Read Q'anjob'al Lv 26 Bible Online

Lv 26 - Q'anjob'al bible

Lv 26

¹Max yal c'apax Jehová axca ti': Manchak e watx'nej yechelej e diosalok. Manchak e wabaj aj ch'en chi ali txojal, tamwal ch'en ch'en josbil axca yechelej ayoc yin. C'am chex ay nojan yin ayilal bay, yujtol ayin ton Jehová e Diosal in.

²Mimanokab yelapnok yul e sat jun c'ual xewilal max wal ayex. Mimanokab c'apax yelapnok in cajlobal yul e sat, tol ayin wal caw Jehová in chi wala'.

³Ta ok e beybalnejc'al in ley, cax che yiken in chekbanil,

⁴ok watek nab yin is tiempoal, axa yak'on tx'otx' tx'otx' sat yawojal tu', c'al te te' ok yak' c'apax sat.

⁵Lanantoc'al yoc jooj trigo, tiempoxa pax yoc wajoj uva. Lanantoc'al yoc wajoj uva tu', mayal jay pax tiempo yawlay trigo junelxa, xan ok ex lowok, masantac'al ok yal noj e c'ul. Caw wal ok e yak' tzalojbok e c'ul bay yul e nación.

⁶Caw wal watx'xac'al ok yun e yayji bay yul e nación. Ok ex way yin tol c'am mactxel ok ex xibtenok. Ok ex in colil bay no chiwajwom no', c'al bay owal.

⁷Ok elaj eb ajc'ul oc e yin ayex; yuj e yespada ok ayc'ay eb e satak.

⁸A bay owanok ex, ok elaj 100 eb tu'. A bay junok 100 ex, ok elaj 10,000 eb tu'. A eb ajc'ul tu', ok ayc'ay eb e satak yuj e yespada.

⁹Caw wal yin watx'c'ulalil ok yun ex wilon ocok. Caw wal ok wiaj can e bisil, cax ok ayjokc'al ec' in trato e yetok.

¹⁰Lanantoc'al e loon ixim trigo wajbilcan e yuj yettax junabitok, toltax okto e bescan el ixim yet ok e latz'on pax ixim ac' trigo.

¹¹Ok in cajayc'al ec' e yetok, manc'al ok ex in cabc'ulnej elok.

¹²Cac'al ti' wec'jab e xol. Ayin e Diosal in, axa ex ayex ti' in conob e yayji ocok.

¹³Ayin Jehová e Diosal in chi wala', max ex wieltek bay Egipto, yet watx' c'amc'al chex canc'al can yin mosejal bay eb tu'. Ayin max wiel jun mulnajil manxa yailok ayoc e yiban. Yuj wal tu' xan manxa nojanok ex ayok chex ec'jabi.

¹⁴Tatol man ok e yikej ayin xin, cax man ok e beybalnej in chekbanil,

¹⁵ta ok e yintaknej el in ley ti', cax man ok e yikej juntzan in chekbanil ti', cax ok e yetnentok in trato,

¹⁶ayin ti', ay c'apax tzet ok wun e yetok. Ok watok xiwc'ulal e yiban, c'al owal ilya' tol ok ex cam yuj, c'al k'ak'al ilya' ok tit e yin, c'al yilya'il e bak' sat, cax ok pax yip e mimanil. Nabaxac'al ok ex awwok, yujtol a eb ajc'ul oc e yin ok loontok sat e yawoj tu'.

¹⁷Ayin ok in oc ajc'ulal e yin, cax ok ex ayc'ay yuj eb e yajc'ul tu'. Ok ex can yalan yuj eb. Toxac'al ok ex elajok, caxc'al c'am mactxel chex ukteni.

¹⁸Ta c'amc'al che yikej ayin, caxc'al mayal jayoc juntzan ti' e yiban, miman ok yun yajc'al can e yailal wuj yuj e mul.

¹⁹Ok wak' lajwok ay e maynejbail tu'. Manxa ok yak' nab, ok cawbok el tx'otx' tx'otx'.

²⁰Nabaxac'al ok e yetnej e c'ul e mulnaji, c'amxa tzet ok yak' tx'otx' tx'otx', tamwal okto yak' te te' sat.

²¹Tatol ok e yutc'al e ba tenomtakil ayin, manc'al ok e yikej, miman ok yun yaj can yailal e yiban wuj, atac'ala' jantak yayji oc e mul.

²²Ok watok no chiwajwom no' e xol, cax ok chiontok no' e yuninal, cax ok yak'on lajwok el no' e jobbejal no', axa yaytek e bisil yuj no' tu', xan c'amxa wal mactxel ok ec'jab bay yulak be.

²³Ta manc'al ok jay e nabal yuj masanil juntzan ti', palta tenomtakc'al ok e yut e ba ayin,

²⁴cay in c'apax tu' ayin ti', miman ok yun yaj can e yailal wuj yuj e mul.

