Read Q'anjob'al Lv 16 Bible Online

Lv 16 - Q'anjob'al bible

Lv 16

¹A yet max lajwi cam cantok eb c'ajol cham Aarón cawanil, yujtol max jitztok ba eb is cawilal Jehová yin tol man axcaok is leyalil,

²max yalon Jehová bay cham Moisés: Al bay oẍtak Aarón, tol c'am chi octek yin tzanc'al tzet tiempoal bay yul in cajlobal bay jun lugar wet in tx'oklil, yintak octek an k'ap ayoc makilok nan satak makil caẍail trato, yet watx' c'am chi cami, yujtol ayin ok in tx'ox in ba xol asun bay yiban is makil caẍail trato bay chi ak'lay tan mulej.

³A yet c'amto chi oc Aarón bay jun lugar ti', yowalil chi yak' junok no ach'ej wacax yin xajanbalil yuj is mul, yetok c'apax junok no icham calnel chi yak' tz'a masanil.

⁴Cax ayokab oc is jokan pichil yuj, yetok is calzoncillo, c'al an c'alilej yin is nan, c'al k'oxil is jolom. A masanil juntzan pichilej ti', linoc'al elok, c'al ya' yili, xan yowalil chi achinwi yin babelal, catatu' chi yaon oc is pichil tu'.

⁵Chi yak' conob Israel cac'onok no mam chiwo yin xajanbalil yuj mulej, c'al junok no calnel chi ak'lay tz'aok.

⁶Lajwi tu', chi yak'on Aarón no ach'ej wacax max yitek tu' yin xajanbalil. A jun no' tu' yet yul yet, yuj yak'lay tan is mul yetok masanil eb ayic' yetok yul yatut.

⁷Catatu' chi yiontek no cac'on mam chiwo bay satak in cajlobal bay chin chalej in ba e yetok.

⁸Cax chi yaon oc suerte yiban no chiwo tu' cac'onal; jun no' chi oc yin xajanbalil in satak; axa junxa no' xin, chi alaycan oc mulej yiban yet chi yiontok.

⁹A no' tol chi ayc'ay suerte yiban tol wet, yiokabtek Aarón no' yoc yin xajanbalil, yet chi tancan el is mul eb conob.

¹⁰Axa junxa no chiwo tu', yin yiquisal no' chi oc in satak, chi alaycan oc mulej yiban, cax chi beklaycantok bay tz'inan tx'otx' yet chi yicantok no' is mul eb conob.

¹¹Chi yak'on Aarón no ach'ej wacax yin xajanbalil yet chi ak'lay tan is mul yetok masanil eb ayic' yetok yul yatut.

¹²Chi lajwi tu', cax chi yiontek jun txayib nojnak yetok tzak'ak', tol chi yitek bay altar in satak, yetokc'al cabok betxan incienso suk'uk'i jab, cax ok yion octek bay yintak an k'ap ayoc makilok in cajlobal.

¹³Cax ok yaon ay incienso tu' yiban tzak'ak' in satak, axa is mubal chi oc boc'an yiban makilej ayoc yiban caẍail trato bay chi ak'lay tan yobtakil, yet watx' c'am chi cami.

¹⁴Cax chi yiontek janic'ok is chiq'uil no ach'ej wacax tu', chi laaytok yiximal is k'ab xol chic' tu', cax chi txijontok yiban is makil caẍa ti', axa pax yetc'ulal is ti' bay chi octek, ukel chi txij oc chic' tu' bay satak ch'en makilej tu'.

¹⁵Chi lajwi tu xin, chi eltok yina yin mak'on cam no mam chiwo chi oc yin xajanbalil yuj is mul eb conob, cax chi yion octek is chiq'uil no' bay yintak an k'ap ti', cax chi txijon pax ay chiq'uil no' tu' bay yiban ch'en makilej c'al bay is satak, axca wal max yut is chiq'uil no ach'ej wacax yet babelal.

¹⁶Axca wal tu' ok yun sakbanen Aarón jun lugar wet in tx'oklil, yuj tzanc'al tzet is yobtakil c'al is tenomtakil eb yet israelal. Ac'ala' axca tu' ok yut c'apax sakbanen in cajlobal bay chin chalej in ba e yetok, jun tol ayic' e yetok, nan xol e yobtakil.

