Read Q'anjob'al Is 44 Bible Online

Is 44 - Q'anjob'al bible

Is 44

¹Axca ti' yalon Jehová: Abxalwanek ayin ex conob Israel, ex yinatil Jacob, ex in chekbej tol sic'bil ex el wuj.

²Ayin Jehová in ti' max ex in pitzc'onej ajok. Ayin max ex in watx'nej yet c'amto chex alji, ayin chin colwaji. Manchak ex xiw Jesurún,*fn* ex yinatil Jacob tol in chekbej ex, cax sic'bil ex el wuj.

³Tol ayin ok wak' el yakan aej bay takin tx'otx', tol ok bey wal nuk' a' bay tu'. Ayin ok wak' Wespíritu bay eb e yinatil, cax ok wak'on in watx'c'ulal yiban eb.

⁴Axca wal ch'ib an ac'un tol ayoc yal, axca tu' ok yun ch'ib eb, axca ch'ib te bakmam bay tilak a' aej chi el yakan.

⁵A xol juntzan tx'ok conobal, ay mac ok alon axca ti': Ayin ti' yet in Jehová, ẍi; axa junokxa xin, ok yaoc bi Jacob yin. Ay pax junxa xin, a wal caw ok tz'ibenok. Yet in Jehová, ẍi, cax ok yaon oc Israel jebilok is bi, ẍi Cham.

⁶A Jehová Cham Rey chi ak'on bekchaj el Israel. A ton Jehová, Cham Yajaw yin Masanil chi alon axca ti': Ayinc'alta' ec' yettax yichbanil, ac'ala' ayinc'al ec' yet lajubal, asannej in Dios in, cax c'am junokxa.

⁷¿Mac junok lajan wetok? K'anjabokabi cax chi watx' alnen ayin. Tok ay junokxa mactxel max aloncan tzet max uj yettax yichbanil, c'al tzet ok uj yet yajtok tu'. Ta ay xin, yalokab tzet yetal toxa ok ujok.

⁸Manchak ex xiw xin, tokwal maj wal jun ti' ayex yettaxc'al payxa. In testigo ex ayex ti'. ¿Tokwal ay junokxa dios c'al junokxa colwajwom? Ayin ti', c'am junokxa wojtak, ẍi Cham.

⁹C'am yelapnok eb watx'nem yechelej. Tokwal ay tzet chi oc juntzan yechelej chi camc'ulnej eb tu'. A eb chi oc ayilal bay juntzan tu', axca tol c'am chi ilwi eb, c'am is nabal eb. Yuj tu' xan toxac'al ok q'uixwok can aj eb yuj.

¹⁰A mac chi watx'nen aj junok ch'en yechelej, cax chi oc yin ayilal bay axcaxac'al tol dios yaloni, a jun tu', nabac'al is mulnajil.

¹¹Ilabi masanil eb tol ayoc c'ul yin yechelej, ok q'uixwokcan aj eb, yujtol animac'al wal eb chi watx'nen yechelej tu'. Ta chi waj ba eb masanil, cax chi tx'oxon ba eb in satak, yet chi beyc'ulnelay el eb, q'uixawtakxac'al mi chi yuncan eb, cax chi xiwcan aj eb.

¹²A tinani', ok jil wal tzet chi yut mulnaj ba nak tenom ch'en: Tol chi yiaj is mitx'k'ab, yet mayal tz'a ch'en ch'en tu' yuj bay xol tzak'ak', cax chi mak'on yetok martillo, axa yalon ba yoc yin yechelejal tu'. Yetok wal yipal is k'ab cax chi watx'neni. Chi tit wajil, axa c'unbi aj mulnaj tu'. Ta c'am chi yuc' a' chi pax yip.

¹³Ok jil c'apax tzetbil mulnaj junok josom te': Chi yechej yetok junok echbalej, chi yaon oc yechel yetok tz'ibbalej, c'al yetok compás, axa mulnaj yetok tz'ukub tu', axca tu' chi yut watx'nen junok yechelej, axcaxac'al watx'il yili junok anima chi yutej. Axa chi yun xin, chi yaon octok eb yul junok templo.

¹⁴A junok josom te' chi toj k'akaj junok te c'ute', cax chi watx'nen junok yechelej. Ma xin, chi satnej junok te q'uisis ma junok te ji' xolak k'akte' yin yaliẍal, masantac'al yet chi oc te' miman teal, cax chi watx'nen yin diosal. Ma xin, acaw jun winak tu' chi awon junok te k'uk'taj, axa nab chi ak'on ch'ibok.

