Read Q'anjob'al Is 48 Bible Online

Is 48 - Q'anjob'al bible

Is 48

¹Axca ti' yalon Jehová: Abek wal jun ti xin, ex yinatil Jacob, ex tol che yik Israel, tol yinatil Judá ex c'apaxok. Che locbaj in bi ayin Jehová in ti', cax che yaloni tol chex oc yin ayilal ayin e Diosal in ayex aj Israel ex ti'. Palta man yelok che yala'. Yinc'al cabsatil chex k'anjabi.

²A ton ayex che yala', tol aj conob ex bay in conob, cax chin e yaon oc yipok e c'ul, ayin Jehová e Diosal in, Yajaw in yin Masanil.

³Ataxc'al yet yichbanil max walon el ayex tzet yetal lanan yuji. Ayin wal caw max wak' e yojtaknej elok, yin wal jun bekal max wak' yunej, cax max yion ba.

⁴Wojtak tol caw wal pit ex, c'am che yiay e ba, tamwal chex q'uixwi jabok in satak.

⁵Ayxatax waloncan el ayex tinani', a yet c'amto chi yunej max waloncan ayex. Yuj tu' xan maj je' e yalon axca ti' yin e yechelej tol te' ma ch'en: A co diosal ti' max naon jun ti', cax a' max ak'on yunej, man quex chiok.

⁶Ayex ti' max cam wal e yaben masanil juntzan tzet max wal tu'. Chi cam wal e naon yin, cax yowalil che cha e yabej tol yel toni. Axa tinani' xin, ok walcan el juntzanxa tzet yetal ayex, tol ewan c'uan yayji, tol man e yojtakok.

⁷A ton tzet yetal tol ato wal tinani' chin chaoc waloni, man albilok yettax payxa, juntzan tol c'amc'al bay max e yab k'umal yal-layi masantac'al tinani'. Yuj tu' xan man ok je' e yaloni, tol e yojtakxa jun tu'.

⁸Yel toni, a jun ti' c'amtoc'al bay max e yabej, tamwal ayxa bay max e yojtaknej elok, toltax tinani', c'amtoc'al che yabej. Yujtol wojtakc'alta'a tol man yikemok ex, tenomtak ex yettaxc'al max ex alji.

⁹Yet watx' man yobok chi al-lay win, xan chin mitx'oc waan yowal in c'ul ayoc e yiban. Yet watx' watx' chi yun in binaji, xan c'am chex wak' lajwok yin aymanil.

¹⁰Ayin max ex in sakbanej elok, palta man axcaok chi yun sakbanelay el ch'en plata xol k'ak'; palta tol max ex wak' porobal yetok yailal.

¹¹Yuj in mimanbilal xan axca tu' max wutej, yet watx' c'am chin al-lay yobal. ¿Tom ok cha in c'ul tol a aloj watx' k'anej tol wetc'alta' yayji, axa bay comon dios ok al-layok? ẍi Jehová.

¹²Axca ti' yalon Jehová: Ex israel yinatil Jacob, abek wal tzet ok wala': Ex tol max ex in sic'can elok. Asannej in Dios in, ayinc'alta' ec' yet yichbanil, c'al yet lajubal.

¹³Ayin max in watx'nej tx'otx' tx'otx' ti', ac'ala' ayin max in jenbajtok satcan, axca tol max in k'uchubnej. Toc'al max wak' binaj juntzan ti' max pitzc'ojajok.

¹⁴Wajbajek oc e ba e masanil, abek wal tzet ok wala': ¿Mac wal junok juntzan yechelej max je' yaloni tzet yetal toxa ok ujok, tol a jun winak sic'bil el wuj, a' ok watx'nen masanil tzet max in na' yin Babilonia, axa is yipalil ok ak'on ayc'ay eb caldeo?

¹⁵Ayin max wala', ayin max wak' titok, xan max jayocok. Yuj wal tu' xan ok occ'al beal masanil tzet ok yunej.

¹⁶Jitzektek e ba in cawilal, abek wal tzet ok wal ti': Ataxc'al yet yichbanil, c'am tzet max wal yin ewantakil, axa yet max yuneni, ayinc'alta' ec' bay tu', ẍi Jehová. (A tinani' xin, a Jehová Cham Yajaw max in chekontek yetok is Yespíritu.)

¹⁷Axca ti' yalon Jehová Cham Dios Colomal Israel, tol Asanxanej Ocok: Ayin Jehová e Diosal in. Ayin chin tx'ox ayex tzet yetal tol ok oc e watx'ilok, ayin chin tx'ox be ayex bay moj chex tojc'al.

¹⁸Matawal max e yikej in chekbanil, axca wal mi a' mimek aej c'am chi tani, caytu' yayji e junc'ulal tinani', axca mi wal yajc'al pomnaj sat a' mar, cay mi wal tu' yayji e tojolal.

¹⁹C'amxam chi bischaj jantak e yinatil, lajanxac'al mi eb axca yarenail a' mar. Tok mi wal max ex wak' c'ayilok, tamwal max ex wiel yul in sat, ẍi Jehová.

²⁰Elanek bay Babilonia, elanek xol eb aj Caldea. Alek el yabixal jun ti' yin aw yet tzalojc'ulal, cax che yak'on ojtaknelay elok masantac'al bay lajubal tx'otx'. Alek axca ti': Mayal on yak' bekchaj el Jehová, ayon yinatil on Jacob is chekbej, quex chi.

²¹A yet max eq'uel Israel bay takin tx'otx'lak yuj Jehová, maj yab yail takintial. A Cham max ion ay nan ch'en mimek ch'en, cax max elol secnaj mimek aej tol max bey yakan.

²²A pax eb yobtakwom xin, c'am jabok watx'il yet eb, ẍi wal Jehová.