Read Q'anjob'al Lv 4 Bible Online

Lv 4 - Q'anjob'al bible

Lv 4

¹Max yalon Jehová bay cham Moisés tol chi yal juntzan chekbanilej ti' bay eb yet israelal, xan max yal cham axca ti':

²Ta ay mac chi oc is mul tol man wal yinok is c'ul chi tita, cax chi yunen tzet yetal tol ay yowalil yuneni, atac'ala' tzet chi yal chekbanil Jehová, yowalil chi yikej masanil juntzan tzet yetal ok waltek ti':

³Ta a cham sat sacerdote chi oc is mul yin yopiso chi yunej, a is mul tu', chi ay c'apax c'ay yiban eb conob; yowalil chi yak' junok no ach'ej wacax c'am wal jabok is tacnakil, yin xajanbalil bay Jehová yuj is mul tu'.

⁴Chi yiontek no' bay satak mantiado bay chi co chalej co ba yetok Cham. A tu' chi yaoc k'ab yiban jolom no', cax chi mak'on cam no' satak Cham.

⁵A wal caw chi iontek jabok is chiq'uil no', chi yiontek bay yul mantiado.

⁶A bay tu' chi yaaytok yiximal k'ab xol chiq'uil no no' tu'. Ukel chi txijay satak Jehová bay satak eltek an cortina ayoc bay lugar tol asan Jehová ay yet.

⁷Chi bonon oc janic'ok is chiq'uil no' yin yuc'a' altar yet incienso ayoc satak Cham bay yul mantiado. Axa masanil chic' chito cancan tu', chi seccan ay bay yakantak altar bay chi ak'lay tz'a xajanbal, a ton jun ayay bay satak mantiado.

⁸Chi lajwi tu' cax chi ilay el masanil sebo yin yulc'ul no',

⁹yetok cab yubal no', yetok seboal, yetokc'al masanil seboal bakil yichin no', c'al yin tx'ix no',

¹⁰axca wal chi yun yilay el yin no wacax chi ak'lay yin xajanbalil yet junc'ulalil. Chi lajwi tu', cax chi ak'lay tz'a yiban altar.

¹¹Axa is tz'umal no' tu', yetok is chibejal, is jolom, is xub no' yetok no yakanej, yetok masanil yulc'ul no', c'al masanil tza' no',

¹²chi yal elapnok masanil no xajanbal tu', chi ilay eltok bay junok lugar tol watx' yayji bay yineltok campamento, a ton bay chi seclayc'alta' eltok tan. A bay tu' chi ak'lay tz'a no' yiban si'.

¹³Ta co masanil ayon conob Israel on ti' chi oc co faltail yin tol man yinok co c'ul chi tita, c'am pax junok on chi jiltek tzet chi junej, tol man axcaok yalon chekbanil Jehová, xan chi oc co mulok.

¹⁴A yet ok jilontek co ba tol max oc co mul, yowalil chi jak' junok no ach'ej wacax yuj co mul co masanil, yin xajanbalil yuj yak'lay tan co mul jiban. A bay satak mantiado, a tu' chi jitek.

¹⁵A bay tu' chi yaoc eb yicham winakil conob k'ab yiban jolom no', cax chi ak'lay cam no' satak Jehová.

¹⁶Axa cham sat sacerdote chi iontek janic'ok is chiq'uil no' tu' bay yul mantiado,

¹⁷chi laaytok yiximal k'ab xol chiq'uil no' tu', cax chi txijon ay ukel satak Cham bay satak eltek an cortina.

¹⁸Chi bonon oc jun sacerdote tu' janic'ok chiq'uil no' yin yuc'a' altar ayic' satak Cham bay yul mantiado tu'. Axa jantakto chiq'uil no' chito can xin, chi seclaycan ay bay yakantak altar bay chi ak'lay tz'a xajanbal, a ton jun ay bay satak mantiado tu'.

¹⁹Chi lajwi tu' cax chi ilay el masanil is seboal no xajanbal tu', cax chi ak'lay tz'a bay yiban altar.

