Read Q'anjob'al Is 26 Bible Online

Is 26 - Q'anjob'al bible

Is 26

¹A yet jun c'ual tu', ok co bitnej jun bit ti' bay yul is makbej Judá: Ay wal jun co conobal caw wal tec'an yayji. Tol a wal caw Jehová chi coloni, yujtol axca muralla yayji Cham.

²Jakek is puertail co conob ti' yet chi octok jun nación tojol cax yikem.

³Mamin Jehová, ach chak' ayjok ec' is junc'ulal mac tol tec'anc'al yayji is nabal, yujtol asan ach ayach oc yipok c'ul.

⁴Ayokabc'al oc Jehová yipok co c'ul, yujtol a Cham chi je' con is colon yin tojbalk'inal.

⁵A' chi ak'on ayc'ay eb lues, cax chi yion ay eb conob tol ch'aan, atac'al bay sat tx'otx' chi ay weknaj yuj,

⁶yet watx' chi tec'lay ay yuj eb yaynakil, c'al yuj eb meba', ẍi jun bit tu'.

⁷A be eb watx' is nabal, tojol toni. Ac'alxac'al chotcantok be eb, Mamin.

⁸Mamin Jehová, chi jechbanej a tx'oxon aj a ba, yin a beyc'ulnen eb conob. A yochwan co c'ul tol chi nalaytek tzet ayji ocok.

⁹Asan en ayoc in nabal yet chi ec' ak'bal. Yetok wal masanil in c'ul chach wochej. A yet cha beyc'ulnej el tx'otx' tx'otx' ti', chi nachaj el juj ayon cajan on bay yulyibank'inal ti', tzetbil wal yayji oc a tojolal.

¹⁰Caxc'al mi ay a watx'c'ulal yin eb yobtakwom, palta c'am chi yikej eb yunen tojolal. Caxc'al mi xol eb anima watx' nabal cajan eb, palta ac'ala' beybalnen eb yobtakil. Tok ay yelapnok a miman watx'c'ulal yul sat eb.

¹¹Mamin Jehová, ach ti' watx'xa yayji yailal eb oj, palta c'am chi nachaj el yuj eb. A yet ok yilon eb a camc'ulal yin a conob, a ton wal yet ok aon oc yailal yin eb ajc'ul tu', toxac'al ok q'uixwokcan aj c'ul eb. Lajwokokab el eb Mamin, yuj jun c'aybanil watx'xa yayji oj yuj eb ajc'ul oc en.

¹²Mamin Jehová, oj wali xan watx' ok yun jayji ec'ok, yujtol oj xan chi yi ba masanil tzet chi junej.

¹³Mamin Jehová co Diosal, ay juntzan eb cham anima max oc co yajawilalok on, palta asan ach chach jaloc co Yajawilok.

¹⁴A eb tu' mayal cam eb, tokwal okto ictzoj aj eb. C'amxa yechel ok txecloj aj eb junelxa, yujtol mayal aoc yailal yiban eb, max ak' lajwok ay eb yin junelnej, c'amxa bay ok nalaytek eb.

¹⁵Mamin, ach max ak' ch'ib a conob ti'. Max ak' ch'ibok, yet watx' chach ilay can, ach max a jitzc'altok mojonal is makbej.

¹⁶Mamin, a wal nan xol co yailal max on txajli ayach yin c'ojanc'ulal, a ton yet max aon oc yailal jiban yuj on ak'on cuenta.

¹⁷Axca wal junok ix ix yobix tol lananxa yapni c'ual watx'ji c'ul, lananxa tacaj c'ul ix yuj yailal, caywal tu' max jun a satak Mamin.

¹⁸Axca tol max oc unin jin, max jaben yail, axca yail unin max txecloj el jin, palta tok ay tzet max jayi. Tok ay jabok colbanil yulyibank'inal max yi ba juj, tok ay bisil anima max aj can juj.

¹⁹Palta a pax eb co camnak ok ictzoj aj eb, ok ictzoj aj is mimanil eb. Ok el wayan eb ayic' xol pokok, cax ok aj yaw eb yin tzalojc'ulal. Axca wal chi yun yajol junok awoj yuj yal ak'bal chi ay bay yiban tx'otx' tx'otx', caywal tu' ok yun aontek a sakk'inal ach Jehová, yet ok aj wan eb camnak tu'.

²⁰Ex wet conob, ocanektok yul e na, cax che makchencan eltek e puerta e yintak. C'ubajek el e ba janic'ok, masantac'al ok yal yec'tok yowal c'ul Jehová.

²¹Yujtol ok eltek Cham bay yul is despacho, yuj yaon oc yailal yiban masanil mactxel cajyom bay sat tx'otx' tx'otx' ti'. Manxa ok c'ubaj el tx'otx' tx'otx' eb mak'bilcamok, palta tol ok txecloj masanil jantak yobtakilal max uj yiban.