Read Q'anjob'al Is 30 Bible Online

Is 30 - Q'anjob'al bible

Is 30

¹Max yal Jehová axca ti': Ok'bal c'ul eb anima ec'nakilwom, tol xiwil tzet chi na eb yul yet, c'am chi yal pax eb wabej, comonc'al chi watx'nej el eb junok trato yul yet, tok pax wal ayin chi wak' yun eb. Yuj tu' xan chi aj can is mul eb yiban.

²Ayman chi toj eb bay Egipto, tok chi yal eb ayin. A yipalil reyal Egipto tu' chi yochej eb chi coloni, cax chi yaoc eb Egipto tu' yipok is c'ul.

³Palta a is colwal jun reyal Egipto tu', ok yutcan aj ba yin q'uixwiltakil bay eb, axa pax colwal Egipto ok yutcan aj ba yin somc'ulal.

⁴Caxc'al ayxa tok eb is chekbej bay conob Zoán, c'al bay conob Hanes yul yet Egipto tu';

⁵ok el q'uixwil eb masanil yuj jun conob tu', c'am tzet ok yi' eb yin, tamwal ay colwal ok yak' eb bay. A ti' yet eb, ok q'uixwok aj c'ul eb yuj eb, ẍi Jehová.

⁶Tix yalon Cham ti' yuj no no' chi eq'uel bay yul tx'otx'al Néguev: Chi eq'uel no' bay jun beal yatakilal. A tu' cajan ec' no coj tol yayjic'al yel yaw, ay no owal labaj, c'al no' chi toj jululok can. A no chej, c'al no camello chi ikontok beyomal, c'al tumin conob Judá is sabalok bay Egipto, jun conob c'am chi colwaji.

⁷Maj je' yuj, c'am yip, tok chi tzakay yak'on is colwal, a yuj tu' xan chi wak' yik axca ti': No' tol ay may yel yaw, palta c'am pax tzet chi je' yuj, quin chi, ẍi Cham.

⁸Max yal Jehová ayin: Tz'ibej bay junok libro satak eb anima ti', yuj tzet lanan walon ayach ti', yet chi cancan yabixok eb yin tojbalk'inal, yuj naontek eb yet lajub c'ual.

⁹Tol a jun conob ti', caw ec'nakilwom eb; naom aj k'anej eb, c'am chi yal c'ul eb chi cha yab in k'anej.

¹⁰Chi yal eb bay eb in chekbej: Manchak e yal ayon tzet max e yil tu'. Manchak e yal k'anejal yet tojolal ayon. A k'anej chi cha co c'ul che yal ayon, manchak e yican el jochwan on.

¹¹Elanek yul co be on. Manchakxa e yaltek ayon Cham co Diosal Asanxanej Ocok, ayon israel on ti', ẍi eb, ẍi Cham.

¹²Yuj wal tu xin, a Cham Dios Asanxanej Ocok, is Diosal Israel chi alon axca ti': Ti wal ayex max e yintaknej el jun tenchebal ti'. Axa pax yaxc'ayinakil, c'al yobc'ulalil che yaoc yipok e c'ul.

¹³Yuj wal tu xin, ayex caw ay e mul, xan lajan ok e yun axca junok muralla pojiltakxac'al, lem ẍixac'al ok ay bulnajok.

¹⁴Ok ex c'aylay el axca jun miman ẍalu chi mak'lay poj yin c'am yabenc'ulalil. A juntzan pojilal tu', c'am junok bijan chito je' yoc letxbalil, tamwal yin iojtok tzak'ak' bay cocina, ẍi Cham.

¹⁵Yujtol axca wal ti' yalon cham Jehová Diosal Israel tol Asanxanej Ocok: Meltzojanek ayin, cax chin e yaon oc yipok e c'ul, cax manchak ex oc il. Catawal tu' ok ex colchajok, quin chi, palta maj wal yal e c'ul.

¹⁶A ti' e yet, max e yal axca ti': C'amak toni, tol ok on aj yiban chej, cax ok on tok elok, quex chi. Yel toni, ok ex el axca tu'. Max e yal c'apaxok: Ok on oc yiban chej tol jelan beyi, quex chi. Palta yelxac'al jelan bey e yajc'ul tu' e yintak.