²⁰Chi yal elapnok, tol chi utlay jun xajanbal tu' axca wal chi yun no xajanbal mayal binaji. Caytu' chi yut watx'nen cham sacerdote tu' xajanbal yuj tancan el co mul jiban ayon ti'.

²¹Chi lajwi tu' cax chi ilay eltok no xajanbal tu' bay yineltok campamento. A bay tu' chi ak'lay tz'aok, axca wal max utlay no' mayal binaji, yujtol a jun xajanbal tu' chi yak'lay yuj yak'lay tan co mul.

²²Ta a junok eb yajaw yayji, chi oc is mul yuj tenon junok chekbanil Jehová co Diosal, a jun tu' chi oc is mulok, caxc'al man yinok is c'ul chi tita.

²³Axa yet chi nachaj el yuj tol max oc is mul, yowalil chi yitek junok no mam chiwo tol c'am wal jabok is tacnakil.

²⁴Chi yaoc k'ab yiban no chiwo tu', cax chi yak'on cam satak Jehová, a ton bay chi mak'layc'alta' cam no no' chi ak'lay tz'a yin xajanbalil, yujtol xajanbal yuj mulej yayji.

²⁵Chi lajwi tu' cax chi yiontek jun sacerdote janic'ok chiq'uil no no' tu', cax chi bonon oc yin yuc'a' altar bay chi tz'ac'alta' xajanbal, axa jantakto chiq'uil no' chito cani, chi seccan ay bay yakantak altar.

²⁶Chi ak'lay tz'a masanil is seboal no' bay yiban altar, axca wal chi yun xajanbal chi ak'lay yuj junc'ulalil. Axca tu' chi yut watx'nen jun sacerdote jun xajanbal tu' yuj yak'lay tan mul jun yajaw conob tu'.

²⁷Ta a junok anima c'am yikbej chi oc is mul, tol man yinok is c'ul chi tita, yin yunen tzet yetal tol man cayok tu' yalon chekbanil Jehová,

²⁸a yet chi nachaj el yuj, tol mayal oc is mul tu', yowalil chi yitek junok no txutx chiwo tol c'amwal jabok is tacnakil, yin xajanbalil yuj is mul max oc tu'.

²⁹Yowalil chi yaoc is k'ab yiban jolom no', cax chi mak'on cam no' bay chi mak'layc'alta' cam no no' chi ak'lay tz'a yin xajanbalil.

³⁰Axa jun sacerdote chi yitek chiq'uil no xajanbal tu', cax chi bonon oc yin yuc'a' altar bay chi tz'a xajanbal, axa jantakto chic' chi cani, chi seccan ay bay yakantak altar tu'.

³¹Chi lajwi tu' cax chi ilay el masanil is seboal no xajanbal tu', axca wal chi yun yilay el yet no xajanbal chi ak'lay yuj junc'ulalil. Chi ak'lay tz'a satak Jehová yin xajanbalil tol watx' chi yab Cham. Axca tu' chi yut watx'nen cham sacerdote jun xajanbal tu' yuj yak'lay tan is mul jun anima tu'.

³²Ta calnel chi yitek jun mac chi ak'on jun xajanbal tu', a junok no txutxej tol c'am jabok is tacnakil chi yitek.

³³Yowalil chi yaoc k'ab yiban no calnel tu', cax chi mak'on cam bay chi ak'layc'alta' cam no no' chi ak'lay tz'aok.

³⁴Axa cham sacerdote chi iontek chiq'uil no', cax chi bonon oc yin yuc'a' altar, bay chi tz'a xajanbal, axa jantakto chiq'uil no' chito can xin, a tu' chi seclaycan ay bay yakantak altar.

³⁵Chi lajwi tu', cax chi ilay el masanil is seboal no xajanbal tu', axca wal chi yun yilay el yet no' chi ak'lay yin xajanbalil yuj junc'ulalil, cax chi ak'lay tz'a seboal no' bay yiban altar, yiban juntzanxa xajanbal tol chi ak'layc'alta' tz'a satak Jehová. Axca tu' chi yut watx'nen jun sacerdote jun xajanbal tu' yuj yak'lay tan is mul jun anima tu'.