Read Q'anjob'al Is 6 Bible Online

Is 6 - Q'anjob'al bible

Is 6

¹A yet jun abil yet max cam cham rey Uzías, max wil cham Yajaw tol chotan ay bay is trono tol yelxac'al can ay ajok. Nojnak yul templo yuj jokanil is pichil.

²A yiban Cham ay juntzan ángel axca k'ak'ej yili, wakeb is xic' junjun eb. Cab xic' eb chi makchen el sat, axa cabxa chi makchen el is yakan eb, axa yetok cabxa chi toj jupupok eb.

³Cax chi aj yaw eb bay junjun, chi yalon eb axca ti': Asanxanej ocok, caw wal asanxanej oc Cham Jehová, Cham Yajaw yin Masanil. Miman txequel is mimanbilal Cham bay masanil yulyibank'inal, ẍi eb.

⁴Axa yet max oc jun aw tu', max bilaj puertalakil templo tu', cax max nojcan el yuj mub.

⁵Axa walon tu' bian: Ok'bal in c'ul. Ok in camok, yujtol max wil Cham Rey, a ton Jehová Cham Yajaw yin Masanil, ti' pax yobc'al in k'anjabi, cax cajan in ec' nan xol conob yobc'al k'anjabi, quin chi.

⁶Axa tit jupupok jun ángel xol eb tu' ayin, ibil aj jun tzak'ak' cak xayinak max yiaj bay altar yetok tenaza.

⁷Axa lapon oc yin in ti' tu', max yaloni: A jun tzak'ak' ti' max oc yin a ti ti', xan mayal el a mul tinani', max yican el a yobtakil, ẍi jun ángel tu'.

⁸Axa waben yul nuk' Cham Yajaw tu', tol chi yal axca ti': ¿Mactxel ok in cheka'? ¿Mactxel chi toj co chekbejok? ẍi Cham. Axa in tak'wi aj tu' bian: Tix in ti' Mamin, chekintok, quin chi.

⁹Max yalon Cham ayin: Asi' xin, cax chalon bay jun conob ti: Wal yel ok e yabc'al, palta man ok nachaj el e yuj. Wal yel ok e yilc'al, palta man ok nachaj el e yuj tzet ok e yil tu', cachi bay eb.

¹⁰Etnejtok nabal jun conob ti', makchej el txiquin eb, cha makchej el sat eb, yet watx' c'am chi yab eb c'al yilwi eb, tamwal nachaj el yuj eb, yet watx' c'am chi jay eb ayin, tamwal ok wantej eb, ẍi Cham.

¹¹Axa in k'anlen bay Cham tu' axca ti': ¿Jantaktoc'al tiempoal ok walil jun ti', Mamin? quin chi bay. Axa yalon Cham ayin tu': Oktoc'al alilok, masantac'al chi uchlay ay conoblak, cax c'amxa mactxel cajneni. Masantac'al yet c'amxa junok anima chi cancan yulak na tu', cax c'amxa tzet bay c'ultakbal.

¹²Masantac'al ok watok anima ti' najat, cax ok can tz'inan yulak conob.

¹³Ta wal ayto jaywanokxa anima chito can yul conob, ok uchlay c'apax ay jun conob tu' junelxa. Palta ilab te ji', c'al te c'olol, a yet chi k'aklay te', chi tit wol is k'ojal, caywal tu' ok yun jaywanokxa eb sic'bil el wuj yet chi lajwi ay in conob, ẍi Cham.