Read Q'anjob'al Lv 22 Bible Online

Lv 22 - Q'anjob'al bible

Lv 22

¹Max k'anjab Jehová bay cham Moisés, max yaloni:

²Al bay Aarón, yetokc'al bay eb is yinatil tol yowalil chi taynej ba eb yetok ofrenda chi yak' eb e yet israelal ayin, yet watx' man yobok chi yun in binaj yuj eb. Ayin wal caw Jehová in chi wala'.

³Al bay eb tol a tinani', c'al yet yajtok tu', tzanc'al mactxel junok yinatil eb tol man watx'ok yayji atac'ala' ley, cax chi yak'on pax juntzan xajanbal chi yak' eb e yet israelal ayin, a jun tu', yowalil chi c'aylay el in satak. Ayin wal caw Jehová in chi wala'.

⁴C'am c'apax junok enatil chi je' loon tzet yetal tol wet yayji ta ay lepra yin, ma ay tzet chi el yin is mimanil, palta atoc'al yet watx'xa yayji atac'ala' yalon ley, catatu' chi je' looni. Man watx'ok chi yuncan junok eb tu', tatol chi mitx' eb junok tzet yetal tol man watx'ok yayji yuj junok camnak, ma xin yuj chi el yinatil yin.

⁵Man watx'ok chi yuncanok tatol chi mitx' junok no no' chi ec' jutxjon sat tx'otx', a ton no' man watx'ok satak ley, ma chi mitx' junok anima tol man watx'ok c'apax yayji ocok yuj tzanc'al tzet yetal.

⁶Ta man watx'ok yayji, c'am chi je' loon junok tzet yetal tol wet yayji ocok, masantac'al yet chi k'ekbi ayok c'al chi achinwi.

⁷Ato yet chi ay c'u, catatu' chi watx'ji elok. Lajwi tu', chixa je' loon eb masanil tzet yetal tol wet yayji ocok yujtol yetc'alta' eb yayji.

⁸C'am chi je' chion eb no chibej tol toc'al chi camajok, ma no' mak'bil cam yuj no chiwajwom no', yet watx' c'am chi can eb yin man watx'ok. Ayin Jehová in chi wala'.

⁹Al bay eb, tol chi yikej eb in chekbanil, yet watx' c'am chi oc mul eb, cax c'am chi cam eb, yuj c'am yelapnok in chekbanil tu' yul sat eb, yujtol ayin Jehová in max in sic'can el eb.

¹⁰Tamwal junok anima c'am yujba yetok eb sacerdote, chi je' loon tzet yetal tol wet yayji ocok. Tamwal eb toc'al ayic' yin posadail bay eb sacerdote, ma eb toc'al chi mulnaj bay eb, c'am chi je' loon eb.

¹¹Ta a junok sacerdote chi man junok is chekbej yetok tumin, a jun chekbej tu', chi je' loon tzet yetal tol wet yayji ocok. Yetok c'apax eb tol yintak jun sacerdote tu' aljinak, a eb tu' chi je' loon eb masanil tzet yetal tol wet yayji ocok.

¹²Ta a is cutz'in junok sacerdote chi yi' junok winak tol tx'ok yel xol eb sacerdote, c'amxa chi je' loon ix juntzan ofrenda tol a bay eb sacerdote tu' chi ak'layi.

¹³Palta tatol camnakxa yichamil, ma xin tol pojlejnak ba yetok yichamil, c'am pax junok yune', xan max meltzoj paxtek cajan yetok is mam tu' junelxa, axcac'alta' yet tol k'opojto, chi je' loon lobej is mam tu' yetok. Axa pax juntzanxa eb tx'ok animail xin, c'am chi je' loon eb is lobej eb sacerdote tu'.

¹⁴Ta ay mac comonc'al chi chion no chibej tol wet yayji tu', yin tol man yojtakok tol wet yayji, yowalil chi yak' is q'uexel jun tu' bay jun sacerdote tu' yetok junokxa yet is so' makan.

