Read Q'anjob'al Lv 6 Bible Online

Lv 6 - Q'anjob'al bible

Lv 6

¹Max cheklay yal Moisés yuj Jehová axca ti':

²Ta ay junok mac chi oc is mul satak Jehová, yin yetnen yet animail yin junok tzet yetal chi can abenal bay, ma chi yelk'anej junok tzet yetal, ma xin, toc'al chi yiec' yin etnewomal;

³yetok c'apaxok, ta chi sic' junok tzet yetal cax chi tec'ban ba yaloni tol c'am tzet chi yila', ma yin junokxa yobtakil chi yun eb anima axca juntzan ti', yowalil chi yak' junok is xajanbal.

⁴A yet chi ilchajtek tol ay is mul yin junok juntzan ti', yowalil chi yak' meltzoj is tojol bay mac ay yet, cax chi yak'on c'apax junokxa yet is so' makan yetok, bay mac ay yet. Chi yak'on c'apax junok is xajanbal bay Jehová yuj is mul chi oc tu'.

⁶A is xajanbal chi yak' tu', a ton junok is calnel ma junok no chiwo tol c'am jabok is tacnakilal. A bay junok sacerdote chi yitek, axa chi nabalnen el is tojol axca wal is mojalil.

⁷Xan a cham sacerdote chi aon oc jun xajanbal tu' satak Jehová yuj mul junok anima max oc tu'; axa jun mulej tu' chi tancan el yiban, ẍi Moisés.

⁸Max cheklay yal Moisés yuj Jehová axca ti':

⁹Al bay Aarón yetokc'al bay eb is c'ajol yin tzet chi yun yak'lay xajanbal tol chi tz'a'i. A no no' chi ak'lay tz'a masanil yin xajanbalil, yowalil chi cancan no' yiban tzak'ak' masanil ak'bal yet watx' chi tz'atok.

¹⁰Axa yet junxa k'inibalil, yowalil chi yaoc junok eb sacerdote is pichil caw wal watx', c'al is calzoncillo tol lino; chi lajwi tu', cax chi wajon aj is tanil no no' max ak'lay tz'a yiban altar tu', cax chi yaon ay bay junok tz'eyil altar.

¹¹Chi lajwi tu xin, cax chi q'uexon el is pichil tu', axa toj yak'oncan tanil no xajanbal tu' bay jun lugar tol watx' yayji bay yinel campamento.

¹²A jun k'ak' ayoc yiban jun altar tu', c'am yechel chi tani, yowalil chi alay oc te si' yuj eb sacerdote junjun k'inibalil; a ton yiban k'ak'ej tu' chi alay ajtok no xajanbal tz'aok. A tu' chi tz'a c'apax seboal no xajanbal yet junc'ulalil.

¹³A jun k'ak' tu' iquisc'al masanil tiempo, c'am yechel chi tani.

¹⁴A juntzanxa chekbanilej chi al-lay ti', a ton yin tzet chi yun yak'lay ofrenda yin tzet chi loji: A eb sacerdote chi ak'on bay Jehová bay satak altar,

¹⁵cax chi yiontek junok betxan harina yetok aceite, junejc'al chi yun toj yetok masanil incienso yet ofrenda tu', cax chi tz'a janic' tu' bay chi tz'ac'alta' ofrenda, yuj tx'oxoni tol a masanil ofrenda tu' yet Jehová yayji, caw wal watx' chi yabej.

¹⁶Axa jantakto ofrenda chi cani, chi watx'nelay yin c'am yich ayocok, chi je' chi lo' cham sacerdote yetok eb is c'ajol bay junok lugar tol yet Jehová yayji ocok, a ton bay yamak'il mantiado bay chi co chalej co ba yetok Cham.

¹⁷A yin juntzan ofrenda tol yet Jehová yayji, tol chi ak'lay tz'aok, mayal yak' Cham janic' tu' bay eb. A jun tu' yet Cham yayji ocok, axca yayji xajanbal yuj yak'lay tan mulej, c'al xajanbal yuj tojlanelay mulej.

¹⁸A jun tu' ok yunc'al yin tojbalk'inal. A ofrenda tol yet Jehová yayji ocok, chi ak'lay tz'aok, chi je'c'alta' loon masanil eb winak yin yinatil Aarón. Tzanc'al tzet yetal chi oc tennaj yin juntzan ofrenda tu', yet Jehová chi yuncanok, ẍi Moisés.

¹⁹Max cheklay yal Moisés yuj Jehová axca ti':

²⁰A ton jun ofrenda ti' yowalil chi yak' Aarón yetok eb is yinatil bay Jehová, yet c'ual chi sic'laycan oc eb yin sacerdoteal; caneb libra harina caw wal watx', tutun tol ofrenda chi ak'lay yin tzet chi loji. Nan chi ak'lay yet k'inibalil, axa nanxa xin, a yet yayc'ualil chi ak'lay yet jun c'u tu'.

²¹A yul junok ẍaltin chi watx'ji jun ofrenda tu', watx' chi yun k'anbi xol aceite, chi lajwi tu' chi pojlay ayok, cax chi ak'lay yin ofrendail caw wal watx' chi yab Jehová.

²²Caytu' ok yut watx'nenc'al junjun yinatil Aarón ok occ'alta' is q'uexelok yin sat sacerdoteal; yetc'alta' Jehová yayji jun ofrenda tu', xan chi ak'lay tz'a masanil satak Cham.

²³Masanil ofrenda chi yak' eb sacerdote yin tzet chi loji, yowalil chi ak'lay tz'a masanil. C'am junok mactxel chi je' looni, ẍi Moisés.

²⁴Max k'anjab Jehová bay cham Moisés, max yaloni:

²⁵Al masanil juntzan cuybanilej ti' bay Aarón, yetokc'al bay eb is c'ajol, yuj tzet chi yun yak'lay tz'a xajanbal yuj yak'lay tan mulej: A junok no xajanbal chi ak'lay yuj mulej tu', yowalil chi ak'lay cam no' satak Jehová, bay jun lugar bay chi mak'layc'alta' cam no' yet chi ak'lay tz'aok; a jun xajanbal tu' tol yet Cham yayji.

²⁶A cham sacerdote chi ak'on junok xajanbal yuj yak'lay tan mulej tu', chi je' chioni, bay jun lugar tol yet Jehová yayji ocok, a ton bay yamak'il mantiado bay chi co chalej co ba yetok Cham.

²⁷Tzanc'al tzet yetal chi oc tennaj yin no chibej tu', yet Jehová chi yuncanok. Ta chi oc txijnaj chiq'uil no' yin pichilej, yowalil chi tx'ajlay el bay junok lugar tol yet Cham yayji ocok.

²⁸Ac'ala' tx'otx' xij bay chi txiclay no xajanbal tu', yowalil chi mak'lay pojok, palta ta a yul junok xij bronce chi txiclay xin, asan tol chi niklay el is tz'ilal, cax watx' chi yun tx'ajlayi.

²⁹A jun xajanbal ti' yet Jehová yayji. Tzanc'al mac winakil cajan ec' yetok junok sacerdote yul yatut chi je' chioni.

³⁰Palta tatol chi ilaytek is chiq'uil bay yul mantiado, bay jun lugar tol yet Jehová yayji, yuj yak'lay tan mulej, c'am chi je' chilay no'. A jun xajanbal tu' yowalil tol chi ak'lay tz'a masanil.