Read Q'anjob'al Is 62 Bible Online

Is 62 - Q'anjob'al bible

Is 62

¹Axca ti' yalon Jehová: Yuj wal in camc'ulal e yin ex aj Sión, xan man ok in tz'injok. Yuj wal in camc'ulal e yin, ex aj Jerusalén, xan manc'al ok in xewok, masantac'al tol ok txecloj aj e tojolal, axca wal yet chi sakbi; axa e colbanil, ok txecloj aj axca wal chaw junok tzektebalej.

²A masanil nacionlak ok yil wal eb e colbanil tu', masanil eb rey ok ilon e yibalcanilal, yuj tu' ok oc junxa ac' biej e yin, tol ayin caw Jehová in ok wak' ayex.

³Ayex ti', lajan ex wal axca junok corona manxa watx'ilok yuj wilay aj can.

⁴Manxac'al okto e yik Conob Bekbilcanok, tamwal e makbej okto yik Uchbiltok, palta tol ok e yik: Ochebil yuj Dios. Axa e tx'otx'al ok yikcan: Ayxa Yajaw, yujtol ochebil ex wuj. Ok in oc yajawilok e tx'otx'al.

⁵Axca wal junok ach'ej chi nupay yetok ix k'opoj, tol ayxa is trato yetok, caywal tu' ok wun e yetok ayin e Watx'nemal in ti'; ok in oc e yajawilok cax ok wak'on tzalojbok in c'ul e yetok, axca wal tzalojbi c'ul nak tolto chi nupay yetok yistzil.

⁶Ex aj Jerusalén, a bay e muralla max wacan oc eb nak chi tayneni. Manc'al ok bek in yawten eb yet c'ualil c'al yet ak'balil. A mac ex chin e yawtej, manchak ex tz'inji,

⁷c'amc'al chin e yak' xew yin quin e yawteni masantac'al ok yal yion ba watx'ji aj Jerusalén wuj, yetok c'apaxok, masantac'al ok al-lay watx' k'anej yin bay masanil yulyibank'inal, ẍi Cham.

⁸A Jehová mayal yak' is ti', ok yak'c'alta' yun yuj is yipalil: C'amxa yechel tol okto in cha loaytok eb ajc'ul e trigo, tamwal eb tx'ok conobal ok uq'uen aytok e vino, juntzan tol ayex wal caw max ex mulnaj oc yin e watx'neni.

⁹Palta tol ayex wal caw ok e wajbaj aj sat e yawoj, cax ok e looni, cax ok e yalon watx' k'anej ayin. Ok e wajon c'apax sat e yuva; ayex wal caw ok e yuc' e vino bay yul yamak'il in templo, ẍi Cham.

¹⁰Ex aj Jerusalén, elanektok bay yulak puerta, watx'nejek be satak eb e yet conob. Watx' chi yun e yak'on pananbok bay jobquiltak, watx' chi yun e yion el ch'en ch'en yul be. Iek aj an bandera yuj yilon nacionlak.

¹¹A Jehová ok yal bay masanil yulyibank'inal: Alek bay eb aj Jerusalén, tol chi jayoc is Colomal eb, ibil oc yuj tzet max yi' q'uexelok is mulnajil, quex chi, ẍi Cham.

¹²A eb Israel ok ak'lay yik eb conob Dios, a ton eb mayal bekchajcan el yuj Jehová. Axa Jerusalén xin, ok yik Conob Ochebil, C'amxa Yechel Ok Beklaycanok, caytu' yoc is bi.