun wajbal aej tol payxataxi. Palta maj cam e naon yin Cham max iontek masanil juntzan ti', cax c'am yelapnok yul e sat Cham max naon juntzan ti' yettaxc'al payxa.

¹²A yet jun c'ual tu', a Jehová Cham Yajaw yin Masanil max ex awten yin e yok'i, c'al yin e c'uyuyi, yin e tzukon el xil e jolom, c'al e yaon oc el pichilej, yuj e tx'oxon el e cusc'ulal yuj e yobtakil, palta maj yal e c'ul.

¹³A ti' e yet, asan tzalojc'ulal che yun yin e k'in. Che yak' cam no wacax c'al no calnel, chi oc loj c'al uq'uej vino e yuj. Che yaloni: Lowokonek, juq'uek an, yujtol talaj a yet yecal chon cami, quex chi.

¹⁴Axa Jehová, Cham Yajaw yin Masanil max tx'ox ba ayin, cax max yalon wal ayin yin jichanil: A jun yobtakil chi yun eb ti', man ok c'ayil yul in sat yin cac'al tu', palta ok cam eb yuj, ẍi Cham.

¹⁵A Jehová, Cham Yajaw yin Masanil max alon ayin: Asi', il Sebna, mayordomo yayji bay yatut cham rey, cax chalon bay axca ti':

¹⁶¿Tzet yetal cha watx'nej cayti'? ¿Mactxel max ak'on ekbej yet cha watx'nej aj jun mukbal camnak cayti', c'al yet cha watx'nen jun olan bay jun tzalan ti', cax cholon octok jun olan bay satlak ch'en bay ok ach canok?

¹⁷Caxc'al miman elapnok aloni, palta a Jehová ok ach k'okontok bay najat. Yetok wal masanil yip Cham ok ach mitx'a',

¹⁸ok ach waj c'olayok. Axca junok pelota, najat ok ach k'oklaycantok yuj bay jun tx'otx' caw wal miman. Atac'al bay tu' ok ach camok, ata bay tu' ok oc wanaj carruaje yet a mimanbilal, ach chak' q'uixwan eb et mulnajwomal bay yatut cham a reyal.

¹⁹Axca ti' yalon Jehová: Ayin ok ach wiel bay ayach oc ti', cax ok ach in k'okon el yin opiso.

²⁰A yet jun c'ual tu' ok wawtej in chekbej Eliaquim, is c'ajol Hilcías;

²¹ok waoc a pichil chaoc yin opiso tu' yin, c'al a cincho yet a mimanbilal, axa wak'oncan ekbej tu' bay. Axca wal mamej ok yun xol eb cajyom bay Jerusalén, yetokc'al bay xol conob Judá.

²²A bay yul is k'ab ok waoc llaveal yatut eb rey yin yinatil David; c'am mac ok je' makchen puerta bay tol a' ok jakonok, tamwal ay mactxel ok je' jakon bay tol a' ok makchenok.

²³Caw wal watx' ok yun waon ocok, axca wal chi yun mak'laycan oc junok te' bay sat pared. Caw wal ok oc maynejbail yin masanil eb is yican yuj.

²⁴A masanil eb is yican is mam, yetokc'al yinatil, a ton juntzan tu' al ok yun yoccan yiban, axca yoc locan vaso, c'al xij, c'al ẍalu yin junok te' mak'bil octok sat pared.

²⁵A yet jun c'ual tu', a jun te' watx' mak'lay ocok, ok eltek ocnajok cax ok ayc'ay yetok masanil tzet yetal locan aj yin tu'. A masanil juntzan tu', ok pojtok, ẍi Jehová, cachi, ẍi Cham. A ton Jehová max alon juntzan k'anej ti'.