Read Q'anjob'al Is 32 Bible Online

Is 32 - Q'anjob'al bible

Is 32

¹Ay wal jun cham rey ok yak' yajawilal yin watx', ay eb yajaw tol watx' ok yun yak'on yajawil yin tojolal.

²Junjun eb, axca wal enelej yayji eb bay cak'ek', c'al enelej bay cakxuchum, axca sanjail a' aej bay takin tx'otx', axca wal yenel junok miman ch'en bay takin tx'otx'.

³A eb axca tol c'amta chi je' yilwi c'al yabeni, ok cam yilon eb c'al yaben eb is k'anej Dios.

⁴A mactxel sombinak ay is nabal, caw aj nabalxa ok yun eb. A mactxel man tx'ijanok k'anjabi yet yalantok, axa ok yunej, caw tx'ijan ok yun k'anjab eb.

⁵A junok mitz'winak manxa ok al-layok tol watx', axa pax junok etnewom, manxa ok al-layok tol ay yelapnok.

⁶Yujtol a eb mitz'winak tu', asan is mitz'winakil eb chi yala'. Axa nabal eb, asan yobal chi na', yet watx' chi yun eb tzet yetal ay yowalil. Chi yalon yobal k'anej yin Jehová, c'am chi colwaj bay eb ayoc yin majilal, cax chi yion ec' yuc'a' anima chi tak is ti'.

⁷A eb etnewom tu', chi yi yip eb yuj is cuyoj tol yob, cax chi naon aj eb tzet yetal tol yob. Chi etax eb meba' yuj is lek'tial eb tu', a ton mac ayoc yin majilal tol chi k'an watx'jok el is k'anej.

⁸Axa eb elbej yel yuj, a' elbejalil chi na', axa yuj elbej yel yuj eb tu', ok yi eb yip.

⁹Axa ayex ix ex ti', tol c'amtac'a tzet che na'. Abek wal tzet ok wal ayex.

¹⁰C'am tzet che na' wal e yalon tinani'; palta xin, yetc'al junab tinani' ok ex bilajok, tol c'amxa jooj trigo, c'amxa sat an uva ok ajok.

¹¹A wal mac ex ix ex c'am tzet che na ti', xiwanek xin, iek el juntzan e watx' pichil tu'. Aek oc an pichilej el, yuj e tx'oxon elok tol ayex oc yin yailal.

¹²Tx'oxek el e yailal tu', yujtol max etax el e tx'otx' bay xiwil chi je' awoj.

¹³Yujtol a te q'uix, c'al an ac'un ok aj socan bay tx'otx'al in conob, c'al yul juntzan mimek na yul conobal tol ayc'al k'in.

¹⁴Yujtol a is mimek na eb yajaw, ok cancan tz'inanok, ok c'aycan el eb anima wajan bay yul conobal. A is cuartel eb ayoc yipomalok conob, ok occan wayubalok no no' yin tojbalk'inal. A bay tu' ok xew no' xolakteal burro, ok low no wacax.

¹⁵Palta ok jay Yespíritu Dios jiban junelxa, axa jun tz'inan tx'otx' tu', ok yutcan aj ba yin yax tx'otx'al; axa jun yax tx'otx' tu', xiwil sat awoj ok yak' bay.

¹⁶Axa bay masanil tx'otx' ok beybalnelay tojolal, c'al watx'c'ulal.

¹⁷A yuj chi beybalnelay tojolal xan ay junc'ulal, tzalojc'ulal, c'al masanc'ulal yin tojbalk'inal.

¹⁸Ok cajay in conob yin junc'ulalil, ok yak' tzalojbok eb c'ul yin masanc'ulalil.

¹⁹(Palta ok ayc'ay te k'akte' yuj sakbat, cax ok c'aylay el conob.)

²⁰Watx' e yet mac ex chex awwi bay tilak a' aejlak, cax colan bay chi low e wacax, c'al e burro.