Read Q'anjob'al Is 41 Bible Online

Is 41 - Q'anjob'al bible

Is 41

¹Chi yal Dios axca ti': Abek xin, tz'in quex chi in satak, ex conob bay sataktok a' mar; tec'bajek e ba ex mimek conob. Titanek, tol ok jaltek jun k'anej ti':

²¿Mactxel Cham ok ak'on txecloj bay yichcan jun rey tol ok yak'c'al ayc'ay owal? ¿Mactxel ok ak'on mimek conob yul is k'ab jun rey Ciro tu', cax ok yaon ay ba eb rey bay? A yetok is yespada, c'al is julbal Ciro ok coc'axtok eb, cax ok tiẍontok eb xol cak'ek' axca matz'il trigo.

³Ok elaj eb rey is satak, palta a Ciro tu xin, yinc'al masanc'ulalil ok yunc'al bey toji, yuj yayc'ay conoblak yuj. A yet ok beyc'al toj tu', axca tol man ok ay yakan sat tx'otx'.

⁴¿Mactxel max ak'on yun juntzan ti'? ¿Mactxel max nabalnen el masanil tzet ok uj yintax yichbanil? Ayin Jehová in chi wak' yun jun ti'. Asan in Dios in yet yichbanil, masantac'al lajub.

⁵Ok yil eb mimek conob bay sataktok a' mar, cax ok xiwcan aj c'ul eb. Ok bilaj eb conob cajan tilak tx'otx' tx'otx', cax ok wajbantek ba eb, ẍi Cham.

⁶Junjun watx'nem yechel comon dios chi yikbaj yet mulnajwomal.

⁷A nak josom te' chi ikban nak bonom yechelej yetok oro, a nak watx' chi yut yaon oc oro yin yechelej tu', a chi iptzen nak mak'om oc lawuẍ, cax chi yaloni, tol watx' co soldadura, ẍi. Cax ayman chi oc lawuẍal yechelej tu', yet watx' c'am chi ayc'ayi.

⁸Chi yal Jehová axca ti': Ayex israel ex ti', abxalwanek. Ex conobal Jacob, in chekbej ex toni, ayex ton max ex in siq'uilok, conob tol yinatil ex wamigo Abraham.

⁹Ayin ton max ex witek bay tilak el tx'otx', bay najat elok. Max walon ayex, tol in chekbej ex. Ayin max ex in siq'uilok cax c'am bay chex wintaknej elok.

¹⁰C'amc'al chex xiwi, ayin ec' e yetok. Manchak ex oc il, ayin ton e Diosal in. Ayin chi wak' e yip, ayin chex in colo'. Ayin chex wila', chex in mitx'waayok yetok wipalil chin k'anbalnej yin tojolal.

¹¹A masanil mactxel tol c'am chex ocheni, ok cancan eb yin q'uixawc'ulalil, c'al yin yaynakilal. A eb chi ak'on owal e yetok, ok c'aycan el eb.

¹²Ok e say eb ajc'ul oc e yin, cax man ok chaloj eb e yuj, a eb chi yak' owal e yetok, ok yuncan el eb axca tol c'amc'alta' eb.

¹³Yujtol ayin ti', ayin ton Jehová e Diosal in. Ayin max ex in quetz beyok. Ayin ton max wal ayex: Manchak ex xiwi, ok ex in colo', quin chi, ẍi Cham.

¹⁴Chi yal Jehová: Ex israel, conobal Jacob, caxc'al txennej e bisil, cax c'amto e yip, palta manchak ex xiwi. Ok in oc e yetok. Ayin ton e Diosal in tol Asanxanej in Ocok, e Colomal in.

¹⁵Ayex ok ex waoc axca junok mak'bal trigo tol ac', watx' ye. Ok e mak' poj mimek witzlak, coc' ok e yutcantok yin pokokal. A nacionlak ok e yutcantok axca c'ajil yakan trigo.

¹⁶Ok e tiẍcantok xol cak'ek', axa cak'ek' ok iontok. A cakxuchum ok saklemnencantok. Catawal tu' bian, ok tzaloj aj e c'ul win, ayin Jehová in ti'. Ok e maynej e ba wuj, e Diosal in, tol Asanxanej in Ocok.

¹⁷A eb anima meba' cax c'am tzet ay, chi say eb aej, c'am chi chaloj yuj eb. Lanan cam eb yuj takintial. Axa in ayin Jehová in ti', ok wiltek eb, man ok in bekcan eb, ayin e Diosal in ayex israel ex ti'.

¹⁸Ok wak' ajol mimek aej bay witzlak yet takin tx'otx'lak, c'al coc'lak nuk' aej bay nanlak ac'al. A takin tx'otx' tu' ok wutcantok yin chic'a'lakil. Axa bay takin tx'otx' tu' ok ajol mimek aej.

¹⁹A bay tz'inan tx'otx' tu' ok waw te c'ute', c'al te acacia, c'al te arrayán, c'al te olivo. A bay takin tx'otx' tu' ok wak' ch'ib te k'uk'taj, te taj, c'al te q'uisis,

²⁰yet watx' chi yil masanil anima, cax chi nachaj el yuj eb, tol ayin ton Jehová in max in watx'nej juntzan ti' yetok wipalil; tol ayin e Diosal in, tol Asanxanej in Ocok, max wak' yi ba juntzan ti', ẍi Cham.

²¹A Jehová, Cham reyalil eb yinatil Jacob, chi aloni: Sebaxek ex yechelej, tx'oxek e nabal, titanek cax che tx'oxon e colwal.

²²Sebaxek, ul alek ayon, tzet ok uj yet yajtok tu', cax ok jaben e k'anej tu'. Cax che yalon c'apax jabej yuj tzet max uj yet yalantok, ok ton co cha jab xin, yet watx' ok jil tzet ok yun yelapnok. Alek jabix yuj tzet ok uj yet bak'in.

²³Ta yel wali dios ton ex, alek ayon tzet yetal ok uj yet yajtok tu'; unek tzet yetal chi je' e yuj xin, unek watx'il c'al yobal, yet watx' chi xiwcan aj co c'ul, yujtol ay e may.

²⁴A wal ayex ti', caw wal c'am e yelapnok, tok ay tzet chi je' e yuj. Moj chi intaknelay el mac chi yiay ba ayex.

²⁵Ok wak' txecloj jun anima bay chi ajol c'u, tol ok yal ba ayin, cax ok jay bay norte ti'. A ok tec'on ay eb yajaw conob, axca tec'lay tz'otz'ew, axca tec'on nak tz'aklom is tz'akbejal tx'otx'.

²⁶¿Mactxel max alon el yabixal jun ti' tax yet yichbanil, yet watx' chi jab yabixal on? ¿Mactxel max alon yin ayoktoc'al yet payxa tu', yet watx' chi jala' tol yel chi yala'? Tokwal ay junok ex yechelej ex ti' max e yal tzet ok uj yet yajtok tu', tokwal ay anima max aben e yaloni.

²⁷Yettax yichbanil, ayin max wal jun abix ti' bay Sión, chi cam e yaben tzet max wal tu'.*fn* Ayin ton chin chektok jun in chekbej bay Jerusalén yin yalon el watx' abix.

²⁸Chin makwaji, tokwal ay junok comon dios chi jayi, tamwal ay junok chi je' yuj yak'on jabok co nabal, tamwal ay junok chi je' yuj tak'wi bay in k'anlebal ti'.

²⁹C'am junok ay yelapnok, tokwal ay tzet chi je' yuj watx'neni, xan nabac'al juntzan yechelej tu', ẍi Cham.