Read Q'anjob'al Lv 15 Bible Online

Lv 15 - Q'anjob'al bible

Lv 15

¹Max yalon Jehová bay cham Moisés, c'al bay cham Aarón,

²tol chi yal eb masanil juntzan chekbanilej ti' bay eb yet israelal. Xan max yal eb axca ti': Ta ay junok winak ay junok ilya' yin is mimanil, xan ay tzet chi elc'al yin is winakil, a jun tu' man watx'ok yayji atac'ala' yalon ley.

³Caxc'al tol chi elc'al juntzan tu', ma ay bay chi makay janic'ok tiempoal, chi tit paxok, man watx'ok yayji, atac'ala' yalon ley.

⁴Tzanc'al tzet wayubejal bay chi way jun winak tu', ma tzanc'al tzet chemal bay chi ay chotanok, man watx'ok chi yuncanok.

⁵Tzanc'al mactxel chi mitx'on jun wayubej bay max ay telan jun winak tu',

⁶ma chi ay chotan bay max ay chotanok, man watx'ok chi yuncanok atac'ala' yalon ley. Yowalil chi tx'aj is pichil cax chi achinwi c'apaxok, palta mantoc'al watx'ok masantac'al yet chi k'ekbi ayok.

⁷Tzanc'al mactxel chi mitx'on junok tol ay tzet chi el yin, yowalil chi tx'aj is pichil c'al yachinwi, palta mantoc'al watx'ok yayji masantac'al yet chi k'ekbi ayok.

⁸Ta a jun winak ay tzet chi el yin tu', chi tzubli oc yin junokxa anima, a jun anima bay max low is tzub tu', yowalil chi tx'aj is pichil cax chi achinwi, palta mantoc'al watx'ok yayji masantac'al yet chi k'ekbi ayok.

⁹Ta a jun winak ay tzet chi el yin tu' chi aj yiban chej, a is tz'um no' tu', man watx'ok chi can yuj.

¹⁰Tzanc'al mactxel chi mitx'on junok tzet yetal bay chi ay chotan jun winak tol ay tzet chi el yin tu', a jun tu' man watx'ok chi yuncanok, masantac'al yet chi k'ekbi ayok. Tzanc'al mactxel chi iontok junok juntzan tzet yetal tu', yowalil chi tx'aj is pichil cax chi achinwi, palta mantoc'al watx'ok atac'ala' ley masantac'al yet chi k'ekbi ayok.

¹¹Ta a jun winak ay tzet chi el yin tu', c'am chi tx'aj is k'ab cax chi mitx'on junokxa mactxel, a jun max mitx'lay yuj tu', yowalil chi tx'aj is pichil, cax chi achinwi, palta mantoc'al watx'ok masantac'al yet chi k'ekbi ayok.

¹²Ta ay junok xij chi mitx' jun winak ay tzet chi el yin tu', yowalil chi mak'lay poj jun xij tu', ma junok te te' mitx'k'abej yayji, a jun tu' chi tx'ajlay elok.

¹³Ta chi watx'ji c'ul jun winak tu xin, c'amxa tzet chi el yin, a jun tu', yowalil chi bis ukebok c'ual yet is sakbanilal; lajwi tu' chi tx'ajon is pichil c'al yachinwi bay a' aej chi ajol nuk'. Caytu' chi yun watx'jican elok atac'ala' yalon ley.

¹⁴Axa yet is waxak c'ual xin, yowalil chi yitek cac'onok no jobbejal paloma tzanc'al tzet makanil, cax chi tit bay satak mantiado bay chi co chalej co ba yetok Jehová, axa junok sacerdote chi aon oc no' satak Cham.

¹⁵Jun no' chi yak' jun sacerdote tu' yin xajanbalil yuj yak'lay tan mulej, axa junxa no' xin, chi ak'lay tz'aok. A jun sacerdote chi aon oc masanil juntzan ti' satak Jehová, yuj sakbanilal el jun winak max ec'lej jun yailal yin tu'.

¹⁶Ta a junok winak toc'al chi el yinatil, yowalil chi achinwi, palta mantoc'al watx'ok atac'ala' yalon ley, masantac'al yet chi k'ekbi ayok.

