Read Q'anjob'al Lv 19 Bible Online

Lv 19 - Q'anjob'al bible

Lv 19

¹Max k'anjab Jehová bay cham Moisés, max yalon axca ti':

²Al masanil juntzan k'anej ti' bay eb et israelal: Watx'c'al che yut e ba, yujtol ayin Jehová in ti' watx' inc'al.

³Ikemokab ex bay e mam c'al bay e txutx. Che yikej c'ual xewilal. Ayin ton Jehová e Diosal in chi wala'.

⁴Manchak e yaoc e nabal yin yechelej, cax manchak e watx'nej aj ch'en ch'en e diosalok. Ayin Jehová e Diosal in chi wala'.

⁵A yet che yak'on xajanbal yet e junc'ulalil wetok, che yikej wal axca is leyal, cax ok in chaon ayex.

⁶A no chibej che yak' yin xajanbalil tu', che chi no' yet is c'ual tu', c'al yet junxa c'u; ta ayto chi can yet is cabjial xin, ak'layokab tz'aok.

⁷Tatol chito e chi' no' yet cabjial tu', yobxa yul in sat, c'amxa chin cha' xajanbal tu' ayex.

⁸A mac chi chion no' yet is cabjial tu', c'am chi tan is mul tu' yiban, yujtol max yut yin comonal tzet yetal tol wet yayji. A jun mactxel tu', chi c'aylay el e xol.

⁹A yet che wajon aj sat e yawoj bay e tx'otx', man siq'uiq'uiokxac'al che yut bay is tilak, cax manchak ex ec'xac'al t'ananok e sic'on aj ixim jolom trigo chi cancan e yuj.

¹⁰A yet che wajon an uva, manchak ex meltzoj e sayon e yil yin cayelal, cax manchak e sic'aj an chi pukayok. A juntzan tu' canokabi, yet-xa eb meba', c'al eb tx'ok conobal yayji ocok. Ayin ton Jehová e Diosal in chi wala'.

¹¹Manchak ex elk'ani, manchak e yal lek'tial k'anej, cax manchak e yetnelej e ba yin junok tzet yetal.

¹²Manchak e locbaj in bi yin e lek'tial. Ta axca tu' che yunej axca tol c'amxac'al yelapnok in bi tu' yul e sat. Ayin ton Jehová in chi wala'.

¹³Man comonok che yetnej e yet animail, cax c'am che yiec' is tzet yetal eb. Manchak e yala', tol ato yet yecal che tojlanej is c'u nak mulnajwom chi mulnaj tinani'.

¹⁴Manchak e yal yobal k'anej yin eb c'am chi je' yabeni, cax manchak e yaay chipbal akanej satak eb c'am chi je' yilwi, palta tol ayokab welapnok yul e sat. Ayin ton Jehová in chi wala'.

¹⁵Manchak e yut man tojolalok, yet che watx'nen el junok k'anej. Manchak e yaoc e ba yetok eb meba', tamwal eb mimek yelapnok. Bayc'al ijan chi yun e watx'nen el yiban eb.

¹⁶Manchak ex alwi k'umal xol eb e yet conob. Manchak e naaj k'anej yin junok e yet animail, yet chi ak'lay camok. Ayin ton Jehová in chi wala'.

¹⁷Manchak chichonbi oc e c'ul yin e yet animail, palta watx' tol che tenchanejc'al cax che yaon oc is nabal, yet watx' c'am chi titcan e yiban yetok.

¹⁸Manchak e pak e ba, tamwal chi ayjic'al ec' e chichonc'ulal yin eb e yet conob, palta tol che ya'ilnej eb, axca wal che yut e ya'ilnen e ba. Ayin ton Jehová in chi wala'.

¹⁹Ikejek juntzan in chekbanil ti'. Manchak e cha ak'lay sakchok e jobbejal no' yuj junokxa no no' tol tx'ok yeli. Manchak e som e yinat che yaw bay e tx'otx'. Manchak e yaoc an pichilej tol soman is tx'alil yetok junokxa makan tx'al.

