Read Q'anjob'al Lv 10 Bible Online

Lv 10 - Q'anjob'al bible

Lv 10

¹A Nadab c'al Abiú, eb is c'ajol cham Aarón, max yitek eb is txayib, axa yaon oc eb k'ak'al tu'. Max yaon c'apax aytok eb incienso yiban, axa yaon oc eb satak Jehová, palta manak Cham max alon bay eb.

²Xan max eltek k'ak'ej yin eb satak Jehová, max low jun k'ak' tu' yin eb, cax max cam eb satak Cham.

³Lajwi tu xin, max yalon cham Moisés bay cham Aarón: —A ton jun ti' chi yal elapnok is k'anej Jehová max yala': A yin mactxel ok jayoc in cawilal, ok in tx'oxon in ba, tol asanxanej in ocok, a bay masanil in conob ok in tx'ox in mayk'ak'al, ẍi Jehová, ẍi Moisés. C'amxa tzet max yal cham Aarón.

⁴Lajwi tu' max yawten cham Moisés, Misael c'al Elsafán, eb is c'ajol Uziel is yican cham Aarón, max yaloni: —Sebaxek ayex ti' bay mantiado bay ayic' is mimanil eb e yican, iek eltok bay yinel campamento, ẍi.

⁵Max jayoc eb bay tu' max yion eltok eb bay yinel campamento axca max yun yalon cham Moisés. Aytoc'al oc is pichil eb camnak tu' yin, a ton an max k'anc'alta' eb yin yopiso.

⁶Lajwi tu' max yalon cham Moisés bay cham Aarón, bay Eleazar c'al bay Itamar, eb is c'ajol cham Aarón iquisto ec' tu': —Manchak e yiel k'oxil e jolom, tamwal che tziltok e pichil yuj e tx'oxon el e cusc'ulal, axa talaj chi yunej, chex cami, c'al tit yowal c'ul Jehová yiban masanil conob Israel. Palta a masanil eb jet conob Israel ti' chi je' cusc'ul eb yin mactxel max yak' lajwok Jehová yetok k'ak'ej.

⁷Manchak ex el c'apax satak mantiado bay chi co chalej co ba yetok Cham, yet watx' c'am chex cami, yujtol ayex ti', sic'bil ex elok, abil ajtok aceite yet Jehová yiban e jolom, ẍi cham Moisés. Axca wal max yun yaloni, axca tu' max yun eb.

⁸Max yalon c'apax Jehová bay cham Aarón axca ti':

⁹A yet ok ach octek ach ti', ma eb a c'ajol bay yul mantiado bay chin chalej in ba e yetok, manchak e yuc' vino, tamwal tzet yetal tol pajbinakxa, axa talaj chi yunej chex cami. A jun ti' ley chi yuncan e xol yin tojbalk'inal.

¹⁰Manchak e yut juntzan tu' yujtol yowalil chi nachaj el e yuj tzet yetal tol wet, c'al tzet yetal comon yayji ocok, c'al nachaj el e yuj, tzet yetal watx' atac'ala' yalon ley, c'al tzet yetal man watx'ok.

¹¹Yowalil che cuy c'apax eb e yet conob yin juntzan ley max in chek yal Moisés ayex ti', ẍi Jehová.

¹²Lajwi tu' max yalon pax cham Moisés bay cham Aarón, yetokc'al bay Eleazar c'al bay Itamar, a ton eb cawan is c'ajol cham Aarón iquisto ec' tu': —Iektek ixim harina maxto cancan yin ofrenda max tz'a satak Jehová, che watx'nej pan c'am yich bay satak altar, yujtol a jun ofrenda tu', yet Jehová yayji.

¹³A tu' che lo' bay junok lugar tol yet Jehová yayji ocok, yujtol et yayji yetok eb a c'ajol yin ofrenda chi ak'lay tz'a satak Cham; a ton juntzan ti' max yal Cham ayin.

¹⁴Axa pax no txamc'ulej chi batxlay ec' satak Jehová yetok no xubej, chi ilay el yin no', a juntzan tu' e yetc'alta' yayji ocok. A tu' cha chi' yetok eb a c'ajol c'al eb a cutz'in bay junok lugar tol watx' yayji, yujtol a juntzan tu' e yetc'alta' yayji yin xajanbal yet junc'ulalil chi yak' masanil eb jet israelal.

¹⁵Yujtol a no xubej chi ilay el tu', c'al no txamc'ulej chi batxlay ec' satak Jehová, junej chi yun yak'lay yetok no sebo chi ak'lay tz'aok. A ca makan no' tu', et yetok eb a familia yin tojbalk'inal axca max yun yalon Jehová ayin, ẍi cham Moisés.

¹⁶Cax max k'anlen c'apax cham Moisés yuj no chiwo max ak'lay yin xajanbalil yuj yak'lay tan mulej. Axa max yalon eb tol mayal ak'lay tz'a no'. Yuj tu xin, max tit yowal cham Moisés yin Eleazar, c'al yin Itamar, a ton eb cawan c'ajol cham Aarón iquisto ec' tu', max yalon bay eb axca ti':

¹⁷¿Tzet yuj xan maj e chi' no xajanbal bay yul makbej cajlobal Jehová? A jun makan xajanbal tu', yet Jehová yayji ocok xan max yak' Cham no' ayex, yujtol a yuj che chi' no', xan chi tancan el is mul eb conob satak Cham.

¹⁸Yujtol a chiq'uil no xajanbal tu', maj ilaytok bay yul cajlobal Cham, xan yowalil tol max e chi' no' bay yul is makbej tu', axca max yun walon ayex, ẍi cham Moisés.

¹⁹Max yalon cham Aarón axca ti': —A tinani' max yak' eb is xajanbal yuj yak'lay tan mulej, c'al xajanbal tol chi tz'a masanil, caxc'al mi axca tu', palta ila wal tzet max jayoc wiban. Ta max in chi' no xajanbal max ak'lay yuj mulej tu' tinani', ¿xin ta wal watx' satak Jehová? ẍi cham Aarón.

²⁰A yet max yaben cham Moisés axca tu', c'amxa tzet max yala'.