Read Q'anjob'al Lv 2 Bible Online

Lv 2 - Q'anjob'al bible

Lv 2

¹Ta ay junok mactxel chi yitek ixim harina yin ofrendail bay Jehová, a wal ixim harina caw wal watx' chi yitek; a yiban ixim tu' chi alay ay aceite c'al incienso;

²cax chi yiontek bay eb sacerdote is yinatil Aarón. A junok eb tu' chi ion aj junok betxan ixim harina yetok aceite, c'al yetok masanil incienso, cax chi ak'lay tz'a jun ofrenda tu' yiban altar, yuj tx'oxlayi, tol a masanil ofrenda tu' yet Jehová yayji. Watx' jun ofrenda tu' chi yab Cham.

³Axa janic'okxa jun ofrenda tu' yet Aarón, yetokc'al eb yuninal yayji. Miman yayji ocok, yujtol yetbic'al ba yetok jun ofrenda chi ak'lay tz'a satak Jehová.

⁴A yet chi ak'lay junok ofrenda tol k'anbinak yul horno, aokab ixim harina caw wal watx', c'am yich chi oc xol. Chi je' watx'nelayi, pim chi yunej, sombil yetok aceite; chi je' c'apax yin c'oxoxal c'am yich, cax chi bonlay oc aceite yin.

⁵Ta a jun ofrenda tu', tol maybil yul ẍaltin, harina wal tol caw wal watx' chi ak'layi, sombil yetok aceite, palta c'am yich.

⁶Chi bijlay cojok cax chi alay oc aceite yin, yujtol a jun ofrenda tu' chi ak'lay yin tzet chi loji.

⁷Tatol che yak' junok ofrenda tajnak xol aceite, harina caw wal watx', sombil yetok aceite che yak'a'.

⁸A yet mayal watx'ji el jun ofrenda tu', a ton juntzan tzet yetal tu', cax chi ilaytek bay Jehová, chi ak'lay bay cham sacerdote, axa chi iontek bay altar.

⁹A bay tu' chi yak' tz'a jabok jun ofrenda tu' yuj tx'oxbanilok tol a masanil ofrenda tu', yet Cham yayji ocok. Watx' jun ofrenda tu' chi yab Jehová.

¹⁰Axa janic'okxa jun ofrenda tu', yet Aarón c'al yetok is yinatil. Miman yayji ocok, yujtol yetbic'al ba yetok juntzan ofrenda max ak'lay tz'a satak Jehová.

¹¹A masanil juntzan ofrenda chi ak'lay bay Jehová yin tzet chi loji, c'amc'al chi alay oc yich. C'amc'al yich, tamwal no yalcab chi ak'lay tz'a yin ofrendail satak Cham.

¹²Chi je' yak'lay yich pan, c'al no yalcab yin ofrendail yet chi ak'lay babel sat awoj, palta c'am chi ak'lay tz'a yiban altar yin ofrendail tol watx' chi yab Cham.

¹³A masanil ofrenda chi ak'lay yin tzet chi loji, yowalil chi toj yatz'amil; c'am junok ofrenda tu' tol c'am chi toj yatz'amil, yujtol a' chi tx'oxon el e trato yetok Jehová. Yuj tu' xan masanil ofrenda chi ak'layi, ayokabc'al oc yatz'amil.

¹⁴Ta chi ak'lay junok ofrenda bay Jehová yin babel sat awoj, yowalil tol a jayebok jolom trigo chi k'anbi xol k'ak'ej, yaxto wali cax chi chil-lay elok.

¹⁵A yiban jun ofrenda tu', chi alay oc aceite c'al incienso, yujtol ofrenda yin ixim trigo ma cebada.

¹⁶Axa cham sacerdote chi ak'on tz'a janic'ok ixim tol chilbil el tu', yetok aceite, c'al yetok masanil incienso. A janic' tu' chi tx'oxoni, tol a masanil ofrenda tu' yet Jehová yayji.