¹⁷Tzanc'al tzet k'apejal ma tz'um bay max oc yinatil jun winak tu', yowalil chi tx'ajlay elok, mantoc'al watx'ok atac'ala' yalon ley masantac'al yet chi k'ekbi ayok.

¹⁸Ta a junok nak winak yetok junok ix ix ay tzet chi yun eb, yowalil chi achinwi eb, palta mantoc'al watx'ok eb atac'ala' yalon ley masantac'al yet chi k'ekbi ayok.

¹⁹Ta a junok ix ix ayoc yin tiempoal is bisbal xajaw, man watx'ok yayji yin ukeb c'ual. Tzanc'al mactxel chi mitx'on ix, man watx'ok chi yuncan jun tu' atac'ala' yalon ley, masantac'al yet chi k'ekbi ayok.

²⁰Tzanc'al tzet wayubejal bay chi ay telan ix yet ayoc yin is tiempoal tu', ma tzanc'al tzet chemal bay chi ay chotan ix, a juntzan tu' man watx'ok chi yuncanok.

²¹Tzanc'al mactxel chi mitx'on bay max ay telan ix tu', ma chi mitx' junok tzet yetal bay chi ay chotan ix, man watx'ok chi yuncanok. Yowalil chi tx'aj is pichil, cax chi achinwi, mantoc'al watx'ok masantac'al yet chi k'ekbi ayok.

²⁴Ta ay junok winak chi way yetok ix, chi bonchaj yuj tzet chi el yin ix tu', yowalil man watx'ok chi yuncan yin ukeb c'ual, cay c'apax tu' chi yuncan wayubej bay chi way nak tu'.

²⁵Ta ay junok ix ix chi el chic' yin yet man tiempoalok is bisbal xajaw tu', ma yelxac'al miman tiempoal chi yak' is bisbal xajaw, a ix ix tu' mantoc'al watx'ok yet aytoc'al tzet chi el yin tu', axq'uijan tol aytoc'al oc yin is bisbal xajaw.

²⁶Tzanc'al tzet wayubejal bay chi wayi, ma chem bay chi ay chotan ix yet aytoc'al tzet yetal chi el yin ix tu', man watx'ok chi can juntzan tu', axcac'al yet ayoc ix yin is bisbal tu'.

²⁷Tzanc'al mactxel chi mitx'on juntzan tzet yetal ti' man watx'ok chi yuncanok, yowalil chi tx'aj is pichil cax chi achinwi, mantoc'al watx'ok yayji masantac'al yet chi k'ekbi ayok.

²⁸A yet chi oc wanaj yel chic' tu' yin xin, cax chi bison ukeb c'ual, Chi lajwi tu', caytu' chi yun watx'jicanok.

²⁹Axa a yet is waxakeb c'ual xin, cax chi yiontek cac'onok no jobbejal paloma tzanc'al tzet makanil, cax chi yiontek bay junok sacerdote, bay satak mantiado bay chi co chalej co ba yetok Jehová.

³⁰Jun no' chi yak' jun sacerdote tu' yin xajanbalil yuj yak'lay tan mulej, axa junxa no' xin, chi ak'lay tz'aok. Caytu' chi yut yaon oc jun sacerdote tu' jun xajanbal tu' satak Jehová, yuj tzet max el yin ix ix tu'.

³¹Caytu' chi yun co sakbanen co ba ayon israel on ti' yin tzet chon oni; ta c'amak, ok jetnej el is cajlobal Jehová ayic' co nan co xol ti', cax ok on camok, ẍi Cham.

³²A ton juntzan chekbanilej ti' yin eb winak ay tzet chi el yin, ma toc'al chi el yinatil yin, xan man watx'ok chi yuncan yuj;

³³c'al yin eb ix ix ayoc yin is bisbal xajaw. A juntzan chekbanilej ti', yowalil chi ikelay yuj eb ay is yailal axca tu', winak ma ix. Chi oc c'apax jun ley tu' yiban junok winak chi way yetok ix ix yet man watx'ok ix atac'ala' yalon ley.