Read Q'anjob'al Jer 15 Bible Online

Jer 15 - Q'anjob'al bible

Jer 15

¹Max tak'wi Jehová ayin: Caxc'al a Moisés, c'al Samuel chi jayoc eb ul tewok ayin, tutun c'amxa chi je' wion in tzalojc'ulal yin jun conob ti'. Alek bay eb tol chi el eb in satak, cax chi toj eb.

²Ta ay mac chi k'anlen ayach baytal chi ca toj eb, alek juntzan chi wal ti': A mactxel tol ayoc yiban ok cam yuj ilya', ilya' ok on cami. A pax mactxel tol a yin owal ok cam xin, ac'alta' xol owal tu' ok camok. A pax a mactxel tol a yuj wajil ok cam xin, a ton yuj wajil tu' ok camok. A pax mactxel ok ilay bey xin, ok ton ilaytok yuj tx'ok conobal, cachi.

³Ayin wal caw Jehová in chi wala': Ok watek caneb makan yailal yiban eb anima ti': Ok mak'lay cam eb xol owal, ok jutxlay bey is mimanil eb yuj no tx'i', ok chilaytok eb yuj no ostoc, axa no xolakteal no' ok ak'onxac'al lajwok eb.

⁴Ok wut wal tol masanil nacionlak ok xiwaj c'ul yuj tzet ok wut in conob ti', yuj yobtakilal max el yunen Manasés is c'ajol Ezequías bay Jerusalén, yet ayoc yin reyal bay Judá.

⁵¿Macto wal txel ok ok' c'ul e yin ex aj Jerusalén? ¿Macto wal txel ok cusoc c'ul e yin? ¿Macto wal txel ok oc il e yuj?

⁶Ayin wal caw Jehová in chi wala', tol ayex ti' max in e yintaknej elok, tol chex texac'al etax elok. Mayal wal in c'unbi ajc'al wak'on mimanc'ulal e yin, xan mayal wiaj in k'ab yin ex wak'on cuenta yetok yailal, c'al yin ex wak'on c'ayilok.

⁷Max ex wieltok bay conoblak yul nación ti', max ex in saklemnejtok, axca chi yun xulay saklem matz'il trigo yuj cak'ek'. Max wak' c'ayil in conob ti'. C'amxa junok e yuninal max wak'canok, yujc'al tol maj yal e c'ul che bekcan e yob beybalil.

⁸Xiwil max yuncan eb xal ix c'amxa yichamil wuj, axcaxac'al yarenail a' mar tol c'am chi bischaji. Yet chuman c'u max jay jun c'aywajwom yiban eb xal txutxej aytok yune' yin soldadoal; jun wal bek max witek yatakilal c'al xiwc'ulal yiban eb.

⁹A eb xal txutxej ay ukwan yune' aytok yin owal, q'uixwiltakxac'al max yuncan eb xal. Max pax yip eb, max pax cak'ek' eb, max camxac'al eb yet manto is tiempoalok. Tatol ayto wal eb chi can yul is conobal, ayin wal caw Jehová in chi wala', tol ok wak' mak'layxac'al cam eb yuj eb ajc'ul, ẍi Cham.

¹⁰Ach in txutx, ok'bal in c'ul. ¿Tzet wal yuj xan max in ak' aljok? Asannej wal yin owal, c'al yin teyelejbail ayin ec' yetok masanil anima. C'am bay junok max wak' tumin majanil, tamwal max in majanej c'apax tumin bay junok, palta masanilxac'al eb chin bajoni.

¹¹Yunokabc'al is bajwal k'anej eb tu' win Mamin Jehová, ta yob max ach wut wak'on serbil, ta maj in tewok ayach yuj eb ajc'ul oc win, yet wal ayoc eb yin cusc'ulal c'al yin yatakilal.

¹²Max yalon Jehová: Tok ay mactxel chi je' mak'on k'aj ch'en bronce c'al ch'en hierro, mawal axca ch'en chi tit bay norte.

¹³A yuj wal masanil e yobtakil ex aj Israel, xan ok wak' masanil e beyomal bay eb e yajc'ul, c'al masanil tzet yetal ay bay sat e tx'otx' ti', toxac'al ok yitok eb axca tu' yin nabac'al.

¹⁴Ok ex wacan oc is mosook eb ajc'ul oc e yin tu', bay jun tx'otx' tol man ojtakbilok e yuj, yujtol a yowal in c'ul lajan wal axca k'ak'ej; ok ex lajwok ay yuj, ẍi Cham.

¹⁵Mamin Jehová, ach ti' ojtak masanil, na intek, titan colwajan win. Paktzej bay eb wajc'ul. Manokab mimanok chot a c'ul yin eb, axa ayin chin cami. Ilab wali, ojc'al cax chin buchlay yuj eb.

¹⁶A yet chalon a k'anej ayin max in chac'al wabej, asan wal ayoc in tzalojc'ulalok, yujtol et in, Mamin Jehová in Diosal, Yajaw ach yin Masanil.

¹⁷Majc'al in junanej in ba yetok eb tol asan yin tzalojc'ulal ayocok. Yuj wopiso max ak'a', xan max in ec'jab in tx'oklil, yujtol chi wab yail yowal a c'ul etok.

¹⁸¿Tzet wal yuj xan c'am chi oc wanaj in yailal axca junok yas c'amxa chi anchaji? ¿Tom ok in etnej axca elom aej chi tanajok?

¹⁹Yuj tu xan max tak'wi Jehová ayin: Ta chach meltzojtek ayin, ok ach in cha' pax junelxa, axca tu' ok je' in ak'on serbil. Ta cha tenchanej a ba yin comon k'anej, asan tzet yetal tol miman yelapnok chala', ach ok ach k'anjab el wuj. A eb anima ok meltzojtek eb ul yaben a k'anjabi, manak ach ok ab k'anjab eb.

²⁰Lajan wal ok ach wutcan bay jun conob ti' axca junok muralla tol bronce, yatakxa chi yun yayc'ayi. Ok yak' eb owal en, palta ayin wal caw Jehová in chi wala' tol man ok ach ayc'ayok, yujtol ayin oc etok, cax ayin ok ach in colo'.

²¹Ok ach in colil bay yul is k'ab eb yobtakwom, ok ach in colc'al el yul is k'ab eb c'aywajwom, ẍi Cham ayin.