¹⁷Mil wal e bisil ok ex tok elok, cax asan ch'an jun ajc'ul uktenej ex. Ok ex tok el e masanil yin asan owan ajc'ul uktenej ex. Jaywanxanej ex ok ex canok, axca cancan lecan junok te te' jolom witz, ma axca bandera chon tzalan, ẍi Cham.

¹⁸Palta xin, ti' wal chex echbanelay yuj Jehová. Ta che watx'nej e ba, ti wal chito ok' is c'ul e yin yin yak'on mimanc'ulal, yujtol a Jehová tojol ton Cham, cax watx' yet masanil anima chi yaoc Cham yipok is c'ul.

¹⁹Ex conob aj Sión, tol cajan ex bay Jerusalén, majxa ex ok'ok; a Jehová ok ok' is c'ul e yin yet ok yaben yel e yaw. Yet ok e yalon e ba bay, ok ex tak'wej Cham yin ayman.

²⁰Caxc'al chex eq'uel bay yatakilal yuj Jehová, palta acaw Cham ok ex cuyonok; manxa ok c'ubaj el ba ayex, palta ok e yil yin.

²¹Ta ok ex el yul be, cax chex toj bay e watx' k'ab, ma bay e q'uexan, ok e yab yoc jun k'anej bay e yintak, ẍi: Manak tu' chex toji, tix be chi toj ti, ẍi.

²²Catatu' ok e yetnentok e yechelej tol plata, c'al e mentes ayoc oro yin, ok e k'okcan elok axca tz'il k'apej tol yajbejtak yili.

²³Catawal tu' bian, ok yaontek Cham Yajaw nab yiban e yawoj. A yet ok e yawon e yawoj, caw wal ok je' awoj tu', watx' ok yunej. A no e wacax yet jun tiempoal tu', colanc'al bay ok il-lay low no'.

²⁴Toltax a no e wacax, c'al no e burro chi mulnaji, watx' ixim cebada ok lo' no'.

²⁵A wal yet ok ayc'ay cuartel yet soldado eb e yajc'ul, cax ok oc miman camich xol eb, xiwil mimek aej ok el yakan bay jolomlak witz, c'al bay chonlak tzalan.

²⁶Axa yakan xajaw, ok yun axca yakan c'u; axa pax yakan c'u tu', ukel ok yun yowal yakan. Axca wal yakan ukeb c'ual ok yun jun c'ual. A wal yet tu', ok yantej Jehová is conob. Ok pichon is yas eb tol a' max ak'on yasjok.

²⁷Ilabi, najatac'al chi tit Jehová. Yuj yowal is c'ul chi aj k'ak'ej c'al mub. A yet chi k'anjabi, cax chi tz'atok tzet yetal.

²⁸Yuj is k'anej Cham xan chi jay c'aybanilal, axca wal junok miman aej chi el yul is lobal, chi apni a' tac'al tel nuk'ej. Ok ilaytok eb ajc'ul oc yin Cham, axca k'alemal trigo chi letxlay aj can. Axca tol ok oc is frenoal eb conoblak tu', yet chi ilaytok eb bay c'aybanilal.

²⁹Axa ayex ti xin, ok ex bitnok, axca yet k'inal Pascua yet ak'balil. Tzalojc'ulal e yet, axca wal chi yun eb chi xu' is flauta yet chi toj bay tzalanil is templo Jehová, Cham Colomal Israel.

³⁰Ok yak' Jehová ablay is nuk' can yel yaw, cax ok yaben eb yipalil yowal is c'ul yetok yin xak k'ak'ej c'aywajwom, c'al cakxuchum, c'al bil c'u, c'al sakbat tol mimek ch'enxac'al.

³¹A wal eb aj Asiria, ok xiwcan aj eb yet ok yaben eb yul nuk' Jehová cax ok mak'lay k'aj eb yuj Cham yetok is k'okoch.

³²A yet ok yaon oc cham yajaw junjun jichan k'okochej yin Asiria tu', ok oc tambor c'al arpa yuj is conob, ay is may jun owal ok oc bay Asiria yuj Cham.

³³Yujtol a tz'abal camnak yet is reyal Asiria, payxatax maxax watx'ji, ay jun bulan si' tol miman sat cax najat yich. A Jehová ok ak'on yowal is k'ak'al yuj is k'anej.