Read Q'anjob'al Is 37 Bible Online

Is 37 - Q'anjob'al bible

Is 37

¹A wal yet max yaben cham rey Ezequías juntzan k'anej tu', max tzilontok ti' is pichil, max yaon oc el pichilej, yuj tx'oxon el is bilc'ulal, cax max toj txajlok bay templo Jehová.

²Max chektok Ezequías Eliaquim is mayordomo, yetok Sebna tz'ibom ley yayji, yetokc'al eb sacerdote ichamtak winakxa, yuj toj yil-lay cham Isaías is chekbej Dios, is c'ajol Amoz; max yaon c'apax oc eb el pichilej.

³Max yalon eb bay axca tzet max yal cham rey bay eb: A wal tinani', caw wal ayon oc yin bilc'ulal, c'al yin yailal, yetokc'al yin yaynakilal; axca wal junok ix ix chi yab yail unewal, cax chi cancan yin tol c'amxa yip.

⁴Matawal max yab Jehová co Diosal, Cham chak' serbil, juntzan k'anej max yal jun comandante chekbiltek yuj reyal Asiria, yujtol caw wal yob tzet max yal yin Cham iquisc'al. Chok wal jayoc yailal yiban yuj Jehová co Diosal, yuj tzet max yal tu'. A tinani' xin, ak' wal junok a txaj juj ayon chonto cancan ti', ẍi eb chekbej tu'.

⁵A yet max lajwi k'anjab eb chekbej cham rey Ezequías bay cham Isaías is chekbej Dios,

⁶max yalon cham Isaías bay eb, tol chi yal eb bay is yajawil: Axca wal ti' yalon Jehová: Manchak ach xiw bay juntzan yobal k'anej max yal is chekbej reyal Asiria tu' win.

⁷Ayin ok watok junok abix xol eb. A yuj jun tu' ok meltzoj reyal Asiria bay is conob yetok masanil is soldado. A bay tu' ok wak' mak'lay camok, ẍi Jehová, ẍi Isaías.

⁸Axa max yaben jun comandante eb aj Asiria tu', tol a cham reyal Asiria mayal el bay conob Laquis, xan max el c'apax bay Jerusalén. Max toj k'anjab bay cham reyal Asiria yet lanan yak'on cham owal yin conob Libna.

⁹A bay tu' max yabej, tol mayal tit Tirhaca aj Etiopía yetok jun miman bulan soldado yak'on owal yin. Axa max yun xin, max chekonpaxtek cham reyal Asiria is chekbej bay Ezequías, reyal Judá, yet chi toj yal axca ti':

¹⁰A a Diosal chaoc yipok a c'ul, tol a' ok ach colon el yul in k'ab. Palta manchak ak' a ba etnelay yuj.

¹¹Max ab wal tzet max yun juntzan eb reyal juntzanxa nación juj on, ayon reyal Asiria on ti', masanil max lajwican ayok. ¿Tom achto wal ok ach colchajcan elok?

¹²Tokwal max colwaj juntzan dios tu' yetok juntzan conoblak max yak' lajwok ay eb wichmam, axca Gozán, Harán, Resef, yetokc'al eb anima aj Bet-edén, a ton eb cajan bay Telasar.

¹³Naektek tzet max utlay eb reyal Hamat, Arfad, Sefarvaim, Hena c'al yet Iva, ẍi cham rey, ẍi jun chekbej tu'.

¹⁴Max chaon c'apax ec' cham rey Ezequías jun tx'an carta max yak' eb chekbej tu', max yawteni. Lajwi tu', max toj bay templo, max jenbantok jun carta tu' satak Jehová,

¹⁵cax max txajli axca ti':

¹⁶Mamin Jehová co Diosal, Yajaw ach yin Masanil, a tu' ayajtok a trono nan xol eb querubín, asannej ach oc Dios ach bay masanil yiban tx'otx' tx'otx' ti'. Ach max a watx'nej satcan c'al sat tx'otx' ti'.

¹⁷Taynej wal ab xin Mamin, cha abej. Ila wal juntzan k'anej max tz'ibejtek Senaquerib ti' ayin. Masanil juntzan yobal k'anej ti' chi yal en, ach Dios tol iquis achc'al.

¹⁸Yel ton wal Mamin Jehová, a eb reyal Asiria tu', max yak' lajwok ay juntzan nacionlak tu', yetokc'al is tx'otx'al eb max yicanok.

¹⁹Max yak'on tz'a masanil is diosal eb, yujtol a juntzan tu', wal yel man diosok, palta te', ma ch'en watx'nebil yuj anima. Yuj tu' xan max je' yak'on lajwok.

²⁰A tinani xin, Mamin Jehová co Diosal, col on el bay yul k'ab jun tu', yet watx' masanil nacionlak chi yojtaknej elok tol asannej ach tol Dios ach, ẍi cham Ezequías.

