Read Q'anjob'al Is 59 Bible Online

Is 59 - Q'anjob'al bible

Is 59

¹Tokwal c'amxa yipalil Jehová colwaji, tokwal mayal chacanbi, xan c'amxa chi yab e tewilal.

²Palta a e yobtakil ayoc e nan e xol yetok Dios, a e mul tu' chi oc jenan e nan e xol yetok Cham, yuj tu' xan c'amxa chi yochej Cham chi tak'wi ayex.

³Yujtol bacan chic'takxac'al e k'ab yuj e mak'om cam animail, c'al yuj e yak'on yasjok anima. Asanxanej lek'tial c'al yobtakil che yala'.

⁴C'am junok ex che watx'nej el junok e k'anej bay juzgado yin tojolal. Tokwal che watx'nej yin bayc'al ijanil. Che na wal tzet chi yun e yak'on ayc'ay eb yetok k'anej c'am yelapnok, c'al lek'tial. Che na e yak'on yobc'ulalil, cax che yunenxac'al.

⁵A wal tzet che na' e yunen tu', lajan wal axca jos no bakne labaj, yujtol a junok mac chi loon juntzan jos tu', tojolc'al cami. A yet chi mak'lay poj no jos tu', labajxa chi elol yul.

⁶Axa tzet che na yuj yoc e watx'ilok yul e yet, lajan wal axca tx'anil yal ti' no xim, tokwal chi je' watx'nelay juntzan tu' yin pichilejal yuj yoc e makilok. Asanc'al yobtakil, mak'wal, c'al elk'an che yunej.

⁷Jun wal bek chex toj lemnaj yin yobtakil, yin aymanil chex toj e mak'on cam eb c'am is mul. Asan yin yobtakil ayoc e nabal, tzanc'al bay chex eq'ui che yetnejcantok, c'al e yak'on lajwok ay tzetak yetal.

⁸Asanc'al owal che yunej, c'am jabok tojolal yin e beybal. Junelnej tol man watx'ok e beybal. A mactxel chi tzakloj e yintak, c'am jabok junc'ulal chi yi eb.

⁹Axca ti' yalon eb conob: A wal tinani' chi nachaj el juj, tzet yuj xan c'am chon col-lay el yuj Dios bay eb chon etneni. Chito wal jechbanej sakk'inal; palta c'amc'al, asanxanej k'ekk'inal ayoc jinlak. Chitoc'al jechbanej co bekbanilal, palta ac'ala' jetaxi.

¹⁰Toxac'al chi co matxtenej ec' co ba bay chon eq'ui, axca wal yet tol c'am co sat. Chuman wal c'u chon telc'ojtok, axca wal tol ak'balil. Axcaxac'al eb toxa chi cami, axcaxac'al tu' jayji xol eb conob tec'an waayi.

¹¹Ay bay chi tit jowal axca no oso, cax axa pax yet jun bek xin, chon k'akwi axca no paloma. Chi jechbanejc'al colbanilej, palta c'amc'al chi jayi. Chi jechbanejc'al co bekbanilal, palta c'am bak'in ok on bekchajok.

¹²Mamin Jehová, yelxac'al max jaoc co mul ayach. A yuj co mul tu' xan max titcan jiban. A tzetak max jun tu', c'am chi toj c'ayc'ulal juj, cax jojtak wal jantak yayji oc co mul on.

¹³Caw wal tenomtak on ayach, tokwal chi jochej chon tzakloj entak, ach co Diosal. Caw wal chi jaoc yailal yin jet animail, tenomtak on ayach. Asannej wal yin etnej anima ayon oc yetok co k'anej.

¹⁴A beyc'ulal yin tojolal c'amxa yopiso juj. A wal k'anej yel, tokwal chi chalay ablay bay juzgado. A bay tu', c'am yelapnok bayc'al ijanilal.

¹⁵A watx' beybalejal mayal c'ayajok, axa mac c'am chi yun yobtakil, c'amxa chi col-lay yuj ley, ẍi eb conob. Chi yil wal Jehová juntzan ti', caw wal c'am chi cha c'ul Cham tol c'am chi beyc'ulnelay yin tojolal.

¹⁶Toxac'al chi c'aycan aj c'ul Cham, yujtol c'amxa junok chi colon eb chi etaxi. Yuj tu' a wal caw Cham ok yaoc ba watx'nen elok. Yetok wal yipalil ok colwajok.

¹⁷Ok watx'nej ba Cham axca junok soldado chi toj yin owal. A is tojolal Cham, axca ch'en makil txamc'ulej yayji. Axa colbanilej, lajan wal axca ch'en toctor. Axca jayoc junok soldado ayoc pichilej yet owal yuj, axca tu' ok yun jay Jehová yetok yowal is c'ul, yuj paktzen yuj eb chi etaxi.

¹⁸A ok paktzen bay junjun, atac'ala' is yunben; ok ya wal oc yailal eb ajc'ul oc yin. A bay mac chi chichon oc c'ul yin, ok paktzej wal bay axca wal is mojalil, mawal eb conoblak cajan bay junxa k'axepal a' mar.

¹⁹Masanil eb anima bay yulyibank'inal bay yichcan, masantac'al bay yayubc'u, caw wal miman yelapnok Jehová yul sat eb, yet ok yilon oc eb yin is mayk'ak'al. Yujtol ok jay Cham, axca wal junok elom aej tol chi xulaytek yuj cakxuchum cak'ek'.

²⁰A wal caw Jehová chi aloni tol ok jayoc Cham, cax ok yak'on is bekbanilal conob Sión, a ton eb yinatil Jacob tol chi na ba c'ul yin is yobtakil.

²¹Axca ti' yalon Jehová: Tix in trato chin watx'nej e yetok ti' cax chi wak'on in ti' yin. A Wespíritu ayoc e yin, c'al in cuybej max wak' ayex, c'amxa yechel ok el e yin, tamwal yin eb e yinatil yin tojbalk'inal, ẍi Cham.