¹⁵C'am che cha' chilay yin comonc'al tzet yetal chi yak' eb e yet conob ayin.

¹⁶Ta che cha' chilay yin comonc'al, e yin chi oc is mul mac chi chion juntzan tzet yetal tu', yowalil ok tojlanej, yujtol comonc'al max chi', yujtol wet yayji ocok. Ayin Jehová in chex in sic'can el ti', chi wala', ẍi Jehová, cachi bay eb, ẍi Cham.

¹⁷Max yalon Jehová bay cham Moisés:

¹⁸Al bay Aarón, yetokc'al bay eb is c'ajol, c'al bay masanil eb e yet israelal masanil juntzan ti': Ta ay junok ex, ma eb tx'ok conobal tol cajan ec' e xol, tol chi yak' junok no no' tz'a yin xajanbalil ayin, caxc'al a yuj yak'on bay maxax yak' is ti' yak'oni, ma toc'al chi el yin c'ul yak'oni,

¹⁹yowalil a junok no' c'am jabok is tacnakil chi yak'a' yet watx' chin cha' jun xajanbal tu'. Chi je' a junok no toro, ma junok no icham calnel, ma junok no mam chiwo,

²⁰palta manak junok no no' tol ayoc is yabil. Ta ya'ay no', c'am chin cha' no'.

²¹Tzanc'al mactxel chi yak' junok is xajanbal yet junc'ulalil ayin, caxc'al a yuj yak'on bay max yak' is ti' yak'oni, ma toc'al chi el yin c'ul yak'on xin, yowalil a junok no wacax, ma junok no calnel, ma xin junok no chiwo tol c'am is tacnakil, yet watx' chin cha'.

²²C'am che yak' junok no no' tol ya'ay ayin, axca no yob sat, ma no yasjinak, ma k'ajil, ma elnak junok makan is mimanil, ma ay yaxk'ayil, ma junok yabil yin. A juntzan no' axca tu' c'am chi je' yak'lay tz'a bay waltar.

²³A mac chi el yin c'ul yak'on junok xajanbal ayin, chi je' yak'oni; caxc'al man lajanok tel yakan, palta a pax junok xajanbal tol max yak' is ti' yak'on xin, c'am chin cha' no' axca tu' yayji.

²⁴C'am chi je' yak'lay ayin junok no no' tol capado. Manchak e beybalnej e yak'on capar no' bay e tx'otx'al tu'.

²⁵Tamwal che cha' juntzan no no' axca tu' yayji bay eb tx'ok conobal yet chi oc yin xajanbalil ayin, yujtol man tz'akanok yayji no', c'am chin cha no' axca tu', ẍi Jehová, cachi, ẍi Cham.

²⁶Max yalon Jehová bay cham Moisés:

²⁷A yet chi alji yune' no wacax, ma junok no yune' calnel, ma junok no yune' chiwo, ukeb c'ual yowalil chi can no' yetok is txutx, axa yet is waxak c'ual xin, chixa je' yak'lay tz'a no' yin xajanbalil in satak.

²⁸C'am chi je' junnej c'ual chi yun mak'lay cam junok no txutxej yetokc'al is yune'.

²⁹Ta chi ak'lay junok xajanbal ayin yuj aloj yuj diosal, yunokab yin axca leyalil, yet watx' chin cha'.

³⁰Yetok c'apaxok, che chixac'al no' yet jun c'ual tu', c'am chi je' chi can yet junxa c'ual. Ayin Jehová in chi wala'.

³¹Beybalnejek in chekbanil c'al e yikeni. Ayin Jehová in chi wala'.

³²Manokab yobok chi yun in binaj e yuj, palta tol chin e yi can, yujtol ayin caw max ex in sic'can elok.

³³Max ex wieltek bay Egipto yet chin oc e Diosalok. Ayin Jehová in chi wala', ẍi Jehová.