Read Q'anjob'al Is 5 Bible Online

Is 5 - Q'anjob'al bible

Is 5

¹Abek xin, ok in bitnej jun bit yuj jun in watx'il anima c'al yuj is yawoj uva. A jun in watx'il anima tu', ay jun yawoj uva bay jun tx'otx' k'ean caw wal yax sat.

²Max sic'can el is ch'enal, cax max watx'nen corralil, cax max yawon ay uva watx'. Max watx'nej aj jun ilbal awoj nan xol yawoj tu', max watx'nen cajonal bay chi tec'lay el an. Cax watx' uva ok yak' yaloni, axa max yunej, paj uva max yak'a'.

³Xan max yal jun aj awoj axca ti': Ilab xin, ex aj Jerusalén, c'al ex winak yul yet Judá, alek ayin mac ay is faltail, ¿ayin mi ma a wawoj?

⁴¿Tzetto wal watx' ok wut wawoj, tol tz'akan max yun wak'on serbil? A waloni tol watx' sat ok yak'a', axa max yunej, paj uva max yak'a'.

⁵Ok in tx'ox ayex xin, tzet ok wut wawoj ti': Ok wican el is corralil, cax ok lajwok ay an. Ok in jakcan elok, axa tec'lay ay an tu'.

⁶Ok can wal can yin tz'inanil wuj, man ok el is takinal an, cax man ok el yak'inal an. Axa ch'ibaj an ac'un, c'al te q'uix xol an tu'. Ayin ok wal bay asun tu', tol c'am chi yak' nabil yiban an, ẍi cham aj awoj tu'.

⁷Yel ton wali, a yinatil Israel, axca is yawoj Jehová yayji, Cham Yajaw yin Masanil. Axa pax eb anima aj Judá xin, axca moc'anil uva awbil yuj Cham caytu' yayji eb. A watx'c'ulal max yochej c'ul Jehová, axa max yun xin, mak'oj cam anima chi yun eb. Max yochej Cham tojolal, axa max yunej, tol chi el yaw anima mul yailok eb.

⁸Ok'bal c'ul eb xiwil na chi yi', cax chi yionc'al eb xiwil tx'otx' masantac'al chi yi' eb masanil. ¿Ok ex mi cajay e tx'oklil nan xol jun conob ti'?

⁹Tol max wab k'umal yuj Jehová Cham Yajaw yin Masanil, tol yowalil ok cancan tz'inan nalak, c'amxa mactxel ok cajay bay mimek nalak tu', caxc'al mi watx' yili.

¹⁰Asannej oyeb galón vino ok yak' yin 50 tx'anil uva. Axa wakeb quintal ixim inat, asan wak almu ok yak'a'.

¹¹Ok'bal c'ul eb chi pet aj wan yet k'inibalil cax chi c'oli yuc'wi an junelxa; ac'ala' eb tol a yin an chi k'ekbi ayok, masantac'al chi c'ayil c'ul eb yuj.

¹²Axa yet chi watx'ji mimek loj yuj eb, ayoc sonal eb, sonal arpa, c'al sonal violín, c'al sonal pandereta, c'al sonal ch'en flauta, cax chi uc'wi vino eb c'apaxok; palta c'am chi na eb tzet chi yun Jehová.

¹³A wal yuj tu xin, ok ilaytok in conob yin mosejal, yuj is c'am nabalil eb. Masanil is yajawil eb, c'al eb conob ok cam eb yuj wajil, c'al yuj takintial.

¹⁴Yuj wal tu xin, axca wal tol xiwil is wajil camich, cax miman chi yun jakon is ti' yuj turon aytok eb yajawil Jerusalén, c'al eb comon anima tol yelxac'al chi el yaw.

¹⁵A eb anima ok ilay el luesal eb, cax ok ilay el q'uixwil eb chi mimanej ba.

¹⁶Axa Jehová Cham Yajaw yin Masanil, ok ilay can yin is beyc'ulal; axa Cham Dios tol yelxac'al watx', ok tx'ox is c'ulbal tol watx' yin yunen tojolal.

¹⁷A bay max ec'lej nalak eb beyom, a tu' ok low no calnel, c'al no chiwo.

¹⁸Ok'bal c'ul eb c'alan yin is mul yuj ioj aytek satej, axca no wacax c'alan oc carreta caw wal al yin, axca tu' yayji eb.

¹⁹A ton eb chi alon axca ti': Watx'nejokab co Diosal ayon Israel on ti' tzet chi na', cax ok jiloni. Yunokab yin aymanil tzet t'inan watx'nen Cham Asanxanej Ocok, yet watx' chi jabcan el on, ẍi eb.

²⁰Ok'bal c'ul eb chi aloni tol watx' yobal, axa yobal chi yal eb tol watx', axa sakk'inal, tol k'ekk'inal yalon eb, axa pax k'ekk'inal, sakk'inal yalon eb. A tzet yetal tol c'a', tol chi' yalon eb, axa tzet chi', c'a' yalon eb.

²¹Ok'bal c'ul eb aj nabal yul yet yaloni, c'al eb tol bak' sat chi yut ba yul yet.

²²Ok'bal c'ul eb caw wal jelan yuc'wi an, a ton eb juez tec'an waay yin somon an an.

²³Tol a yuj tumin chi yalon aj eb, tol c'am is mul eb ay mul; axa anima watx' beybal, chi ak'laycan low yin yuj eb.

²⁴Yuj wal tu xin, xan axca wal k'ak'ej chi yak' tz'a an ch'im, cax chi lajwi ay tz'atok xak an, cay wal tu' ok yun lajwok eb, axca wal yet chi k'atok an ac'un yetokc'al is xe', axa is xumaquil chi yut cantok ba axca pokok. Yujtol max bekcan eb beybal Jehová Cham Yajaw yin Masanil, cax max yajon el eb k'anej Cham Asanxanej Ocok, a ton co Diosal ayon Israel on ti'.

²⁵Tix wal mul is conob Jehová ti', xan max caktzaj tit yowal yin eb, max ton yik is conob tu' tz'um yuj, max yasji cantok eb yuj. Axa witzlak xin, max bilcan ajok, axa eb camnak yet jun conob tu', max cancan telan yulak calle. Tokwal yuj tu' max ec'tok yowal c'ul Cham yin eb, tol a ti' yet, tol max ajc'al can yaon oc yailal eb.

²⁶Ok yiaj Cham jun bandera bay eb nacionlak najat ay, cax ok uẍloktok Cham bay eb ay bay tilak el tx'otx', cax ayman ok jay eb yin anejbail.

²⁷C'am junok eb soldado ok c'unbok aj xol eb, tamwal ay mactxel ok telc'oj xol eb. C'am mactxel wayantak sat xol eb. C'am mactxel choyantak is c'alil, tamwal ay bay ok tukchaj el tx'anil is xanab eb.

²⁸A is julbal eb, nikbil ajtek ye; watx'xac'al yayji teal is julbal eb tu'. A yakan is chej eb axca wal ch'en suy, axa is carruaje eb jelan beyi.

²⁹A yul nuk' eb, axca wal yet no coj, ok el yaw eb axca wal tz'ibcoj tol chi moc' aj is chibej; watx' wal ok yun yiontok, cax c'am mactxel ok je' tok'on ec' bay.

³⁰A yet jun c'ual tu', ok el yaw jun nación tu' yin co conob axca wal bil a' mar. Axa eb ok tok t'anan yin co conob tu', ok yil eb tol ay k'ekk'inal c'al mimek yailal yiban, axa satcan ok tancan el is sakk'inalil yuj asun.