Read Q'anjob'al Is 39 Bible Online

Is 39 - Q'anjob'al bible

Is 39

¹A yet jun tiempoal tu', a Merodac-baladán, reyal Babilonia, is c'ajol Baladán, max yab yal-layi, tolab max yabi ay Ezequías; palta mayal pax jay c'ul, xan max chektek juntzan eb is chekbej ul yak'on junok carta yetok sabalej bay.

²Caw wal max tzaloj aj Ezequías yuj max jayoc eb. Max tx'oxon masanil is beyomal bay eb, axca ch'en plata yetokc'al ch'en oro, perfume, c'al aceite caw wal watx', yetokc'al bay wajan masanil mitx'k'abej yet owal, yetokc'al masanil tzet yetal ay bay is c'uanbal. C'amxa jabok tzet yetal ay bay is despacho, c'al masanil tzet yetal ay bay yul is makbej tol maj tx'ox bay eb.

³Lajwi tu xin, max toj cham Isaías chekbej Dios yilon cham rey Ezequías, max k'anlen bay axca ti': —¿Baytal max titoc juntzan winak tu'? ¿Tzet max ul yal eb ayach? ẍi bay. Max tak'wi cham Ezequías, max yalon axca ti': —Max tit eb bay jun conob caw wal najat, a ton bay Babilonia, ẍi bay.

⁴Max tak'wi cham Isaías bay: —¿Tzet yetal max yil eb bay yul a despacho ti'? ẍi. Max yalon Ezequías: —Max yil eb masanil tzet yetal ay yul, c'amxa junok tzet yetal wajan ec' ti' tol maj in tx'ox bay eb, ẍi.

⁵Max yalon cham Isaías bay cham rey Ezequías axca ti': —Ab wal tzet yetal chi yal Jehová Cham Yajaw yin Masanil:

⁶Ok apnok c'ual, tol a masanil tzet yetal wajan ec' bay a despacho ti', yetokc'al masanil tzet yetal max wajbajcan eb echmam, masantac'al yet jun c'u ti', ok ilaytok bay Babilonia, cax c'amxa tzet ok canok.

⁷Toltax eb enatil, ok ilaytok eb bay Babilonia tu', ok ilay el yetbeyom is winakil eb, cax ok oc eb yak'omalok serbil cham rey bay yatut, ẍi bay.

⁸Max naon Ezequías: Ti wal a yul tiempoal iquis in ec' ti' ay junc'ulal, c'amc'al tzet chin oni, ẍi, xan max tak'wi bay cham Isaías: —A jun k'anej max chek Jehová al ayin ti', watx'c'al wal yayji ocok, ẍi.