Read Q'anjob'al Jer 12 Bible Online

Jer 12 - Q'anjob'al bible

Jer 12

¹Mamin, tatol chin aoc yin teyelejbail etok, ach ti' toc'alta' jichan yayji oc tzet chala'. A ti' wet ayin ti', tol chi wochej chin k'anlej juntzan tzet yetal ayach. ¿Tzet yuj xan tol caw wal watx'c'al chi yun beytok eb yobtakwom? ¿Tzet yuj xan yinc'al tzalojc'ulal ay eb tol asan yobtakil chi na'?

²Ach max a tz'un eb, watx'c'al chi yun yion eb yip. Chi ch'ibaj eb, cax chi aj can bisil eb. Toc'al chach yak'c'al binaj eb, palta wal yin is nabal eb xin, caw wal najat ayach elok.

³Palta ach ti' Mamin Jehová, ojtak in. Ojtak tzetbil yayji oc in nabal en. Itok juntzan anima tu', axca chi yun yilaytok no calnel bay chi mak'lay camok. Cha pojcan el eb, yet watx' ok cam eb yet jun c'ual yet ok mak'lay cam anima.

⁴¿Jantakto tiempoal okto takc'al aj tx'otx' tx'otx' ti', c'al lajwi ay an ac'un bay lobal no no'? A no no', c'al no tz'iquin lanan camaj no' yujc'al is yobtakilal eb anima cajan bay jun nación ti'. Chi na' eb tol man ok wil tzet ok jayoc yiban eb, quin chi bay Dios.

⁵Max yal Jehová ayin: Tatol c'am chach tzakay ak'on anej yetok eb chi beyi, ¿tzet wal ok yun a lajlen a bey yetok eb tol yiban chej ay ajok? Tatol chach telc'oj bay ac'al watx' yeq'ui, ¿tzetto wal ok yun ec' xolak pimal ac'un bay tilak a' Jordán?

⁶Toltax a eb oẍtak, yetokc'al eb ecan, ajc'ulxa oc eb en, chi awji eb entak, axca eb uktem no'. Caxc'al watx'xac'al chi yut k'anjab ba eb ayach, c'am jabok chaoc eb yipok a c'ul, ẍi Cham ayin.

⁷Max yal c'apax Jehová: Mayal in bekcan jun in conob ti', a jun wet yayji, mayal wintaknejcan elok. Mayal waoc in conob camc'ulnebil wuj, yul k'ab eb ajc'ul.

⁸A jun conob tol wettac'a' yayji ti', a yul in sat lajan wal axca junok no coj bay xolak mimek k'aktelak, caw wal chi el yaw win, yuj tu' xan chin yajcan elok.

⁹A in conob ti', lajan wal axca junok no tx'acbaj tx'ok yili, tol chi mak'lay cam yuj juntzanxa yet tx'acbajil. Titokab masanil no xolakil teal no', ul chion jabok yet.

¹⁰Xiwil eb yilomal eb tx'ok conobal max ak'on lajwok in conob axca tol max yak' lajwok ay eb an wuva awbil wuj. Max tec'tok eb bay chi oc in mulnajil. A tx'otx' tx'otx' ochebil wuj, tz'inan tx'otx'xac'al max yuncan yuj eb.

¹¹Tz'ininixac'al max yuncan in conob yuj eb, caw wal chi cus chi wila'. Masanil jun nación ti', tz'ininixac'al max yuncanok. Tok ayto mactxel chi naoni.

¹²Masanilxac'al bay tzalanlak bay tz'inan tx'otx', max jayoc eb winak yak'on c'ayilok, yujtol ayin Jehová in ti', ay jun wespada. A' chi ak'on lajwok ay jun nación ti' bay is lajubal bay jun pac' ti', masantac'al bay is lajubal jun pac'xa. C'amxa bay ay junc'ulal.

¹³Max yaw eb in conob trigo, axac'al q'uix max aji. Nabaxac'al max mulnaj eb. Max lajwi ay is yawoj eb, q'uixwiltakxac'al eb yuj jabjab sat yawoj chi wajajok, yujc'al wal yowal in c'ul yin eb, ẍi Cham.

¹⁴Axca wal ti' chi yun yalon Jehová yin juntzan nacionlak caw wal yob bay cawilal Israel, tol max yiec' eb tx'otx' tx'otx' max yak' Cham sataknej Israel is conob: Ayin ok wiel eb bay is tx'otx'al; axa eb aj Judá ok wican el yul k'ab eb.

¹⁵Axa yet mayal lajwi in c'ayon el eb tu xin, catatu' ok in yabenc'ulnen eb junelxa, axa wak'on meltzoj pax eb bay is tx'otx'al, c'al bay is nación junelxa.

¹⁶Yujtol a juntzan conob tu' max cuyon in conob yin locban bi Baal yin tzet chi yala'. Axa yet ok beyc'altok ti', ok je' yayji eb bay xol in conob, tatol wal yel ok yikej eb cuybej in conob, cax ok locban eb in bi yin tzet ok yal eb.

¹⁷Axa pax junok nación tol c'am chi yikej bay tzet chi wal xin, ayin wal Jehová in chi wala', tol ok wocwal ajok, cax ok wak'on c'ayilok, ẍi Cham.