²⁰Ta ay junok mac chi k'umen junok ix is chekbej junokxa mactxel, cax ayxa pax is trato ix yetok junokxa winak, asan tol c'amto chi bekchaj el ix, ta axca tu' chi ak'lay yowalil bay nak yetok ix, a ton nak max k'umen ix tu'. C'am chi ak'lay cam eb, yujtol manto yetok ba ix.

²¹A nak tu', yowalil chi yitek junok no calnel yin xajanbalil bay satak in cajlobal bay chin chalej in ba e yetok yuj tojlanen is yobtakil.

²²A junok sacerdote ok ak'on cam no' tu' yin xajanbalil yuj is mul nak. Caytu' ok yun tancan el is mul max yaoc tu'.

²³A yet ok ex apnok bay tx'otx' Canaán, cax ok e yawon masanil makanil te awbejal te' tol chi yak' sat, c'amc'al che mitx' junok sat te' tu', c'al e looni yin oxeb abil, yujtol awas yul in sat.

²⁴Axa yet is can abilxa yak'on te sat xin, ak'ek masanil sat te' ayin yin ofrendail yuj e yalon yuj diosalil, yujtol wet yayji oc is sat te' tu'.

²⁵Axa pax yet so' abil xin, e yet-xa yayji oc sat te' tu' yet che lo'. Ta ok e yikej is leyalil ti', yelxac'al ok yak' te' sat. Ayin ton Jehová e Diosal in chi wala'.

²⁶C'am che chi' no chibej tol c'am chi el is chiq'uil. Manchak e yut e ba yin naom el k'anejal tamwal yin ajtxumal.

²⁷Man setanok yayji chi yun tzuklay xil e jolom,*fn* cax manchak e josil xil e ti'.

²⁸Manchak e yak' yasjok e ba yuj cusc'ulal*fn* yuj junok camnak, cax manchak e yaoc yechel junok tzet yetal yin e tz'umal. Ayin ton Jehová in chi wala'.

²⁹Manchak e yiel is q'uixwil e cutz'in, cax che yaon oc yin ajmul ixal bay templo juntzan comon dios, yet watx' c'am chi etax el beybal conob, cax chi etax el e conob yuj ajmulal.

³⁰Yowalil che yikej c'ual xewilal max walcan ayex. Ayokab yelapnok in cajlobal yul e sat. Ayin Jehová in chi wala'.

³¹Manchak ex toj bay eb tz'akan ay is c'ul chi k'umej camnak yaloni, yet watx' manchak e yetnejtok e ba. Ayin Jehová e Diosal in chi wala'.

³²Ajanek wan satak eb icham anima, cax mimanokab yelapnok eb yul e sat. Ayokab c'apax welapnok yul e sat. Ayin ton Jehová in chi wala'.

³³Manchak e yetnej junok tx'ok conobal ayic' e xol.

³⁴Xajan che yut eb, axca tol e yet conob. Ya'ilnejek eb, axca che yut e ya'ilnen e ba. Naektek tol ayex ti' najatil max ex ec' yin tx'ok conobal bay yul conob Egipto. Ayin ton Jehová e Diosal in chi wala'.

³⁵Manchak e yetnej eb anima yin tzet che txono', tz'akanokab e yechbal che yak'balnej, axca e tx'an yet che yechen e tx'otx', ma juntzanokxa echbal che k'ana'.

³⁶A libra, c'al almu tol tz'akan che k'ana'. Ayin Jehová e Diosal in, max quex wieltek bay Egipto chi wala'.

³⁷Yuj wal tu xin, tol che yikej in ley c'al masanil chekbanilej ti'. Ayin ton Jehová in chi wala', ẍi Jehová, cachi bay eb, ẍi Cham.