Read Q'anjob'al Is 46 Bible Online

Is 46 - Q'anjob'al bible

Is 46

¹Mayal ay paknaj dios Bel, axa Nebo mayal ayc'ayi. Yujtol a juntzan dios tu', ikbil chi yun toj yuj no chej; caw wal al juntzan tu', cax chi yikon no iktzom no' tol c'unbinakxa.

²A juntzan yechelej tu', chi ay telanok cax chi ayc'ayi, tamwal ay jabok yipalil yin colon el ba. Ajun juntzan tu' chi ilaytok preso.

³Axca ti' yalon Jehová: Abxalwanek ayin, ex yinatil Jacob, jantak exto max ex cancan bay conobal Israel, tol ibil exxac'alta' oc wuj yet c'amto chex alji; tol ayin lacnej ex ocok yet mojbil exto yuj e txutx.

⁴Ac'ala' caytu' ok wunc'al e yetok yet icham anima exxa ti', ayinc'al oc e yetok, caxc'al sakxa xil e jolom. Ayin max ex in watx'nej, ok ex in taynejc'al. Ok in occ'al e yetok, cax ok ex in colonc'al.

⁵¿Mac yetok chi je' quin e lajban tinani'? ¿Mac yetok lajan wayji e naoni?

⁶Ay mac chi yiajtek oro yul is tx'uy, cax chi yechen plata yul echbal, cax chi sayon junok tenom ch'en yuj watx'ji junok is diosal, axa yay nojan satak tu', cax chi txajli bay.

⁷Chi yaon ajtok jolom xic' chi yiontok. Lajwi tu', chi yaon ajtok yiban junok meẍa. A bay tu' chi cancan k'ean junelnej, tokwal chi bili. Caxc'al chi el yaw jun ay yet tu' chi k'anon colwal bay, palta c'am chi je' tak'wi, tamwal chi colwaj yetok yin is yailal.

⁸Naektek jun ti' ex tenomtak, chi cam e naon yin tzet max wunej.

⁹Naektek tzet max uj yet payxa tiempo, tol asannej in Dios in, c'am junokxa, tok ay junokxa dios chi je' lajlen ba wetok.

¹⁰Ayin max walcan el lajubal yettaxc'al yichbanil. Max walcan el tzetak yetal tolto ok ujok yettaxc'al yalantok. Chi wala' tol ok uj tzet nabalnebil wuj, ok wun tzanc'al tzet chi yochej in c'ul.

¹¹Mayal wawtejtek jun winak bay yichcan, najatac'al ok tit axca junok tx'acbaj. A jun tu' ok wak' yun masanil tzet yetal nabil wuj, axca wal max wut waloni, caywal tu' ok wutej.

¹²Ex anima pit, abxalwanek ayin, mac ex najat ayex el yin tojolal.

¹³A in tojolal cawilxa ayic' wuj, manxa ok mayjok. Ayman ok in colcan el conob Sión, caw wal mimanbil ok wut Israel, ẍi Jehová.