Read Q'anjob'al Jer 13 Bible Online

Jer 13 - Q'anjob'al bible

Jer 13

¹Max yalon Jehová ayin axca ti': Asi', cax cha manon junok a miman c'alil tol lino, cax chaon oc en yet manto tx'ajlayok, ẍi Cham.

²Max in man jun c'alilej tu' axca yalon Jehová, max waon oc yin in nan.

³Lajwi tu' max yalon pax Cham ayin junelxa:

⁴Itok jun a c'alil max a man ayoc oj tu', chach toj bay a' aej Éufrates. A bay tu' cha c'ubaj elok, bay yul is pojilal junok ch'en miman ch'en, ẍi Cham.

⁵Max in toj bay a' miman aej tu xin, max in c'uban el jun c'alilej tu', axca wal max yun yalon Cham ayin.

⁶Mimanxa tiempoal max eq'uel xin, max yalon pax Jehová ayin axca ti': Asi' bay a' aej Éufrates, chi toj eontek jun c'alilej max wal ayach tol cha c'ubaj el bay tu', ẍi Cham.

⁷Max in toj bay a' aej tu xin, max in sayic' bay aycan jun c'alilej tu' wuj, max wion eltek bay c'uancan el wuj tu', palta mayal k'atok, c'amxa tzet chi oqui.

⁸Max k'anjab pax Jehová junelxa ayin,

⁹max yaloni: Caywal ti' ok yun in c'ayon el is mimanbilal Judá c'al Jerusalén.

¹⁰A jun conob yelxac'al yob ti', caw wal c'am chi yal c'ul chi yikej in chekbanil; asanc'al tzet chi cha c'ul chi yunej. Max tzakloj yintak juntzanxa comon dios, yin yak'on serbil, c'al yoc yin ayilal bay. Lajan wal eb axca jun c'alilej c'amxa yopiso tu'.

¹¹Axca wal junok mac chi c'aloc junok c'alilej yin is nan, caywal tu' max wun yetok conob Israel, c'al yetok conob Judá, caw wal junnej yayji eb wetok, tol in conob yayji eb, yet chi yak'on eb ojtaknelay elok tol miman welapnok. Palta caw wal maj yikej eb tzet chi wala', ẍi Cham.

¹²Al c'apax bay eb conob axca ti': A Jehová co Diosal chi aloni: Junjun netal vino, moj chi ak'lay noj yuj vino, cachi. A eb et israelal ok alon ayach: Tokwal man jojtakok tol junjunc'alta' netal vino moj chi ak'lay noj yuj vino, ẍi mi eb.

¹³Axa a tak'wi bay eb tu': A Jehová chi alon axca ti': Ok wak' c'ay c'ul masanil eb cajyom bay jun nación ti' yuj yowal in c'ul, axca wal chi yun c'ay c'ul mac tol miman vino chi yuq'uej: eb rey yinatil David, eb sacerdote, eb chi yaloc ba in chekbejok, c'al yetok masanil eb cajan bay Jerusalén.

¹⁴Ok in mak' poj eb axca chi yun mak'len poj ba netal vino yet ay mac chi tenoni. Lajanxac'al ok yut ba eb mamej yetok eb c'ajolej. Ayin wal caw Jehová in chi wala', tol ok wak' lajwok ay eb yin c'am yabenc'ulalil, tamwal yin cusc'ulalil, ẍi Jehová, cachi, ẍi Cham.

¹⁵¡Ex israel, mayal yal Jehová ayex! Manchak e mimanej e ba, taynejek wal e yabej.

¹⁶Iek aj can Jehová co Diosal yak'ban tol c'amto chex telc'oj aj yinlak tzalan, xol jun k'ekk'inal ok jayoc yuj Cham. Che na' tol ok jay sakk'inal, palta tol ok tec'al aj can k'ekk'olil yuj.

¹⁷Tatol man ok e cha e yabej, ok in ok' wal yin ewantakil yuj e mimanbail tu'. Caw wal ok eltek yal in sat, yujtol ok ex ilaytok yin presoal, ẍi Jeremías.

¹⁸Max yal Jehová bay Jeremías: Al bay a reyal, c'al bay is txutx: Ayanektek bay e trono cax chex ay chotan bay sat tx'otx', yujtol ok ilay el e corona manxa watx'ilok yin e jolom.

¹⁹Ok oylay aj conoblak bay Néguev; c'amxa mac ok je' jakon oc ba bay tu'. Eb aj Judá ok ilaytok eb preso; ok tok eb masanil.

²⁰Ilek wal tit eb ajc'ul bay norte. ¿Baytal ay jun bulan eb in conob tol ayin max waoc yul a k'ab a tayneni? A ton jun bulan eb tu', ay wal oc a mimanbilalok, ẍi Jehová, cachi bay eb, ẍi Cham.

²¹Max yal Jehová: ¿Tzet ok e yal tinani' ex aj Jerusalén, yet ok yajawbok juntzan anima e yiban, a ton juntzan eb max e sayoc e watx'il animaok? Ok jay wal oc yailal e yiban axca wal chi yun jayoc yailal yiban junok ix ix tol lanan watx'ji c'ul yuj unin.

²²Tatol che k'anlej tzet yuj xan chi jayoc jun ti' e yiban, yowalil tol che yojtaknej elok jantak wal yayji oc e mul, yuj tu' xan toxac'al chex t'irbanelay elok c'al e yetaxi.

²³Tokwal chi je' q'uexon ba yili junok k'ek yin. Tokwal chi je' q'uexon el no tz'ibcoj is tz'ibil. Cay ex tu' ayex ti', tol k'aynak ex e yunen yobtakil, c'amxa chi je' e yunen watx'ilal.

²⁴Yuj tu' xan ayin wal caw Jehová in chi wala' tol ok ex in saklemnejtok, axca chi yun yilay bey matz'il trigo yuj cak'ek' chi tit bay takin tx'otx'.

²⁵Caywal ti' yayji oc e yiban ex aj Israel a ton is mojalil chi wak' ayex tu'. Yujtol max in tojcan c'ayc'ulal e yuj, axac'al yin juntzan yechelej max e yaoc e c'ul.

²⁶Ok ex in t'irbaj c'apax el ayin ti', cax ok ex waon wal oc yin q'uixwiltakilal.

²⁷Max wil wal jantak yayji oc ajmulalil, mulej tol q'uixwiltakxac'al che yunej. Yajbejtakxac'al tzet che yun bay jolomlak witz c'al bay xolak te'. Ok'bal ex c'ul, ex aj Jerusalén. ¿Jantakto tiempoal ok ex ayjok ec' yin ajmulalil tu'? ẍi Jehová.