Read Q'anjob'al Is 56 Bible Online

Is 56 - Q'anjob'al bible

Is 56

¹Axca ti' yalon Jehová: Beybalnejek wal tojolal, asannej watx'ilal che yunej, yujtol janic'xanej cax ok wak'on e bekbanilal. Yin aymanil ok in tx'ox wal in mayk'ak'al yin in colwaji.

²Caw wal tzalojc'ulal yet eb anima chi yikej juntzan chekbanilej ti' yin bayc'al ijanil, tol miman yelapnok c'ual xewilal yul sat, c'am chi yetnejtok. Tol chi taynej wal ba, c'am wal junok yobtakilal chi yunej, ẍi Cham.

³Ta a junok tx'ok conobal chi yaoc ba yul in k'ab, c'am jabok tzet chi yal axca ti': A wal Jehová c'am chin is chaoc yin ayilal xol is conob, man ẍiok. C'am c'apax chi je' yalon eb winak ibil el yetbeyom is winakil axca ti': Ayin ti' lajan in axca junok takin te', man ẍiok.

⁴Ayin caw Jehová in chi wal axca ti': Tatol miman yelapnok c'ual xewilal yul sat eb winak man tz'akanok is mimanil tu', cax chi yiken eb tzet chi wochej, chi yaon wal oc eb in trato yin is c'ul,

⁵a watx'ilal ok wak' bay eb, ec'ban yelapnok yintak c'ajolej c'al cutz'inej. C'am yechel ok c'ayil binaj eb bay in templo, c'al xol in conob. C'am bak'in ok jolayc'ay is bi eb tu'.

⁶Chi wal c'apax bay eb tx'ok conobal chi yaoc ba yul in k'ab, yuj in yak'on serbil, c'al yoc eb yin ayilal ayin yin camc'ulal, ta man ok yetnej el eb in c'ual xewilal, cax tec'an wal ok yut ba eb yin in trato,

⁷ayin ok witek eb bay jun in tzalan ti', cax ok wak'on wal tzalojbok c'ul eb bay nail bay chi oc txaj ayin. A is xajanbal, c'al is yofrenda eb ok in cha bay eb yiban waltar ti', yujtol a in templo ti', ok al-lay yin tol nail txaj yayji yuj masanil conoblak.

⁸Ayin Jehová Yajaw in chi wal bay eb israel wajanxa ec' wuj: Aytoc'al juntzanxa eb man yetbiok ba e yetok, ok in wajbaj oc eb e yetok quin chi, ẍi Cham.

⁹Titokab conoblak axca no chiwajwom no'. Titokab eb axca chi yun tit no chiwajwom no' ay xolak te' yuj chilay aytok no calnel.

¹⁰Yujtol a eb taynemal in conob, axca tol c'amxa chi ilwi eb, c'amxa jabok chi je' nachaj el yuj eb, lajan wal eb axca junok tx'i' tol c'am chi chiwaji. Asan tol telanc'al aj eb chi ec' c'u. Asan wayan chi yochej eb chi yunej.

¹¹Lajan eb axca tx'i' ayc'al wajil, c'am yechel chi noj c'ul eb. A eb yilomal in conob tu', c'am jabok chi nachaj el yuj eb. Asanc'al tzet chi yochej c'ul eb, a' chi say eb.

¹²Chi yalon eb axca ti': Tonek co say vino, a wal an caw wal ow ok juq'uej, cax chon uc'wic'al an; ac'ala' axca tu' chi jun pax yet yecal yab axca ti', ma xin yelxac'al ok ec' yiban juq'uen yecal tu', ẍi eb.