²⁵Ok watok owal e yin e yailalok, yuj in paktzen ayex yuj c'am che yikej in trato. Toxac'al ok ex tok lemnaj e colon e ba bay e conobal, palta a bay tu' ok watok owal ilya', caytu' ok yun e yayc'ay yul k'ab eb e yajc'ul.

²⁶A yet ok wion aytek yel e lobej, lajonwan wal eb ix ix, junnej ok watx'nej lobej bay junok k'ak'ej. Yinxac'al yechbalil ok yun yec' e lobej tu' e yin. Ok ex lowok, palta man ok noj e c'ul.

²⁷Ta manc'al ok e yikej ayin yuj juntzan ti', tatol ok e yutc'al e ba tenomtakil,

²⁸ayin ti' c'apaxok, ok wak' yowalil ayex, yetok wal yowal in c'ul, miman ok yun yaj can e yailal wuj yuj e mul.

²⁹Catawal tu' ok e chion aytok e c'ajol c'al e cutz'in.

³⁰Ok wuchtok juntzan lugar bay chex oc ayilal bay e diosal, ok in mak' poj e yaltar yet incienso. Toxac'al ok in wajbaj oc bulan e mimanil bay yiban juntzan e diosal man iquisok tu', yujtol c'amxa chex wochej.

³¹Toxac'al ok wuchcantok e conoblak, c'al nail e diosal tu'. C'amxac'al yopiso sumumial e xajanbal wuj.

³²Ok wak' lajwok ay e nación tu', axa eb ajc'ul ok jaycan oc cajanok. Toxac'al ok c'aycan aj c'ul eb.

³³Cax ok ex wak'on saklemtok xol masanil nacionlak, tol tzakan espada e yintak. A e nación ti', tz'inan tx'otx'xac'al ok yuncanok, xiwc'ulaltakxac'al ok yun yuchajcantok e conoblak.

³⁴Catawal tu' watx'xac'al ok yun cancan tx'otx' tx'oklil yin masanil tiempo yet ayexto ec' bay juntzan nacionlak tol ajc'ul oc e yin tu'. Caywal tu' ok yun xewcan tx'otx', axca tiempoal tol maj xew tx'otx' e yuj yet yalantok, yet cajan ex ec' bay tu'.

³⁶A eb e yinatil iquisto ec' bay is tx'otx'al e yajc'ul tu', tol ok wawal oc junok xiwc'ulal yiban eb. Toxac'al ok elaj lemnaj eb yet ok yaben eb yayc'ay junok xak te'. Toxac'al ok elaj eb axcaxac'al tol ay junok mactxel tzakan oc yintak yetok espada. Toxac'al ok telc'oj eb, tokwal ay pax mactxel tzakan oc yintak eb.

³⁷Toxac'al ok telc'ojtok eb junjun axcaxac'al tol owal ayocok, caxc'al c'am mactxel chi ukten eb. C'amxac'al junok okto tec'baj ba satak eb ajc'ul.

³⁸Ok lajwok ay eb bay xolak juntzan nacionlak tu', axca tol a is tx'otx'al eb ajc'ul tu' ok c'ayon el eb.

³⁹A mac xol e yinatil chito iquisbi can ec' bay yul tx'otx'al e yajc'ul tu', a bay tu' ok camxac'al yujc'al is yobtakil, c'al yuj is mul eb yichmam eb.

⁴⁰A yet mayal in oc ajc'ulal e yin ayex ti', cax mayal ex wacantok bay is conobal eb e yajc'ul yujtol max ex oc yin tenomtakil ayin, ta a yet tu' ok na ba c'ul eb e yinatil bay pit ok yut ba eb ayin, cax ok yion ay ba eb in satak yin yalon ajtek eb is yobtakil c'al e yobtakilal ayex ti',

⁴²cata wal tu' ok in naontek in trato yetok Jacob, yetok Isaac, c'al yetok Abraham, cax ok in naontek yin wak'on pax tx'otx' tx'otx' bay eb.

⁴³Palta a yet yalantok tu' elnak ex bay e conob, cannakcan tz'inan tx'otx', tol chi xew tx'otx' yet c'am ex ec' bay tu', yak'ban tz'akan chi yun e tojlanen el e mul, yuj wal tol max e yintaknej el in ley c'al in chekbanil.

⁴⁴Caxc'al mi axca tu' chex wutej, a yet ayic' eb e yinatil bay tx'otx'al eb yajc'ul eb, man ok wintaknej el eb, tamwal ok wak'xac'al lajwok ay eb. Tamwal ok lajwok ec' in trato max wak' yetok eb yujtol ayin Jehová in, is Diosal in eb.

⁴⁵Axa ok yunej, tol yuj is watx'ilok eb, ok in natek in trato max in watx'nej e yetok yet max ex wion eltek bay Egipto. Satak wal juntzanxa nacionlak max ex wion eltek, yet watx' chin oc e Diosalok. Ayin ton Jehová in chi wala', ẍi Jehová, cachi bay eb, ẍi Cham.

⁴⁶A bay jolom witz Sinaí max yak' Jehová juntzan ley yetok chekbanilej, c'al cuybanilej ti' bay cham Moisés tol yet conob Israel yayji.