Read Q'anjob'al Lv 18 Bible Online

Lv 18 - Q'anjob'al bible

Lv 18

¹Max yalon Jehová bay cham Moisés axca ti':

²Al bay eb et israelal masanil juntzan ti': Ayin Jehová e Diosal in.

³Manchak e beybalnej beybal eb anima bay Egipto, a ton jun nación bay max quex ec'lej cajanok. Man ok e beybalnej c'apax beybal eb anima bay Canaán bay lanan ex wiontok.

⁴Ikejek in chekbanil, cax che yiken e beybalnen in ley. Ayin ton Jehová e Diosal in chi wala'.

⁵Beybalnejek in chekbanil c'al in ley. A mactxel ok ikenok, ok iquisbokc'al yuj. Ayin ton Jehová in chi wala'.

⁶C'am junok winak chi mitx'oc junok ix ix tol yicanto ba yetok. Ayin ton Jehová in chi wala'.

⁷C'amokab junok mactxel chi yiel q'uixwil is mam, yuj mitx'on oc is txutx; caw wal yob yujtol is txutx wali.

⁸C'amokab junok winak chi yiel q'uixwil is mam yuj chi mitx'oc yistzil is mam tu'.

⁹C'amokab junok winak chi mitx'oc yanab: yanab yuj is mam, ma yuj is txutx; caxc'al aljinak ix bay yul is na, ma tx'ok bay aljinak ix, c'am chi je' mitx'on ocok.

¹⁰C'amokab junok winak chi yiel is q'uixwil yuj mitx'on oc is yitxiquin, yitxiquin yuj is c'ajol ma yuj is cutz'in, c'am chi je' mitx'on ocok.

¹¹C'amokab junok winak chi mitx'oc ix yune' yistzil is mam, tol cutz'in wal is mam tu', tol cab yanab yayji oc ix, yuj tu' xan c'am chi je' mitx'on ocok.

¹²C'amokab junok winak chi mitx'oc yanab is mam, yujtol ac'aloc is mam tu' yetok ix.

¹³C'amokab junok winak chi mitx'oc nuej is txutx, yujtol ac'aloc is txutx tu' yetok ix.

¹⁴C'amokab junok winak chi yiel q'uixwil yuẍtak is mam yuj mitx'on oc yistzil nak, yujtol axca tol yicanto yayji oc ix.

¹⁵C'amokab junok winak chi mitx'oc yalib, yujtol yistzil is c'ajol ix, c'am chi je' mitx'on ocok.

¹⁶C'amokab junok winak chi yiel q'uixwil yuẍtak, yuj mitx'on oc is yistzil nak.

¹⁷C'amokab junok winak ibil junok ix ix yuj, cax chi mitx'on pax oc yune' ix, tol is cab cutz'in yayji ocok, tamwal chi mitx'oc yitxiquin yistzil tu', yitxiquin yuj junok nak is yune' xal ma yuj junok ix yune' xal, caw wal yelxac'al yob axca tu', yujtol yetc'al xal yayji oc eb tu'.

¹⁸C'amokab junok winak chi yiaj is nuej yistzil, c'am chi je' yioni yak'ban iquisto ec' yistzil tu', yet watx' c'am chi oc ajc'ulal xol eb ix.

¹⁹C'amokab junok winak chi mitx'oc junok ix ix yet ayoc ix yin tiempoal yet is bisbal xajaw.

²⁰C'amokab junok winak chi mitx'oc yistzil is yet winakil, man watx'ok chi yuncan eb satak ley.

²¹C'amokab junok winak chi yak' tz'a yuninal yin xajanbalil bay jun comon dios Moloc. Ta chi yun axca tu', c'am welapnok yul sat. Ayin Jehová in chi wala'.

²²C'amokab junok winak chi mitx'oc yet winakil, axca chi yun yetok junok ix ix; a jun tu' yajbejtak.

²³C'amokab junok winak chi yun mul yetok no no'; c'amokab mac chi yetnejtok ba yin axca tu'. C'amokab c'apax junok ix ix chi yun mul yetok junok no no', yujtol caw wal manxa yetc'ulalok.

²⁴C'amokab mactxel chi yetnejtok ba yin juntzan tzet yetal ti'. Yujtol a yin masanil juntzan ti', chi yetnejtok ba juntzan conob ok wiel e satak ti'.

²⁵Yuj wal juntzan tu', xan manxa c'apax watx'ok yayji is tx'otx'al eb. Yuj tu' xan lanan wak'on yowalil bay eb, xan axa is tx'otx'al eb chi ak'on c'ayilok.

²⁶A masanil juntzan tzet yetal tu', chi beybalnej juntzan anima cajan bay jun conobal tu', yet c'amto chex apni oc cajan ayex ti'. Yuj tu' xan yelxac'al man watx'ok yayji tx'otx' tx'otx' tu' yuj eb. Palta ayex israel ex ti', yetokc'al eb tx'ok conobal cajan ec' e xol, yowalil che beybalnej, c'al e yiken in chekbanil ti'. C'am che yun masanil juntzan tzet yetal man watx'ok chi yun eb tu', yet watx' c'am c'apax chex c'ayil yuj tx'otx' ayex ti'.

²⁹A mactxel chi beybalnej juntzan tzet yetal yajbejtak ti', a jun tu' yowalil chi c'aylay el e xol.

³⁰Yuj wal tu' xan beybalnejek in chekbanil, c'am che beybalnej juntzan beybalej yajbejtak tu', a ton juntzan chi beybalnelay yet c'amto chex apni oc bay tu'; c'am che yetnejtok e ba axca tu'. Ayin Jehová e Diosal in chi wala', ẍi Jehová, cachi bay eb, ẍi Cham.