Read Q'anjob'al Lv 5 Bible Online

Lv 5 - Q'anjob'al bible

Lv 5

¹Ta ay junok mactxel chi awtelay yuj yaloni ma yak'on testigoal ba yin junok tzet max yila' ma max yabej, cax c'am chi yal paxok, a jun tu' chi oc is mulok.

²Ta ay junok mac chi tenoc ba yin junok tzet yetal tol man watx'ok atac'ala' yalon ley, chi oc is mulok. Ta chi tenoc ba yin is mimanil junok camnak no' caxc'al xolakteal no', ma jobbejal no', ma junok no' chi ec' jutxutxok, a junok mactxel axca tu' chi yunej, man watx'ok chi yuncanok, chi occan is mulok, caxc'al c'amto chi yiltek ba.

³Ta ay mac chi mitx'on junok tzet yetal chi el yin anima, junok tzet yetal tol man watx'ok chi yuncan yuj, atac'ala' yalon ley, palta c'am chi yiltek ba yet jun bek tu', axa yet chi yilontek ba xin, cax chi occan is mulok.

⁴Ta ay junok mac chi yak' is ti' yin junok k'anej yin aymanil, yin tzanc'al tzet yetal, a ton junok bay chi yak' is ti' yin, tol c'am chi cam naoni; ta c'am chi yak' yunej, axa yet mayal yojtaknej elok, catatu' chi occan is mulok.

⁵A mactxel chi oc is mul yin junok juntzan tzet yetal ti', yowalil chi chaoc is mulok,

⁶cax chi yak'on yin xajanbalil yuj is mul max yaoc tu' junok no txutx calnel, ma junok txutx chiwo. A yuj jun xajanbal ok watx'nej junok sacerdote tu', ok tancan el is mul jun anima tu'.

⁷Ta c'am is tumin yet chi man junok calnel, ma junok chiwo, yowalil chi yitek cac'onok no jobbejal paloma tzanc'al tzet makanil, satak Jehová yuj is mul max oc tu', junok no' yuj mulej tu', junokxa no' chi ak'lay tz'a masanil yin xajanbalil.

⁸Babel chi yak' tz'a cham sacerdote no' chi ak'lay yuj mulej, toc'al chi tx'umlay el is nuk' no', palta c'am chi ilayxac'al el junelnej.

⁹Chi lajwi tu xin, cax chi bonlay oc janic'ok chiq'uil no' bay yin tz'eyil altar, axa jantakto chiq'uil no' chito cani, chi occan bay yakantak altar, yujtol xajanbal yuj mulej yayji.

¹⁰Axa junxa no tz'iquin yet is cab tu xin, tol chi ak'lay tz'aok, atac'ala' leyal. Axca tu' chi yut watx'nen cham sacerdote xajanbal yuj tancan el mul jun anima tu'.

¹¹Ta c'am is tumin yet chi man cac'onok jobbejal paloma, tzanc'al tzet makanil, yowalil chi yitek canebok libra harina caw wal watx', c'am chi alay oc aceite xol, tamwal chi oc incienso yiban, yujtol ofrenda yuj mulej yayji.

¹²Yowalil chi yitek bay cham sacerdote, axa cham tu' chi iontek junok betxan harina tu' yet chi tz'a yiban altar, yuj tx'oxon elok tol masanil jun ofrenda tu', yet Jehová yayji ocok; chi ak'lay tz'a bay altar bay yiban juntzanxa ofrenda lanan tz'a satak Cham. A jun ofrenda tu' yuj mulej, xan chi ak'layi.

¹³Axca tu' chi yut watx'nen junok sacerdote jun xajanbal tu' yuj tancan el is mul jun anima tu'. A jantakto chi cani, chi yican cham sacerdote tu', axca chi yun yetok juntzan loj chi ak'lay yin ofrendail, ẍi Moisés.

¹⁴Max cheklay yal Moisés yuj Jehová axca ti':

¹⁵Ta ay mactxel tol man yinok c'ul chi tita cax chi yaon oc is mul, ta c'am chi yak' tzet yetal tol yetc'alta' Jehová yayji, a jun tu' yowalil chi yitek junok no icham calnel, ma junok no mam chiwo tol c'am is tacnakil, yin xajanbalil yuj tojlanelay mulej tu'. A jun tu' chi yitek bay Cham, yowalil chi nalayi jantak tojol no' yin ch'en plata, axcac'al ch'en chi k'anlay bay cajlobal Dios.

¹⁶A jun anima tu' yowalil chi tojlanej tzet yetal tol yetc'alta' Jehová yayji maj yitek tu', cax chi yak'on junok yet is so' makan yiban tojol tu', cax chi ak'lay bay cham sacerdote masanil yetok no calnel chi ak'lay yin xajanbalil yuj mulej tu'. Axca tu' chi yut watx'nen jun sacerdote xajanbal yuj tancan el is mul jun anima tu'.

¹⁷Ta ay junok mac chi oc is mul yin chekbanilej max yak' Jehová, caxc'al man yinok c'ul chi tita, a jun tu' ayxa oc is mulok.

¹⁸Yuj tu' xan chi yitek junok xajanbal bay junok eb sacerdote yuj tojlanen is mul. Chi yitek junok no icham calnel ma junok no mam chiwo tol c'am jabok is tacnakil. A cham sacerdote tu' chi naoni ta k'okbil chi yab is tojol no' tu' yin axca wal tojol tzet ok tojlanelay tu', ac'ala' ok aon oc jun xajanbal tu'. Caytu' chi yun tancan el is mul max oc yin tol man yinok c'ul max tita.

¹⁹A ton xajanbal yuj tojlanelay mulej tu', yujtol a jun anima tu' ay is mul satak Jehová, ẍi Moisés.