Read Q'anjob'al Is 43 Bible Online

Is 43 - Q'anjob'al bible

Is 43

¹Axa tinani' ex conob Israel, yinatil ex Jacob, abek wali. A Jehová, Cham max ex ak'on pitzc'ojok chi yal axca ti': Manchak ex xiwi, ayin max ex in colo', wet ex, ayin max ex wawtej yin wak'on binaj e bi.

²Ta chex eq'uel yul a', ayin ec' e yetok bay tu'. Ta ok e k'axponej mimek aej, man ok ex jik'bok. Ta ok ex eq'uel xol k'ak'ej, man ok ex tz'atok yuj k'ak'.

³Tol ayin Jehová in, e Colomal wayji, ayin ton Cham e Diosal tol Asanxanej in Ocok, ayin ok wak'balnej Egipto, Etiopía c'al Sabá e manbanilok.

⁴Ok wak' conoblak yin tz'akanil e q'uexelok, yet watx' chex colchajcanok, yujtol chex wochej, miman e yelapnok yul in sat.

⁵Manchak ex xiwi, ayin ec' e yetok, ok in wajbaj aj eb e yet conob bay chi ajol c'u, c'al bay chi tojcan c'u, ok wak' meltzojtek eb.

⁶A bay conoblak bay norte ok wala': Bekek meltzojtek eb. Axa bay conoblak bay sur ok wala': Manchakxa cancan eb e yetok. Iektek eb in c'ajol, c'al eb in cutz'in ayic' bay najat tu', bay lajub yulyibank'inal,

⁷yujtol ayoc in bi yin eb. Ayin max in pitzc'onej aj eb, cax max in watx'nej eb yuj wilay aj can yuj eb, quin chi.

⁸Iektek in conob cayti', tol ay is sat eb, palta c'am chi ilwi eb, ay txiquin eb, palta c'am chi yab eb.

⁹E masanil ex conob, wajbajek oc e ba; ex nacionlak, sebaxek c'apax cayti'. ¿Mactet e diosal ayex nacionlak ex ti' chi je' yalon yin ayokto tzet ok ujok? ¿Mac junok juntzan tu' max alon yet yalantok tzet yetal lanan yuj tinani'? Yiokabtek is testigo tatol yel, yet watx' chi yal juntzanxa nación tol axca ton tu', ẍi Cham.

¹⁰A Jehová chi aloni: Ayex israel ex ti', in testigo ex, in chekbej ex, sic'bil ex el wuj, yet watx' chin e yojtaknej elok, cax chin e yaon oc yin e c'ul, cax chi nachaj el e yuj tol asannej in Dios in. C'am junokxa dios max ec'lej yet yalantok, tamwal junokxa ok pitzc'oj aj yet yajtok tu'.

¹¹Asan in Jehová in, tokwal ayto mactxel chi je' colwaji, ẍi Cham.

¹²A Jehová chi aloni: Ayin ton max walilok tol ok ex in colo', cax mayal yunej. Ayin caw max wal yet yalantok, manak junok comon dios tx'ok yeli max aloni. In testigo e yayji ayex ti'.

¹³Toc'alta' Dios in ayin ti'. C'am mactxel chi je' colon el ba yul in k'ab, c'am mactxel chi je' tenon el in nabal yin tzet chin watx'nej, ẍi Cham.

¹⁴A Jehová Cham co Diosal ayon Israel on ti', Cham Asanxanej Ocok, Cham chon ak'on bekchajok, a chi alon axca ti': A ok ex wut in colon el ayex ti', tol ok watok anima bay Babilonia, cax ok wak'on yunej tol ok elaj eb caldeo,*fn* ok tokcan eb yul barco. A juntzan barco tu' ayoc is tzalojc'ulalok eb yet payxa.

¹⁵Ex israel, ayin Jehová in max ex in pitzc'onej ajok. E Diosal in, tol Asanxanej in Ocok; e Reyal in c'apaxok, ẍi Cham.

¹⁶A Jehová max watx'nen jun be yul a' mar, a ton jun be max eq'uel nan xol a'.

¹⁷Max yak' eltek jun miman bulan eb soldado ibil oc carruaje c'al chej yuj eb, palta maxc'al ayc'ay eb masanil yuj. Max ayc'ay eb masanil, majxa je' yaj wan eb. Max tanxac'al el eb axca tan k'ak'al an mecha.

¹⁸A tinani' chi yal Cham bay is conob axca ti': C'amxa che na' tzet mayal ec'tok, c'amxa che na' yuj tzet max uj yet yalantok.

¹⁹Palta ilek tzet yetal ok wunej, tol lananxa yuneni. Ilek wali, txequelxa. Ay wal jun be ok in jak bay takin tx'otx', cax ok ajol mimek aejlak bay takin tx'otx'c'alta'a.

²⁰Ok in ilay aj can yuj no xolakilteal no', no mimek ok, c'al no avestruz, yujtol ok wak' pitzc'oj aj a' aej bay takin tx'otx'. Mimek aej ok el yakan bay takinc'alta'a, yet ok e yuc'a' ex in conob tol sic'bil ex el wuj,

²¹watx'nebil ex wuj, yuj e yalon watx' k'anej win.

²²Palta ayex israel, yinatil Jacob ex ti', majxac'al in e yawtej e yetok, a ti' e yet, tol max in ispay el e yuj.

²³Majxac'al e yak' tz'a no calnel yin xajanbalil ayin, tamwal ayto welapnok yul e sat yetok e xajanbal tu'. Maj in k'anc'al ofrenda ayex, maj c'apax in tewokc'al oc ayex, yin in k'anon incienso.

²⁴Tokwal max e man te te' sumumi yoc jabil yin e yak'on tz'a ayin, tokwal che yak' tzalojbok in c'ul yetok sumumial seboal no no' chi ak'lay yin xajanbalil. A ti' e yet, tol asanc'al mulej che yunej; mayal ispay el wuj, xiwil chin e tx'em yuj jantakxa e yobtakil che yaocok.

²⁵Axa ayin ti xin, yuj wal in mimanbilal, xan chin joc'ay e yobtakil cax c'amxac'al bak'in ok in natek e yobtakil tu'.

²⁶Ta ay wal tzet chi je' e yalon win xin, ocok on yin beyc'ulal tinani', alekto waltek, tzetbil e yayji oc tu', cax ok jiloni ta yel c'am e yobtakil.

²⁷A eb e yichmam max oc is yobtakil eb yettax yichbanil, axa eb e meẍtol max caktzaj oc eb win.

²⁸Yuj wal tu xin, xan ayin ok wak' q'uixwan eb yajawilal e templo ex conob Israel, ex yinatil Jacob, cax ok ex in bekoncanok, yet watx' chex c'aylay elok, c'al e yetaxi, ẍi Cham.