Read Q'anjob'al Is 53 Bible Online

Is 53 - Q'anjob'al bible

Is 53

¹Ok yal Israel axca ti': ¿Mactxel max yaoc c'ul yin k'anej max al-layi? ¿Mactxel max nachaj el mulnajbal Jehová yuj, yin jun k'anej ti'? ẍi mi eb.

²Max yochej c'ul Jehová tol max ch'ib is chekbej, axca ch'ib junok wolej chi tit yin junok xeej bay takin tx'otx'. Man wal ochbejtakok yili, tamwal ay is may chi jilocok, c'am wal chi tzaloj co c'ul jilon ocok.

³Buchbil el Cham, intaknebil el yuj yet animail; winak wal tol max yabc'al yail, k'ajanxa yin yetnen c'ul. Axca tol manxa is mojalok chi il-lay oc yin, max jintaknej elok, c'am yelapnok yul co sat.

⁴Max co na' ayon ti' tol a Dios max ak'on yasjok, yin yaon oc yailal, c'al yuten yin yaynakil. Akxa xin, ti' tol a jilya' ayoc yiban, lanan yaben yail co q'uexelok.

⁵Max yasjitok yuj co tenomtakil, max yaben c'apax yail yuj co yobtakilal. A wal yailal max yab tu', a' max ion jay co junc'ulal. Yuj wal is yas Cham tu', xan ay co cawil ayon ti'.

⁶Co masanil max on saklemcantok axca no calnel, junjun onxac'al max on tojcan bay chi cha co c'ul; palta a wal caw Jehová max aoncan oc co mul co masanil yiban Cham, ẍi eb Israel.

⁷Caw wal max buchlayi, palta yaynakilc'al max yut ba, maj paktzej. Max ilaytok axca chi yun yilaytok no calnel bay chi mak'lay camok. C'amc'al tzet max yala'. Tz'inc'al ẍi axca no calnel yet chi tzuklayi.

⁸Max ilaytok preso, c'al beyc'ulnelay yin man is mojalilok yuj yilay el is k'inal. Tokwal ayto mac xol eb yetconob max naoni, tol max ilay wal el bay sat tx'otx' tx'otx' ti' yujc'al co yobtakil, ayon t'inan chi jab yail.

⁹Caxc'al c'am wal junok yobtakil max yunej, tamwal ay junok lek'tial k'anej max yala', max na eb mukon bay mukan eb yobtakwom. Axa max yun xin, tol a yet max cami, xol eb beyom max cani.

¹⁰Max mak'lay k'aj Cham xol yailal yuj Jehová, axca wal is naoni. Lajwi yak'on ba Cham yin xajanbalil yuj yak'lay tan mulej, cax ok iquisbokc'al. Ok yilon Cham yinatil. A yin Cham ok yuncan el tzet nabil yuj Jehová.

¹¹A yet mayal lajwi ec' xiwil yailal yiban, ok tzalojbok aj c'ul yiloni, tol man nabac'alok max yab yail. Axca ti' yalon Jehová: A in chekbej tojol, xiwil mactxel ok yaoc yin watx'il, chi yal elapnok, a ton eb chi ojtaknen wal elok, yujtol a ok ion el is yobtakil eb.

¹²Yuj tu' xan caw wal miman yikbej ok wak' bay xol eb yajaw. Ok wak' yunej tol ay yalon yet xol eb tec'an, yujtol max yak' ba yul k'ab camich, cax max utlay axca chi utlay eb yobtakwom. A ti' yet xin, tol max yikcan aj is yobtakilal xiwil yobtakwom, cax max tewi yuj yak'lay tan is mul eb tu', ẍi Jehová.