Read Q'anjob'al Is 3 Bible Online

Is 3 - Q'anjob'al bible

Is 3

¹Ilab xin, tol a Jehová Cham Yajaw yin Masanil, toxa ok yican el bay Jerusalén, c'al bay Judá masanil mac ayoc yipok c'ul eb conob, c'al masanil tzet chi loji c'al masanil a' aej.

²Ok yican el Cham eb yajawil eb soldado, c'al eb soldado ak'om owal, c'al cham juez, c'al cham chekbej Dios, c'al eb aj nabal, c'al yicham winakil conob.

³Ok ilay el eb capitán yin 50, c'al eb anima ay yelapnok, eb ak'om nabalej, eb watx'nem tzet yetal tol watx', c'al eb jelan k'anjabi.

⁴Axa pax Jehová ok aon oc eb nak ach'ej yin yajawil.

⁵Axa eb conob ok aj uchnaj eb, ok yak'len eb owal. Junjun mactxel ok yak' owal yetok eb cajan cawilal. A eb nak ach'ej ok yak' owal yetok eb icham winak. Axa eb comonal, ok yak' eb owal yetok eb ay yelapnok.

⁶A yet tu', ok oc mitx'an junok nak yin is k'ab junok yet conob ayto yuj ba yetok is mam, cax ok yalon bay: Ay wal a pichil ach ti', ok ach occan co yajawilok yet ayoc jun yatakilal ti' co xol, ẍi mi eb.

⁷A yet jun c'ual tu', yel wal maj yal c'ul nak bian. C'am chin oc yin jun opiso tu', yujtol c'am loj bay in na, tamwal ay an pichilej, manchak quin e yacan oc yajawilok conob, ẍi mi nak.

⁸Manxa watx'ilok yayji Jerusalén, axa Judá mayal ayc'ayi, yujtol a is k'anej eb, c'al is yunben eb, ajc'ulal yak'on yin Jehová, yuj tx'emlay Cham yuj eb.

⁹A yili sat eb chi tx'oxon el is luesal. Chi tx'oxxac'al el eb is mul axca eb aj Sodoma. Ok'bal c'ul yanimail eb, ac'al oc eb max iontek yailal yiban.

¹⁰Al bay eb anima watx' nabal tol watx' ok yun yeloc eb, yujtol ok tzalojbok eb yuj paktzil is watx' unben.

¹¹Ok'bal c'ul eb anima yob nabal. Yobc'al ok chaloj yuj eb, yujtol atac'ala' yunben eb, caytu' ok yun chaon eb tojol.

¹²Ach'ejc'al el eb nak chi etnen in conob ti', ix eb chi yajawbi yiban. Ex in conob, a eb chex ikbani, a eb chi ion aytek e sat, cax chex yikban c'aytok eb.

¹³A Jehová ayic' bay is despacho, yet chi beyc'ulnelay eb conoblak yuj,

¹⁴cax ok yalon bay eb yicham winakil is conob, c'al bay is yajawil eb: A ton ayex ti' max e loaytok yawoj eb meba', cax ay wal ec' e yelk'an bay e na max bet e yelk'anej bay eb tu'.

¹⁵¿Tzet che na' mac ex che yetnej in conob ti', cax chex aj can e yetnen eb meba'? ẍi Jehová Cham Yajaw yin Masanil.

¹⁶Chi yal c'apax Jehová yuj eb ix ix bay Sión, tol chi luesnej ba eb; chi tx'emwaj eb yet chi bey eb, c'am chi q'uixwi eb jabok, tol chi canalwi eb, toxac'al chi tzinlabi tzet ayoc yin yakan eb yet chi bey eb.

¹⁷Yuj wal tu xin, a Jehová ok ak'on pukil xil jolom eb yuj yabil, ok txecloj el is q'uixwiltakil eb yuj Cham.

¹⁸A yet jun c'ual tu' ok yican el cham Yajaw yin eb ix aj Jerusalén masanil yelbub is mimanil, c'al yet yakan eb, yet jolom eb, c'al yet nuk' eb,

¹⁹c'al ch'enal nuk' k'abej, c'al mak satej.

²⁰Ok yican el makil jolom eb, c'al c'alil nan eb, c'al pokok perfume eb, yetok yutxiquin eb,

²¹c'al colk'ab eb, c'al ch'enal txam eb,

²²c'al an watx' pichil eb, c'al an camiẍ eb, c'al k'util eb, c'al an tx'uy eb,

²³ch'en espejo, an lababi camiẍ eb, c'al an txeq'ueq'ui k'apej, c'al mitx'banil xil eb.

²⁴A q'uexel is perfume eb tol watx' yoc jab, a ton tzet yak ok jayok. Axa lasu ok oc q'uexelok c'alilej, axa xil jolomej watx' yili yet yalantok, ok pukilok; a an el pichilej ok oc q'uexelok an pichilej watx' yili, ok etaxtok yili satej watx' yili yuj tzipinal tz'ayil.

²⁵A eb soldado aj Jerusalén ok ayc'ay eb yuj espada xol owal.

²⁶A conob ok ok'can ajok, ok occan yin cusc'ulalil, cax ok cancan yin tx'oklil.