¹⁷A yet ay octek Aarón bay jun lugar wet in tx'oklil yin yak'on xajanbal yet chi tan mulej, c'am junok mac chi can bay yul in cajlobal, masantac'al yet chi elolok. A yet mayal ak'lay tan is mul, yetokc'al is mul masanil eb ayic' yetok yul yatut, yetokc'al is mul eb conob Israel,

¹⁸cax chi eltok c'apax sakbanej altar ayic' in satak, cax chi yion eltok janic'ok is chiq'uil no wacax c'al janic'ok yet no mam chiwo, chi yaon oc yin is yuc'a' altar ay bay canebal is txiquin.

¹⁹Cax ok laon aytok yiximal is k'ab xol chiq'uil no no' tu' yin ukel, cax txijon oc yiban altar, axca tu' chi yun sakbanen altar tu' yuj e yobtakil ayex, israel ex ti'.

²⁰Chi lajwi sakbican jun lugar tol wet in tx'oklil, c'al in cajlobal, yetokc'al altar yuj, cax chi yak'on tit no mam chiwo iquis tu'.

²¹Lajwi tu', chi yaon oc is k'ab cabil yiban is jolom no', cax chi oc ijan yalon ay is mul c'al is tenomtakil eb yet conob yiban no'. Axca tu' chi yun cancan is mul eb yiban no', axa jun winak sic'bilxa yayji, ok tok ak'oncan no' bay tz'inan tx'otx' najat.

²²Cax ok bekon cantok nak no' bay tu', cax ok c'aycantok no' bay tz'inan tx'otx'. Caytu' chi yun yioncantok no' is mul conob Israel bay c'amxa anima chi eq'ui.

²³Chi lajwi tu xin, cax chi oc paxtek Aarón bay yul in cajlobal yin q'uexon el is pichil ayocok, an naba lino, an ayoc yuj yet chi octek yul jun lugar tol wet in tx'oklil, cax chi can an yuj bay tu'.

²⁴A bay yul in cajlobal tu', a tu' chi achinwi, cax chi yaon oc is pichil tol chi yac'alta' oc yin yopiso. Chi lajwi tu', cax chi yak'on tz'a is xajanbal tol yet yayji c'al xajanbal yet eb conob. Axca tu' chi yun tancan el is mul, yetokc'al yet eb conob.

²⁵A jantak is seboal no xajanbal yuj mulej, chi ak'lay c'apax tz'a yiban altar.

²⁶Axa nak max bet ak'oncan no mam chiwo bay tz'inan tx'otx' tu', a yet chi jayi, axa tx'ajon el is pichil, c'al yachinwi. Catatu' chi je' yoctek bay yul campamento.

²⁷A no ach'ej wacax, yetok no mam chiwo max ak'lay cam yin xajanbalil yuj tancan el mulej, no' tol max ilaytek is chiq'uil yul jun lugar tol wet in tx'oklil, chi ilaycantok is mimanil no' bay yintak eltok campamento. A bay tu' chi ak'lay tz'a no', yetok is tz'umal, c'al chibejal no', c'al is tza' no'.

²⁸A nak chi ak'on tz'a no' tu, yowalil chi tx'aj is pichil, cax chi achinwi, catatu' chi je' yoctek yul campamento.

²⁹A jun ti' ley chi yuncan e xol yin tojbalk'inal. Yet 10 waay yet is suk xajaw, chex oc yin c'ajbanc'ulal, cax c'am junok mactxel chi mulnaj yet jun c'ual tu', tamwal ayex aj conob ex ti', tamwal eb tx'ok conobal ayic' e xol.

³⁰Yujtol a jun c'ual ti' is c'ual yak'lay xajanbal yuj e mul yet watx' chi tancan el e mul in satak.

³¹A jun c'ual ti', c'ual xewilal chi yuncanok, c'al c'ajbanc'ulal; ley chi yuncan e xol yin tojbalk'inal.

³²A yuj tu' xan a yet ok cam jun sat sacerdote, ac'alta' is c'ajol ok occan is q'uexelok. Ok alay ajtok aceite yiban is jolom c'al yak'lay xajanbal yuj yoccan yikbej, cax ok yaon oc is pichil tol ya' yili.

³³A' ok ak'on xajanbal yet chi sakbanen jun lugar tol wet in tx'oklil, c'al in cajlobal bay chin chalej in ba e yetok, c'al altar, c'al yuj yak'lay tan is mul eb sacerdote yetokc'al ayex conob Israel ex ti'.

³⁴A jun ti' ley chi yuncan e xol yin tojbalk'inal. Junel chi ak'lay xajanbal ti' yul junjun abil yet chi tanil e mul ayex conob Israel ex ti', ẍi Jehová. Axca wal max yun yalon Cham, caytu' max yut cham Moisés.