¹⁵Lajwi tu', cax chi k'akon aj te' yin sial, chi yiontok janic'ok te' yet chi k'aẍni. Cax chi k'anon c'apax te' yet chi taj is lobej c'al yoc is pat. Ac'ala' yetok jabokxa te', chi watx'nen aj junok yechelej is diosalok. Lajwi tu' chi c'oli yay nojan yin ayilal bay.

¹⁶Ilab xin, a bay jun k'ak' tu' chi bol is chibej, cax chi lowi, watx'xac'al chi yun noj c'ul yetok bolbil chibej tu'. Chi lajwi tu' cax chi k'aẍni, c'al yalon axca ti': Caw wal watx'xac'al in k'aẍni bay ti k'ak' ti'. Caw wal mayal in k'aẍnaj aj chi wabej, ẍi.

¹⁷Ac'ala' yetok jabokxa te te' tu' chi watx'nej pax aj junok yechelej chi oc is diosalok, cax chi c'oli yay nojan satak. Chi tewi oc bay axca ti': Col in elok, yujtol in diosal ach, ẍi bay.

¹⁸A wal juntzan anima chi yun axca tu', man yojtakok eb, c'am chi nachaj el yuj eb. Axca wal tol mutz'an sat eb, c'am chi je' yilon eb, makan el is nabal eb, c'am chi je' nachaj el yuj eb.

¹⁹C'am chi cam naon eb, yujtol caw wal c'am is nabal eb, xan c'am chi nachaj el yuj eb yalon axca ti': A nanok jun te' ti' max wak' tz'aok, a bay tu' max oc in pat, a bay tu' max in bol c'apax in chibej, cax max in lowi. ¿Tom in moj wal chin watx'nej junok dios tol yajbejtak yetok janic'okxa te ti'? ¿Tom in moj wal chin oc ayilal bay jun k'ojal te' ti'? man ẍiok.

²⁰A mactxel chi yaoc juntzan dios tu' yipok c'ul, lajan wal axca tol a tik'ak'il tan chi lotok eb. Yujtol etnebil is nabal eb, xan chi c'ayxac'altok eb, c'amxa chi je' colon ba eb yalon axca ti': A jun tzet yetal ayoc yul in k'ab ti', toc'al chin yetnej, man ẍiok eb.

²¹Max yalon Jehová: Ex aj Israel, is conobal Jacob, naektek tol in chekbej ex, ayin max ex in tz'unu', yet chex oc in chekbejok, xan c'amokab chin toj c'ayc'ulal e yuj xin.

²²Ayin max wak' c'ayaj e yobtakil c'al e mul, axca wal chi yun c'ayaj asun. Sebaxek ayin junelxa, yujtol ayin max ex wak' bekchajok, ẍi Cham.

²³Awjokokab satcan yin tzalojc'ulal yuj masanil tzetak yetal max yun Jehová. Awjokokab mimek jobelak sat tx'otx' tx'otx'. Elokab c'apax yaw mimek witzlak, yetokc'al k'aktelak yin aloj watx' k'anej. Yujtol a Jehová mayal tx'ox is mayk'ak'al yin yak'on bekbanilal bay Israel, a ton is conobal Jacob.

²⁴Cay wal ti' yalon Jehová, Cham max on ak'on bekchajok: Ayin max ex in watx'nej yet c'amto chex alji. Ayin Jehová in max wesnej aj masanil tzet yetal. Ayin max in jenbajtok satcan, ayin max in jenbaj c'apaxtok tx'otx' tx'otx' ti', c'amc'al junok mac max colwaj wetok.

²⁵Chi wetnejtok is k'anej eb ajtxum, cax chi wak'on nachaj el yuj anima tol c'am nabal eb naom el k'anej yaloni. Chi wak'on somchaj el nabal eb aj nabal, cax sucal nabalejxac'al chi yuncan el is nabal eb.

²⁶Ayin chi wak' yun is k'anej eb in chekbej, yet watx' watx'c'al chi yun yeloc is k'anej eb tu'. Ayin ton chi wala' tol a Jerusalén ok cajlay junelxa, cax ok ca watx'nelay aj conoblak yet Judá. Ayin ok wak' watx'nelay aj junelxa bay max etaxtok.

²⁷Ayin ti' chi je' walon bay a' miman aej: Tanan ajok. Ok wak' tanaj a' mimek aejlak chi el yakan, quin chi.

²⁸Ayin chi wal bay Ciro: Ach ayach oc yilomalok wuj. Ach ok a watx'nej masanil tzet chi wochej, quin chi, xan ach ok al yin Jerusalén: Ok ca watx'nelay ajok, ok alay c'apax ay is cimientoal templo, cachi, ẍi Jehová.