Read Q'anjob'al Lv 20 Bible Online

Lv 20 - Q'anjob'al bible

Lv 20

¹Max yalon Jehová bay cham Moisés axca ti':

²Al masanil juntzan ti' bay eb et israelal: Tzanc'al mac ex txel ma tx'ok conobal cajan ec' e xol tol chi yak' junok yuninal yin xajanbalil bay comon dios Moloc, a jun tu' yowalil chi k'oklay cam yuj eb yet conob.

³Ay c'apax wowal yin jun anima tu', cax ok wion el xol yet conob, yuj yetnentok in cajlobal c'al in yintaknen elok, yujtol chi yak' is yuninal yin xajanbalil bay Moloc.

⁴Ta a eb yet conob toc'al chi yilocok, c'am chi mak'cam eb jun mac caytu' chi yun axca tu',

⁵ayin caw ok wak' yowalil bay jun anima tu', bay yetbi, bay yuninal, c'al bay masanil eb cajan yul yatut, cax ok wak'on c'ayil xol is yet conob, yetokc'al eb chi oc ayilal bay Moloc tu' yetok.

⁶Ta ay mactxel chi toj k'anlej is k'umal bay eb tz'akan c'ul yaloni, ma eb chi k'umen camnak, cax chi yiken tzet chi yal eb tu', ok in oc ajc'ulal yin jun anima tu', cax ok in c'ayon elok.

⁷Junelnej che yaoc e ba yul in k'ab, watx'c'al che yut e ba, yujtol ayin Jehová in ti', e Diosal in.

⁸A wal in ley che beybalnej c'al e yikeni, yujtol ayin Jehová in chex waoc wetok.

⁹Tzanc'al mactxel chi baj is mam ma is txutx, a jun tu' yowalil chi cami, yujc'al tol chi baj is mam tu', ma is txutx tu', xan ac'aloc chi yitek is camichal tu' yiban.

¹⁰Ta ay mactxel chi mulji yetok yistzil yet winakil, yowalil chi cam jun winak tu' yetokc'al jun ix tu'.

¹¹Ta ay mactxel chi mulji yetok yistzil is mam, chi yion el q'uixwil is mam tu'. A jun tu' yowalil chi cami, cax chi cam c'apax ix ix tu', ac'aloc eb chi yitek is camichal yiban.

¹²Ta ay mac chi mulji yetok yalib, yowalil chi cam eb cawanil, yujtol yelxac'al yob tzet max yun eb. Ac'aloc eb chi yitek is camichal yiban.

¹³Ta ay mac ay tzet chi yun yetok yet winakil, axca chi yun yetok junok ix ix, yowalil chi cam eb cawanil. Ac'aloc eb chi yitek is camichal yiban, yujtol yajbejtak tzet max yun eb tu'.

¹⁴Ta ay mac chi ion junok ix ix, cax chi yion pax aj is txutx ix tu', caw wal yobxac'al tzet chi yun eb tu', xan a jun winak tu', yetokc'al juntzan ix tu' chi ak'lay tz'aok. Yuj tu', c'amxa bay ok binaj jun beybalej tu' e xol.

¹⁵Ta ay junok winak chi mulji yetok junok no no', a nak tu' yowalil chi cami, cax chi cam c'apax no no' tu'.

¹⁶Ta ay c'apax junok ix ix chi mulji yetok junok no no', a jun ix tu' yowalil chi cami, cax chi cam c'apax jun no' tu'. Ac'aloc chi yitek is camichal yiban.

¹⁷Ta ay junok chi yi' yanab yistzilok, yanab yuj is mam, ma yanab yuj is txutx, ta a eb tu' chi mitx'lej oc ba, a cawan tu', satak wal yet conob chi c'aylay elok, yujtol a mac chi mitx'lej oc ba yetok yanab, yelxac'al q'uixwiltak tzet chi yunej, xan a mac chi yun axca tu', a yuj is mul tu', xan chi tit yiban.

¹⁸Ta ay mac ay tzet chi yun yetok junok ix ix, yet ayoc ix yin is bisbal xajaw, c'am yelapnok tzet chi on ix yul sat, cax bekan c'apax c'ul ix tx'oxon el is yailal tu', yuj tu' xan chi c'aylay el eb cawanil e xol.

¹⁹C'amokabc'al mac chi yun mulej yetok yanab is mam, ma yetok nuej is txutx, yujtol chi yiel q'uixwil mac yicanto ba yetok, ac'aloc eb chi lowcan yiban.

²⁰Ta ay junok mactxel chi mulji yetok yistzil is yican, caw wal chi yiel q'uixwil is yican tu', chi tojcan mulej tu' yiban eb cawan max mulji tu', xan tol c'amtoc'al junok yuninal eb cax ok mak'lay cam eb.

²¹Ta ay junok mactxel chi mulji yetok yistzil yuẍtak, chi yion el q'uixwil yuẍtak tu'. A jun tu' yajbejtak, xan ok cam eb cawan max mulji tu' yin tol c'am yuninal ok yila'.

²²Beybalnejek in ley, c'al e yiken in chekbanil ti'; ikejek masanil xin, yet watx' man ok ex wak' c'aylay el yuj tx'otx' tx'otx' tu', bay ok ex apnok cajanok.

²³Manchak e beybalnej is beybal eb anima ok wiel e satak tu'. A eb tu', chi beybalnej eb masanil juntzan tzet yetal ti', yuj tu' xan c'amxa chi techaj yobtakil eb wuj.

²⁴Ayin wal caw max wak' in ti', tol e yet ok yuncan is tx'otx'al eb tu'; ayin ok wak' e sataknej jun tx'otx' caw wal yax sat tu'. Ayin Jehová e Diosal in, yelxac'al tx'ok e yel wuj, yintak juntzanxa conob.

²⁵Yuj tu' xan yowalil ay is q'uexanil no no' watx', c'al no' man watx'ok yul e sat, c'al xol no tz'iquin watx', c'al no' man watx'ok, xan manchak e yut e ba yin yajbejtakil yujc'al e chion no no' man watx'ok tu', no tz'iquin ma no' chi ec' c'apax bay sat tx'otx' ti', a ton no' max wala', tol man watx'ok yul e sat.

²⁶Palta yowalil watx' che yut e ba in satak, yujtol watx' inc'al ayin ti'. Ayin Jehová in ti' max ex wut yin tol tx'ok e yel yintak juntzanxa conob, yet watx' in conob e yayji ocok.

²⁷Ta ay junok winak ma junok ix ix e xol chi k'umen camnak, a jun tu' yowalil chi k'oklay cam yetok ch'en. A is camichal tu', ac'aloc yiban chi cancanok, ẍi Jehová, cachi, ẍi Cham.