Read Q'anjob'al Is 28 Bible Online

Is 28 - Q'anjob'al bible

Is 28

¹Ok'bal c'ul Samaria, miman conob yul is sat eb uq'uem an yul yet Efraín. Yelbubal jun ac'al caw wal yax sat yayji Samaria; axa tinani', axca takin corona yili, yujtol a eb is conob, k'aynak eb yin uq'uej an.

²A Cham Yajaw max sic'on el jun winak xiwil yip, yet chi yak' owal yin Samaria. Ok jay nak tu', axca chi yun jay yax nabil sakbat, axca cakxuchum uchwajwom, axca wal yak'on yowal a' aej chi bey toji, cax chi el a' elom aej yul is be. Yuj is yipalil jun tu', xan ok uchajtok Samaria.

³A jun conob miman yayji yul sat eb uq'uem an tu', ok tec'ay nak ay yip tu'.

⁴A jun takin corona, yelbub jun ac'al yax sat tu', ok c'aylay elok, axca wal sat te higo chi pet elolok, tol ayman chi loaytok mactxel chi iloni.

⁵A wal yet yajtok tu', a yin Jehová Cham Yajaw yin Masanil ok maynej ba eb is conob maxto cani, axca chi yun maynen ba junok yuj is corona.

⁶A Cham ok ak'on yun eb juez tojolal bay meẍail beyc'ulal, ok yak' c'apax yip eb soldado chi taynen conob.

⁷Ay juntzanxa eb chi ec' k'ek'on yuj an, cax chi quistalbi el eb yuj yowal an, a ton eb sacerdote c'al eb chekbej Dios. A yet uq'uem an eb, chi yil eb elaw; a yet max toj an jolom eb, yob chi yut watx'nen el eb is k'anej eb anima.

⁸Yujtol nojnak masanil meẍa yuj is xaw eb, c'amxa bay colan yuj xaw eb tu'.

⁹Chi yalon eb anima wuj ayin ti': ¿Mactxel chi yochej jun winak ti' chi cuyu'? ¿Ma a bay eb tolto chi el yin im?

¹⁰¿Tzet wal yuj xan yin jabjabil chi yun cuywaji, ac'ala' cuybej chi yala', ac'ala' beybalej chi yala', ac'ala' chekbanilej chi yala'? ẍi eb.

¹¹Xan a yin tx'ok k'anejal ok al-lay bay eb. A ti' yet eb, tol tx'ok conobal ok yak'balnej Dios k'anjab bay jun conob ti'.

¹²A ton bay eb ti' max yal Dios axca ti': Tix wal xewilal ti', yuj tu' ak'ek xew nak c'unbinak. A ton wal sicbanil c'ulej ti', ẍi Cham. Palta maj yal c'ul eb max yabej.

¹³Yuj wal tu', yak'ban max yal eb tol a is k'anej Jehová ac'ala'c'al tzet chi yalubtanej, ac'ala' beybalej chi yala', ac'ala' chekbanilej chi yala', yin jabjabil cuywaji. Yuj wal tu', pac'an ok yun yayc'ay eb sat tx'otx', ok yasjok eb, ok occan eb yul yal, cax ok ilaytok eb preso.

¹⁴Yuj wal tu xin, ex buchwajwom, tol yajaw ex bay jun conob Jerusalén ti', abek wal k'anej Jehová ti'.

¹⁵Yuj wal tol max e yal axca ti': Ay jun co laj k'anej yetok camich, xan a yet ok jay uchlejbail, c'am tzet ok jay jin; yujtol a k'anej man yelok max jaoc yipok co c'ul, ok co col co ba yuj co lek'tial, quex chi.

¹⁶Yuj wal tu xin, xan chi yal Jehová axca ti': Ayin wal max wacan oc jun ch'en ch'en yet yichbanilej bay Sión, tol miman yelapnok, tol sic'bil el ch'en wuj yet chi oc bay txiquin na. C'am bak'in chi c'ayil jun yich ayay tu': a mactxel chi yaoc yipok c'ul, c'amc'al tzet chi na'.

¹⁷A bay jun na ok watx'jok tu', ok wak'balnej tojolal axca tx'uxubej, axa jichanil ok wak'balnej axca plomo, ẍi Cham. Palta a sakbat ok c'ayon el jun ayoc yipok e c'ul, a ton lek'tial. Axa a' aej ok ec' ikoncan el e colbalba.

¹⁸Ok lajwok ay e laj k'anej yetok camich. Ok jay jun uchlejbail e yin, cax ok ex cancan yalan yuj.

¹⁹Axa yet chi c'oli jayi, ok ex ilay bey yuj. Junjunc'al k'inibalil ok jay e yin. Axa yet c'ualil, c'al yet ak'balil, ok ex bilcan aj yuj, yet ok e yaben yabixal.

²⁰Ok e yuncan el axca nak chi way bay junok c'otxan tx'at yetok junok txowej txennej sat.

²¹Axca max yut mulnaj ba Jehová bay witz Perazim, c'al bay yac'alil yul yet Gabaón, caytu' ok yut mulnaj ba yin tzet chi yochej c'ul, tol c'ayubtakxac'al ok yunej.

²²A tinani xin, manchak ex buchwaji, yet watx' c'am chi aj can yailal e yiban. Max wab tzet max yal Jehová Cham Yajaw yin Masanil. Mayal na' Cham tol ok yak' lajwok masanil is makbej jun conob ti'.

²³Taynejek e yab tzet yetal ok wala', chi cam wal e yaben in k'anej:

²⁴A yet chi toj junok mulnajwom yawon yawoj, man asanokc'al k'uoj tx'otx' chi yun yetok arado, ma rastrillo bay is tx'otx' tu'.

²⁵Manmitok tol a yet mayal watx'ji tx'otx' yuj, cax chi yawontok eneldo c'al comino, cax chi yawon c'apax ixim trigo yin txolilal; axa bay tilak chi awlay cebada c'al ch'im trigo, atac'ala' makquiltakil inat.

²⁶A Dios chi tx'oxon yin tzet chi yutej.

²⁷Yujtol a eneldo tu' c'am chi tec'layi, tamwal chi ec' junok carreta yiban comino. Toc'al chi tenlay el eneldo yetok junok te', axa an comino xin, chi mak'lay el yetok junok c'ax.

²⁸Yojtak nak munlajwom yion el bak' ixim trigo yetok junok carreta chi ec' yiban, palta c'am chi ocxac'al ijan yec'c'al yiban, talaj chi pojtok ixim bak'ej yuj.

²⁹A juntzan jelanil ti', a Jehová Cham Yajaw yin Masanil chi ak'oni. C'ayubtakxac'al yoc tzet yetal chi nabalnej el Cham, cax chic'al yun yetok is jelanil.