Read Q'anjob'al Is 42 Bible Online

Is 42 - Q'anjob'al bible

Is 42

¹Chi yal Jehová: Tix jun in chekbej ti', a ton jun ti' chi wiaj can, ayin max in siq'uilok, ay ton wal in tzalojc'ulal yin. Maxax wacan oc Wespíritu yin, yet watx' chi beyc'ulnej masanil mimek conoblak yin tojolal.

²Man ok aj yaw k'anjabi, man ok ablay yel yaw yulak calle.

³Ay eb caw ok'bal c'ul, axca wal te pojil aj, ma axca an mecha yet tzektebal toxa chi tani, caytu' eb. Palta a ton ok colon el eb, man ok yak' low yin eb, tutun ok yak' tojolal yin yel.

⁴Man ok xewok, tamwal ok cabax aj c'ul, masantac'al chi beybalnelay tojolal bay sat tx'otx' ti'. A conoblak bay sataktok a' mar, ok taynej yab eb cuybanilej ok yak'a', ẍi Cham.

⁵A Jehová Dios max esnen aj satcan cax max jenbantok. A' max watx'nen tx'otx' tx'otx', c'al masanil tzet yetal chi ch'ib yiban. A' chi ak'on cawil eb c'al is cak'ek' eb. A' chi alon bay is chekbej axca ti':

⁶Ayin Jehová in ti', max ach wawtej, cax max waon oc ep yet watx' chak' yun tojolal bay sat tx'otx' tx'otx'. Ach ok ach wak'balnej yet ok wak'on in lajti' yetok eb anima, cax chach occan yin sakk'inalil bay eb tx'ok conobal.

⁷Chi yochej in c'ul cha jak sat eb c'am chi ilwi, cax cha jakon eltek eb aj preso yulak cuartolak bay c'am sakk'inal.

⁸Ayin ton Jehová in, a ton in bi ti', man ok in cha' al-lay watx' k'anej bay junokxa yuj tzet max wunej, man ok in cha' ilay aj can yechelej tu' in q'uexelok.

⁹Ilek wali, masanil tzet max wal yet yalantok maxc'al yunej. Axa tinani', ay juntzanxa c'amto chi wala' ok wal ayex. Yin ayoktoc'al chi walon ayex yak'ban c'amto chi yunej, ẍi Cham.

¹⁰Bitnejek junok ac' bit bay Jehová; mac ex najat ayex, alek e watx' k'anej bay, ma wal ayex chex ec' yiban a' mar, c'al no no' cajan bay tu', c'al conoblak cajan bay sataktok a' mar tu'.

¹¹Tzalojokab eb conoblak cajan bay tz'inan tx'otx', c'al eb cajan bay campamentolak Cedar. Eb aj conob Sela, bitnokokab eb yin tzalojc'ulal. Yiokab aj can eb is nuk' bay jolomlak witz.

¹²Yalokab eb conoblak tilak a' mar watx' k'anej bay Jehová.

¹³A Cham ok yak' yip axca junok ak'om owal, ok aj yaw yak'on owal, axca junok soldado, axa yayc'ay eb ajc'ul tu' yuj.

¹⁴A Jehová chi aloni: Najatil max quin tz'inayi, max quin numayi, max quin oc c'aanok. Axa wal tinani xin, ok el waw axca ix ix lanan yalji yune', chi k'akwi, cax chi jay c'ul.

¹⁵Ok wuchcan ay witzlak c'al tzalanlak, cax ok wak'on tak masanil te te', cax ok wak' tancan el a' mimek aej; axca tz'inan tx'otx' ok yuncanok, ok wak' tancan aj a' najablak.

¹⁶A eb c'am chi ilwi, ok witok eb bay juntzan be tol man yojtakok eb. A k'ekk'inal, ok wutcantok yin sakk'inal satak eb. Axa bay k'equiltak, pananxa ok wutcantok yin pananlak. A ton juntzan ti' yowalil ok wak' yunej.

¹⁷Yin q'uixwilal ok tokcan eb chi yaoc yechelej yipok c'ul, c'al eb chi alon bay mentes: Co diosal ex, ẍi eb.

¹⁸Ex c'am che yabej, abxalwanek, c'al ex c'am chex ilwi, ilwanek tinani'.

¹⁹Tok ay mactxel junelnej c'am chi ilwi axca in chekbej sic'bil el wuj, tok ay mactxel junelnej tol chacan axca yalomal el in k'anej chekbil wuj.

²⁰Ex israel, caw ayc'al tzet che yila', palta c'am che camc'ulnej e yiloni; chi je' e yabeni, palta c'am che cha e yabej, ẍi Jehová.

²¹Max yochej c'ul Jehová max colwaji, xan max yak' cuybanilej caw wal watx' bay is conob.

²²Palta a jun conob ti' chi elk'anelaytok is tzetak yetal yuj eb ajc'ul, chi ilaytok eb preso, chi makchelay octok eb yul calaboso, chi ayc'ay eb, cax c'amxa mac chi colon el eb. Chi elk'anelaytok eb, c'amxa mac chi ion ec' eb bay eb elk'om tu'.

²³¿Palta mac ex wal txel bekan e c'ul e chaon e yab tzet ok wal ti'? ¿Mac ex wal txel bekan e c'ul e chaon e yab tzet ok ujok?

²⁴¿Mactxel max bekon Israel is yinatil Jacob, yet chi ilaytok is tzet yetal? ¿Man mi tok tol a Jehová xin? Yujtol a eb max oc mul bay Cham. Maj yal c'ul eb max tzakloj yintak is beybal Cham tol tx'oxbilcanok, tamwal max yikej eb cuybanilej max yal Cham.

²⁵Yuj wal tu xin, xan max tit yowal Cham, cax max yaon oc yailal yiban eb. Owal max oqui axca wal yaj chulnaj xak junok k'ak'ej, axca tu' max yun yin eb, palta tamwal yuj tu' max na ba c'ul eb jabok.