²¹Max lajwi tu xin, max yalontok Isaías bay Ezequías axca ti': Axca wal ti' yalon Jehová co Diosal ayon Israel on ti': Mayal wab a txaj max al ayin yuj Senaquerib reyal Asiria, ẍi Cham.

²²Tix wal max yun yalon Jehová ayin yuj reyal Asiria tu': A eb ix k'opoj aj conob Sión, c'am elapnok yul sat eb, toc'al chi tzewi eb en, ach Senaquerib. A eb aj Jerusalén, toc'al chi yak' bil eb jolom yin buchwaji, yet chach meltzoj entak.

²³¿Mactxel max a baja', c'al a buchoni? ¿Mac yin tol canxac'al max ot yul a nuk', cax tol ayxamay max ot a sat yin? A ton wal win ayin Diosal in Israel tol Asanxanej in Ocok.

²⁴Max a chek eb a chekbej yalon yobal k'anej win axca ti': Yetok wal in carruaje yet owal xiwilxa bisil ti' max in ajtok bay jolomlak witz, c'al bay yinlak c'ul witzal Líbano. Max in k'akay te c'ute' mimek tel, yetok te taj manxa watx'ilok. Max in ajtac'al apnok bay jolomlak witz yelxac'al can ay ajok, yetokc'al bay k'aktelak tol lajanxac'al yili axca junok awbejal te'.

²⁵A bay tx'ok nacional max jot eb in soldado uc'bala', max yuq'uen a' eb. Max on ec'c'al tok yulak is k'ablak a' aej bay Egipto, axca tol tannak aj a', cachi.

²⁶Tokwal man ojtakok xin, tol ayin Jehová in max in nabalnej el juntzan tzet yetal ti'. Yettaxc'al payxa max in nabalnej elok, tol caytu' ok yunej; ato wal tinani' chi yi' ba. Yuj tu' xan ach ti' chak' lajwok ay conoblak tol watx' yayji oc is murallail, toxac'al chi aj can bulan is pojilal oj.

²⁷A masanil eb cajyom bay tu', c'amxa yipalil eb, toxac'al max xiwcan aj eb, c'al q'uixwi can aj eb. Lajanxac'al max yuncan eb axca an ac'un, c'al an yax ac'un, axca an ac'un chi ch'ibaj bay yibanlak na, tol chi takaj an yuj cak'ek' chi tit bay yichcan.

²⁸Wojtakc'al bay chach eq'ui, c'al tzet chonej. Wojtak wali tol max tit owal win.

²⁹Yujtol wojtak yowal a c'ul, c'al a ch'aanil, xan axca tol ok waoc junok ch'en argolla yin a txam, c'al junok freno yin a ti', cax ok ach wak'on meltzoj bay yul be bay max ca a tita, ẍi Cham, ẍi Isaías.

³⁰Lajwi tu xin, max yalon Isaías bay Ezequías axca ti': A yet jun abil ti', c'al yet junxa abil ok e lo' ixim trigo tol toc'al ok yalnej aj ba, axa yet is yox abil xin, okxa je' e yawon e yet. Axa e wajon sat e yawoj tu'; ok e yaw an uva, cax ok e loon sat an. A jun ti' tx'oxbanilej yayji, tol

³¹a eb okto wal iquisbokcan bay Judá ti', lajan wal ok yun eb axca junok awoj chi toj xe', tol ayman chi yun satni elok.

³²Yujtol a eb okto cancan bay Jerusalén, a ton eb okto colchajcan el bay tzalan Sión, ok ak'on pax nojil yul nación ti'. Axca ton wal tu' ok yun yuj is miman camc'ulal Jehová, Cham Yajaw yin Masanil.

³³A pax yin reyal Asiria xin, caywal ti' max yun yalon Jehová: Man ok oc bay Jerusalén ti', tamwal ok jul wal el junok is julbal. Man ok yak' owal yin, tamwal ok watx'nej aj is walub bay yinlak murallail conob ti'.

³⁴Ac'ala' bay yul be bay max ca tita, ac'ala' tu' ok meltzoj paxok. Man ok oc bay jun conob ti'.

³⁵Ayin ok in taynej jun conob ti' cax ok in colon elok, yujc'al in mimanbilal, c'al yuj in camc'ulal yin in chekbej David, ẍi Cham, ẍi Isaías.

³⁶Axa cham yángel Jehová max toj mak'on cam 185,000 soldado bay campamento eb aj Asiria. Axa yet max k'inibi aj yet junxa c'ual, mayal cam masanil eb soldado tu'.

³⁷Yuj tu xin, a Senaquerib reyal Asiria, max yuchaj is campamento, max meltzojtok bay conob Nínive, max cancan bay tu'.

³⁸Axa yet jun c'ual xin, max toj txajlok bay templo is diosal chi yik Nisroc, axa Adramelec c'al Sarezer, a ton eb is c'ajol, max toj eb mak'on cam cham bay tu'. Lajwi tu' max elaj eb, max tojcan eb yul yet Ararat. Axa Esarhadón is c'ajol Senaquerib tu', max occan yin reyal is q'uexelok.