Read Q'anjob'al Is 24 Bible Online

Is 24 - Q'anjob'al bible

Is 24

¹Ilek wali, a Jehová ok q'uis yiban tx'otx' tx'otx' ti', toxac'al ok can t'iran tx'otx', yujc'al pakon aj sat tx'otx', cax ok yuchon c'apax saklem masanil eb cajan bay.

²Lajanc'al ok yun eb sacerdote yetok eb conob, lajanc'al ok yun eb cham patronej yetok eb mosejal, lajanc'al ok yun eb xal patronej yetok eb ix mosejal, c'al eb chi manji, yetokc'al eb chi txonji, c'al eb chi ak'on majanil, yetok eb chi oc majan, yetokc'al eb chi ak'on yin jecojal, c'al yetok eb chi oc jec.

³Toxac'al ok el t'iran tx'otx' tx'otx' ti', yujtol ok ilaytok masanil tzet yetal watx' ay bay. A ton wal juntzan ti' max yal Jehová.

⁴A tx'otx' tx'otx' ti' ok takajok, cax manxa watx'ok ok yun yili. Masanil yulyibank'inal ok takilok; masanil eb mimek winak sat tx'otx' ti', lanan lajwi ay eb.

⁵Max etaxtok tx'otx' tx'otx' yuj eb cajyom, yujtol maj yun eb axca leyal, max ten eb chekbanil Dios, max yetnejtok eb trato yetok Cham, a ton trato watx'nebil tol ayc'al yin tojbalk'inal.

⁶Yuj tu' xan max titcan jun catab yiban tx'otx' tx'otx' ti'. A masanil eb cajan sat tx'otx', chi yab eb yail yailal. Yuj tu' xan a eb cajyom, lanan c'ayaj eb, jaywanxanej mactxel ayic'ok.

⁷C'amxa vino, mayal oc yabil an uva. Ay mactxel max ayji yin tzalojc'ulal, axa tinani', yinxac'al cusc'ulal ayic'ok.

⁸C'amxa k'in bay chi oc tambor c'al arpa.

⁹C'amxa mac chi uc'wi an yet chi oc son c'al bit. A an an tu', c'a'xa yuq'ui chi yab eb chi uc'wic'alta' an.

¹⁰A conob tenomtak, uchquiltakxac'al yayji, c'amxa mac chi je' yoctok yul junok na.

¹¹A eb anima, toxac'al chi ok' eb yulak calle, yujtol c'amxa vino. Mayal lajwi tzalojc'ulal; a tzalojc'ulal tu', mayal c'ayaj bay tx'otx' tx'otx'.

¹²A conob mayal etaxtok, axa is puertail mayal pojtok.

¹³A bay masanil nacionlak ay bay sat tx'otx' tx'otx' ti', jaywanxanej anima ok canok. Axcaxac'al junjunokxa sat te' chi cancan yet mayal mak'lay aytek sat te olivo yet cayelal, axca c'apax chi yun cancan junjunxa an uva yet mayal ec' saylay yet cayelal, caytu' co yuncanok.

¹⁴A eb okto can tu', ok el yaw eb yuj tzalojc'ulal, ok aj wal nuk' eb bay yayub c'u yin yalon el eb mayk'ak'al Jehová.

¹⁵Yetok c'apax bay yichcan, yetokc'al juntzan nacionlak ay bay tilak a' mar, tol ok yal eb watx' k'anej yin Jehová is Diosal Israel.

¹⁶Ok ablay bitni masanil bay tilak el tx'otx' tx'otx', yuj yilay aj can conob tol tojol yayji. Palta ayin chi wala': ¡Ay, ok'bal in c'ul, lanan in lajwi ayok! ¡A eb yob is nabal tu', caw wal yob tzet chi yun eb!

¹⁷A wal eb cajyom sat tx'otx' tx'otx', lajan wal ok yun eb yetok no no', tol uktebil oc yuj mac chi ukteni. Ay is may yayc'ay no' yul junok olan, ma yul junok yal.

¹⁸A no' chi elcan yul k'ab mac chi ukten ec'ok, axa yul olan chi ayc'ayi; axa no' chi ajtek yul olan tu' junelxa, axa bay yul yal chi ayc'ayi. Ok ayc'ay jun miman yax nab, cax ok bilaj cimientoal yich tx'otx' tx'otx'.

¹⁹Yelxac'al miman ok yun bilaj tx'otx' tx'otx', ok tziclay wal sic'libil, cax ok pojtok.

²⁰Toxac'al ok ec' k'ek'on tx'otx' axca uq'uem an, toxac'al ok wacxok aj axca wacxi junok lanchu yuj cak'ek'. Yujtol a is mul eb anima, max ec'xac'al yiban, xan ok telc'ojxac'al, cax c'amxa bak'in ok ajwanok.

²¹A yet jun c'ual tu', a Jehová ok aon oc yailal eb ay yikbej xol cak'ek' bay chi ec' eb, yetokc'al eb rey bay sat tx'otx' ti'. Ok alay oc yailal eb cayti'.

²²Ok wajlay oc eb axca chi yun wajay oc junok bulan aj preso yul junok olan. Ok makay eb mimanok tiempoal, catawal tu' ok alay oc yailal yiban eb.

²³A yet jun c'ual tu', ok yajawbok Jehová, Cham Yajaw yin Masanil bay tzalan Sión, a ton bay Jerusalén. A yet tu', toxac'al ok cakbok el xajaw c'al yetok c'u yuj q'uixwilal, yujtol yin wal mimek mayk'ak'al ok yajawbok Cham bay satak eb yicham winakil is conob.