Read Q'anjob'al Is 7 Bible Online

Is 7 - Q'anjob'al bible

Is 7

¹A cham Rezín reyal Siria, yetok cham Peka, c'ajol Remalías, reyal Israel, max yak' eb owal yetok Jerusalén, max yochej eb tol max ayc'ayi; palta maj je' yuj eb. Max yun jun ti' yet ayoc cham Acaz, c'ajol Jotam reyal bay Judá. Uzías bi is mam icham.

²A ton wal yet tu' max al-lay yab cham rey Acaz, c'al eb ayoc yin opiso yetok, tol a eb aj Siria ipan junanen ba eb yetok eb aj Israel, yuj yak'on eb owal yetok Judá. Axa eb conob yetok cham rey max c'oli bilaj eb yuj xiwilal, axca wal bil te te' yuj cak'ek'.

³Axa yalon Jehová bay Isaías tu': Asi', cax ok a chalen a ba yetok Acaz tu'. Chetok a c'ajol Sear-jasub*fn* etok. Ok a chalej a ba yetok Acaz tu' bay chi el a' aej bay a' miman najab ayoc bay yiban be, bay chi tx'ajlay k'apej.

⁴Tix chot alon bay ti': Xelc'al a ba, cax c'am chach xiwi, tamwal chach aj q'uitnajok. Manchak ach oc il yuj yowal cham Rezín, yetok eb aj Siria, yetok c'apax cham c'ajol Remalías tu', manchak ex oc il. Lajan eb axca cabok cux chi el mubal.

⁵A eb aj Siria, yetok eb conob Efraín, c'al cham c'ajol Remalías, lanan naon eb jun yobal en. Chi yal eb axca ti':

⁶Tonek, co tok'can ec' Judá, ok jaoc xiwilal yin eb. Ok co pojcan ec' jun conob tu' jin, axa cham c'ajol Tabeel ok jacan oc yin reyalil bay tu', ẍi eb.

⁷Axa Jehová Cham Jajawil chi alon axca ti': C'am bak'in ok yuncan el jun nabal eb nak tu'.

⁸Yujtol a yipalil Siria, a ton conob Damasco, miman conob toni, axa yipomal Damasco, a ton Rezín. Axa Efraín xin, a yet 65 abil tinani', ok lajwok ayok xan manxa nacionok ok yuncanok.

⁹A yipalil Efraín, a ton conob Samaria; axa yipomal Samaria, a ton c'ajol Remalías tu'. Ta c'am chin e yaoc yin e c'ul, maj ex mayjok ayex ti' c'apaxok, ẍi Jehová, cachi bay, ẍi Cham.

¹⁰Max chek pax Jehová Isaías yalon bay Acaz axca ti':

¹¹K'an bay Jehová co Diosal junok tx'oxbanil is colwal, caxc'al atac'al bay najatil yul c'ul tx'otx' tx'otx' ma bay yibantac'al satcan, ẍi Isaías bay.

¹²Axa tak'wi Acaz tu': Majc'al xin, maj je' waon oc cham Jehová yin porobalil yin in k'anon tx'oxbanil bay, ẍi Acaz.

¹³Axa yalon Isaías tu' axca ti': Abek, ayex yinatil ex David ti'. C'am wal yelapnok yul e sat e yetnen eb anima. ¿Tom lanan c'apax yec' yul e c'ul e yetnen in Diosal?

¹⁴A wal caw cham Yajaw ok yak' junok tx'oxbanil ayex: A jun ix k'opoj ix ok oc unin yin, ok jay jun is winak unin, Emanuel*fn* ok yik yuj ix.

¹⁵A yet yaliẍto, ok lo nak queso yetok yal cab.

¹⁶A yet c'amto chi jay nabal jun unin tu', a cab conob yetok cawan rey bay chach xiw ti', ok can tz'inanok.

¹⁷Ok yitek Jehová eban, c'al yiban a conob, c'al xol eb yinatil David etok, c'ual yet yatakilal tol c'am bay max uji, yecheltax max yiel ba Efraín bay Judá, ẍi Isaías. (Chi yal elapnok tol a ton yatakilal yuj reyal Asiria.)

¹⁸A yet jun c'ual tu', ok awjok Jehová, cax ok yawten eb aj Egipto, cax ok tit eb axca no catx, ok tit eb bay najatil tilak a' Nilo, c'al eb aj Asiria ok jay eb axca noal cab.

¹⁹Cax ok ayjok eb bay masanil jobelak, c'al yulak nach'en, c'al bay eltzab, c'al bay yulak potrero.

²⁰Cayton tu' ok yun yiontek Jehová cham reyal Asiria bay k'axepaltok a' miman Éufrates, cax pilan ok yitok cham masanil e tzet yetal, axca chi yun yion el junok tzukom xilej masanil xil jolomej, c'al xil tiej, yetok xil mimanilej.

²¹A yet jun tiempo tu', a mactxel ok job junok is txutx wacax, ma jun cac'onok is chiwo, xiwil queso ok lo'.

²²Yujtol xiwil leche ok yak' no', xan a eb ok colchaj xol jun owal tu', ok ton lo eb queso, c'al yuq'uen eb yal cab.

²³A yet tu', a bay awbejalben uva, eltzab q'uixxa ok yuncantok, cax ac'unlak ok yunej. A yet yalantok, mil moc'an an uva ay bay tu', cax mil siclo plata is tojol.

²⁴Axa ok yunej, asan eb uktem no' ok je' yoc bay tu' yetok is julbal; masanilxac'al bay ok aj an ac'un, c'al eltzab q'uix.

²⁵Xiwil eltzab q'uix ok ch'ibaj bay tzalanlak, tol a yet yalantok chi ec' asarón sat tx'otx' yet chi ay awoj. C'am mactxel ok mulnaj bay tu', asan lobal wacax c'al lobal calnel ok yuncanok.