Read Q'anjob'al Jer 1 Bible Online

Jer 1 - Q'anjob'al bible

Jer 1

¹A bay jun libro ti', a tu' tz'ibbilcan tzet max yal cham Jeremías, is c'ajol Hilcías, yinatil eb sacerdote cajan bay conob Anatot, bay yul is makbej tx'otx' yet Benjamín.

²A yet 13 abilxa yoc cham Josías c'ajol Amón yin reyal bay Judá, a yet tu' max chaon el yich k'anjab Jehová bay cham Jeremías.

³Max k'anjab yetok, yet ayoc Joacim is c'ajol Josías yin reyal, masantac'al yet 11 abilxa yoc Sedequías yin reyal, is c'ajol Josías c'apaxok. A ton yet oyebxa xajaw waay jun abil tu', axa masanil eb cajyom bay Jerusalén max ilaytok eb yin presoal bay Babilonia.

⁴Max k'anjab Jehová ayin Jeremías in ti', max yalon axca ti':

⁵Sic'bil achxa el wuj yet c'amto chach wak' pitzc'oj yin a txutx; pojbil achxa el wuj yet c'amto chach alji, tol sic'bil ach el wuj yin in chekbejok xolak nación, ẍi Jehová.

⁶Cax max in tak'wi bay: Caw unin ach'ej into Mamin Jehová Wajawil. C'amto chi nachaj tzet chi wut k'anjab el in ba, quin chi.

⁷Max yalon pax Jehová ayin: Manchak al tol unin ach'ej achto. Asan tol ok ach tok bay ok ach in chektok, cax ok alon tzet yetal ok in chek ala'.

⁸C'amc'al chach xiw bay eb et animail. Ayin Jehová in chi wala' tol ayinc'al oc etok, cax ok ach in colc'al, ẍi Cham.

⁹Yuj tu xin, max yatek Jehová is k'ab yin in ti', max yalon ayin:

¹⁰A ton wal tinani' chi waoc in k'anej yin a ti'. Chi wak' ikbej ayach yiban conoblak c'al yiban nacionlak, yin a c'ayon elok, yin ochon ayok, c'al ak'on lajwok, yin a tz'unun ayok c'al yin a watx'nen ajok, ẍi Cham.

¹¹Max k'anjab Jehová ayin, max yaloni: ¿Tzet yetal chel tu' Jeremías? ẍi Cham ayin. A jun k'ab te almendro, quin chi.

¹²Yel chala'. Ayin chi wilc'al*fn* tol ok yunc'al tzet chi wala', ẍi Cham.

¹³Max yalon pax Jehová ayin yin yet is cayelal: ¿Tzet yetal chel tu'? ẍi ayin. A jun xij chi uki chi wila', tol t'inan chi pultek bay norte, quin chi bay.

¹⁴Max yalon pax Jehová ayin: A bay norte tu', a tu' ok tit yatakilal bay yiban masanil eb cajyom cayti'.

¹⁵Ayin wal caw chi wal ayach, tol ok wawtejtek nacionlak bay norte, ok jayoc is reyalil, cax ok watx'nen ay eb is trono bay puertail Jerusalén. Ok oymoj eb yinlak conob Jerusalén ti' c'al yinlak masanil conoblak bay makbej Judá.

¹⁶A ton jun yailal ti' ok waoc yiban in conob yuj max quin is bekcan eb, yujtol max oc eb yin ayilal, c'al yak'on tz'a eb incienso bay comon dios tol a wal caw eb max watx'nen ajok.

¹⁷Ak' ep xin, cax tec'baj a ba, cax chi toj alon masanil tzet yetal ok in chek ala'. Manchak ach xiw bay eb et animail. Tatol ok ach xiwok, ayin ok ach wak'xac'al xiwaj satak eb.

¹⁸Ayin chach wacan oc tinani' axca junok conob tol tec'an, axca oy tol hierro, axca muralla tol bronce, yet watx' ok a tec'baj a ba satak nación Judá, c'al satak eb rey, eb yajaw, eb sacerdote, c'al satak masanil conob.

¹⁹Ok yak' eb tu' owal etok, palta ayin wal caw Jehová in chi wala' tol man ok ach ayc'ay yuj eb, yujtol ayinc'al oc etok yin ach in colon elok, ẍi Cham.