Read Q'anjob'al Is 36 Bible Online

Is 36 - Q'anjob'al bible

Is 36

¹A yet 14 abilxa yoc cham Ezequías yin reyal, a yet tu' max oc cham Senaquerib reyal Asiria yin yak'on owal yin masanil conoblak yet Judá tol watx' yayji oc is murallail, cax max ayc'ay juntzan conob tu' yuj.

²A bay Laquis ayic'ok max chekontok jun is comandante yetok jun miman bulan soldado, yuj toj yilon eb cham rey Ezequías bay Jerusalén. A bay chi el a' bay a' miman najab ayoc bay yiban, bay be chi toj bay chi tx'ajlay k'apej, a bay tu' max watx'nej cham comandante tu' is campamento.

³Max eltek Eliaquim c'ajol Hilcías k'anjab yetok cham comandante tu'. A Sebna ajtz'ib yayji yin ley, c'al Joa, c'ajol Asaf ayoc yetok. A Joa tu' yajtz'ibal yabixal cham rey. A Eliaquim tu', mayordomo yayji bay yatut cham.

⁴Axa jun comandante yet Asiria tu' max alon axca ti': —Alek bay Ezequías juntzan is k'anej cham miman reyal Asiria, tol binajbil. Chi yal cham axca ti': ¿Tzet ayoc yipok a c'ul?

⁵Chi mi ala' tol ay a jelanilal, c'al epalil yin ak'oj owal, palta toc'al chala'. ¿Mactxel chaoc yipok a c'ul, xan cheaj can a ba ayin?

⁶A chi yun wiloni tol a conob Egipto chaoc yipok a c'ul. Palta a Egipto tu', lajan wal axca junok aj pojiltakxac'al. Ta ay junok mactxel chi oc lacan yin, palanxac'al toj yul k'ab. Caywal tu' yayji jun reyal Egipto tu' bay mactxel tol a' chi yaoc yipok c'ul.

⁷Ta che yal ayin: A Jehová co Diosal chi jaoc yipok co c'ul, quex chi, tokwal maj yak' Ezequías yowalil juntzan altar bay can ayajok bay chi oc eb anima ayilal bay jun e Diosal tu'. Max yaloni tol junxanej altar bay chi oc eb aj Judá, c'al eb aj Jerusalén yin ayilal.

⁸Bek alon axca tu'. Co watx'nej junok trato etok. Ayin ti' chekbej in cham reyal Asiria, chi je' wak'on 2,000 no chej ayach, palta tokwal chi tz'aknaj a soldado chi aj yiban no',

⁹xan tokwal ok je' a tec'ban a ba satak junok bulan eb soldado aj Asiria ti', cax chito wal a na' tol a eb aj Egipto ok je' yak'on chej, c'al carruaje yet owal ayach.

¹⁰Yetok c'apaxok, tokwal yul wet chin jayoc yin wak'on lajwok jun nación ti'. A Jehová ayoc wetok. A Cham max in chekontek yin wak'on lajwok ayok, ẍi cham rey, ẍi cham comandante tu'.

¹¹Axa tak'wi Eliaquim tu', c'al Sebna, c'al Joa bay jun comandante tu' axca ti': —Yuj wal dios ayach, a yin arameo chach k'anjabi, ayon ti' chi jabej. Palta manchak ach k'anjab ayon yin hebreo, yujtol a masanil eb anima ayajtok bay yiban muralla, lanan yaben eb masanil, ẍi eb.

¹²Palta max tak'wi jun comandante yet Asiria tu', max yalon axca ti': —Mannejnak bay e yajawil, tamwal asan ayex ti' max in cheklaytek ul wala'. C'amak; palta a reyal Asiria max chekon wal bay eb anima lanan yaben bay yibanlak muralla tu', yujtol a eb tu', ok lo eb is tza', c'al yuq'uen eb is txul e yetok ayex ti', ẍi cham.

¹³Yuj wal tu' xan max aj lecan jun comandante tu' max aj yaw yin ipejal, max k'anjab yin hebreo: —Chi cam wal e yaben tzet yetal chi yal cham rey mimanbil, a ton reyal Asiria:

¹⁴Manchak e yak' e ba etnelay yuj Ezequías, yujtol a jun tu' maj je' yuj ex colon elok, ẍi cham rey.

¹⁵Tatol chi yochej Ezequías tu' chi yak' e c'ul tol asan yin Jehová che yaoc e c'ul, cax chi yalon ayex axca ti': Wal yel a Jehová ok on colon elok, man ok cha' ayc'ay Cham jun co conob ti' yul k'ab reyal Asiria, ta ẍi,

¹⁶manchak e cha e yabej, yujtol a cham reyal Asiria max in chekontek, yet chi ul wal ayex tol chex oc yin junc'ulalil yetok, che yaoc e ba yul k'ab, yet watx' ok e lo' sat e yuva, c'al e loon sat e yigo, c'al e yuq'uen e yuc'bala' watx'nebil e yuj.

¹⁷Lajwi tu', cax ok ex yiontok bay junxa tx'otx' lajan wal axca e yet ti', tol chi je' ixim trigo c'al uva, yet watx' ok e watx'nej e pan c'al e vino.

¹⁸Tatol ok yal Ezequías, tol a Jehová ok ex colonok, manchak e yak' e ba etnelay yuj. Tokwal ay junok juntzan diosal juntzanxa conoblak max je' yuj colon is conob yul k'ab cham reyal Asiria.

¹⁹¿Baytal ayoc is diosal conob Hamat, c'al yet conob Arfad? ¿Baytal ayoc is diosal conob Sefarvaim? Tokwal ay junok max colon Samaria yul k'ab cham reyal Asiria.

²⁰¿Mactxel junok juntzan diosal juntzan nación tu' max je' yuj colon el is conob yul k'ab cham reyal Asiria? ¿Tzet yuj xan che na' tol a Jehová ok je' yuj colon el Jerusalén ti' yul k'ab cham? ẍi cham comandante tu'.

²¹Toxac'al max tz'injican el eb, c'am junok belan k'anej max paktzej eb, yujtol maxax yal cham rey Ezequías bay eb, tol c'am chi paktzej eb junok k'anej.

²²Caw wal max tacaj c'ul Eliaquim yetok Sebna, c'al yetok Joa. Max tzilontok eb tilak is pichil yuj bilc'ulal, max meltzoj eb toj yalon bay Ezequías masanil tzet yetal max yal cham is comandante eb aj Asiria tu'.