Read Q'anjob'al Is 55 Bible Online

Is 55 - Q'anjob'al bible

Is 55

¹Axca ti' yalon Jehová: Masanil ex ay e takintial, titanek yet chi ul e yuc' a' aej. A mac ex c'am e tumin, titanek ul e yi' e lobej yin sabejal, iektok e vino c'al e leche yin tol c'am is tojol.

²¿Tzet wal yuj xan che yak' e tumin is q'uexelok tzet yetal tol man lojok? ¿Tzet wal yuj xan che c'ayil e tumin yin tzet yetal tol c'am chi noj e c'ul yuj? Ta chi cam e yaben xin, che yiken tzet ok wala', watx' loj ok e lo', tol ok e yak' tzalojbok e c'ul e loon tzet yetal tol caw wal watx'.

³Sebaxek, watx' che yut e taynen e yabej c'al e yikeni, yet watx' chex aj can junelxa. Ok in watx'nej junok in trato e yetok tol ayc'al yin tojbalk'inal. Ok wak' ayex watx'c'ulalil max wak' in ti' wak'on bay cham rey David.

⁴Ayin max waoc David tu' yin testigoal bay masanil nacionlak yin ikbajwomal, c'al yin sat yajawil xol conoblak.

⁵Ex aj Jerusalén, a yet yajtok tu', wal yel ok e yawtej eb conob tol man e yojtakok, a eb anima man ojtakbilok ex yuj, yinxac'al aymanil ok yun jayoc lemnaj eb ayex. Ayin Jehová e Diosal in ayex Israel ex ti', tol Asanxanej in Ocok, ok wak' yun juntzan ti', yujtol ayin max wak' e mimanbilal, ẍi Cham.

⁶Aek oc e ba yul k'ab Jehová, yak'ban chito je' ex chaoni. Awjanek bay, ilab tol cawil ayic'ok.

⁷Ayex yobtakwom ex ti', bekekcan e yobtakil tu', a ex yob e nabal ti', bekekcan e yob nabalil tu'. Meltzojanek yul k'ab Jehová, axa Cham ok yak' yabenc'ulal e yin. Meltzojanektek bay co Diosal, a ok ak'on tan e mul, yujtol yelxac'al watx' c'ul Cham.

⁸Axca ti' yalon Jehová: A tzet chin na', man lajanok axca tzet che na' ayex ti', c'al tzet chi wunej, man lajanok axca tzet che yunej.

⁹Axca wal satcan, najat ay aj bay yiban tx'otx' tx'otx' ti', axca wal tu' yayji oc in nabal, c'al tzet chi wunej, yelxac'al miman yayji yintak e yet.

¹⁰A yaxnab, c'al sakbacom chi aytek bay satcan, man toc'alok chi meltzoji, palta tol chi ch'acay el tx'otx' yuj, xan chi ajol masanil sat awoj ayay bay tx'otx', yet watx' chi yak' inat yet chi je' yawlay junelxa, chi yak'on c'apax is lobej eb anima.

¹¹Axca c'apax tu' in k'anej, man ok meltzoj ayin yin tol c'am tzet ok watx'nej, palta tol ok yi ba yuj, axca chi wochej.

¹²Yin tzalojc'ulal ok yun e yel bay ayex ec' yin presoal, yin junc'ulalil ok ex meltzoj bay e conobal. Masanil witzlak, tzalanlak, yetok te te', c'al yetok masanil tzetak yetal ay e cawilal, axca tol caw wal ok tzaloj aj masanil e yuj.

¹³A te k'uk'taj ok ch'ibaj q'uexelok te q'uix, axa te arrayán ok ch'ib c'apax aj q'uexelok an cak q'uix. A juntzan ti' ok wun yuj in mimanbilal, yuj in nalaytek yin tojbalk'inal, ẍi Jehová.