Read Q'anjob'al Jer 16 Bible Online

Jer 16 - Q'anjob'al bible

Jer 16

¹Max k'anjab Jehová ayin, max yalon axca ti':

²Manchak ach nupayi, tamwal ay oninal ok el bay jun nación ti'.

³Ayin Jehová in ti' ok wal ayach tzet yetal ok jayoc yiban eb unin ok aljok bay jun nación ti', c'al yiban eb txutxej, c'al eb mamej.

⁴Ok cam eb yuj owal ilya', c'am mac ok ok' yuj eb, tamwal ayto mac ok mukon eb. Toxac'al ok cancan teljab eb bay sat tx'otx', axca tza no no'. Owal c'al wajil ok on cam eb. Toxac'al ok chilaytok is mimanil eb tu' yuj no ostoc, c'al yuj no chiwajwom no' xolak te', ẍi Cham ayin.

⁵Max yalon c'apax Cham ayin axca ti': Manchak ach octok bay yul junok na bay ayoc iloj ak'bal yuj eb anima yuj camnak. Manchak ach ok'i, tamwal cha tx'ox a cusc'ulal yuj, yujtol ayin wal caw Jehová in chi wala', tol max wiel in junc'ulalil, in camc'ulal c'al in yabenc'ulal yin jun conob ti'.

⁶Ok cam eb icham anima c'al eb unin bay jun conob ti'; c'am mactxel ok mukon eb, c'am mactxel ok ok' yuj eb, tamwal ay mac ok tx'oxil is cusc'ulal yin yak'on yasjok is mimanil, c'al tzuklen el xil jolom.

⁷Tok ayto mactxel ok watx'nen junok loj yuj camich tu', yet chi mimanc'ulnelay eb icanejal, caxc'al mi tol a mamej txutxej ok camok.

⁸C'am chach octok chotan bay yul junok na a lowi c'al oq'uena' bay ay junok k'in.

⁹Yujtol ayin Jehová, Yajaw in yin Masanil, e Diosal in, chi wala': Ayin ok wak' lajwok bit chi oc yet k'in, c'al bit chi oc yet ay nupayil bay jun nación ti'. A jun ti' ok uj yul e tiempoal, ok e yil c'apax ayex ti'.

¹⁰A yet ok alon jun k'anej ti' bay eb et conob, ok k'anlej eb ayach: ¿Tzet yuj xan ok yak' Jehová jun miman yailal tu' jiban? ¿Tzet yetal yob max junej? ¿Tzet yetal co mul max jaoc bay Jehová co Diosal? ẍi mi eb.

¹¹Cax cha paktzen bay eb axca ti': A wal caw Jehová chi aloni: A eb e yichmam max in beklaycan yuj eb, max tzakloj eb yintak comon dios, max oc eb ayilal bay juntzan tu'. Max in beklaycan yuj eb, maj yikej eb cuybanilej max wak' bay eb.

¹²Axa pax ayex ti', yelxac'al yob ex yintak eb e yichmam tu'. Junjun exxac'al che yun yobtakil chi tit yin e nabal, c'amxa che yikej tzet chi wala'.

¹³Yuj wal tu' xan ok ex wiel bay jun tx'otx' ti'. Ok ex waontok bay junxa nación bay tol man e yojtakok ayex ti', tamwal eb e yichmam yojtak. A wal bay tu' ok e yak' serbil juntzan comon dios yet c'ualil c'al ak'balil. C'amxac'al janic'ok ok cusoc in c'ul e yin, cachi.

¹⁴Palta ayin Jehová in chi wak' in ti': A tinani', a yet chin is locbantok eb anima, chi yal eb axca ti': Yin bi Cham Dios max ion eltek eb israel bay Egipto, ẍi eb.

¹⁵Palta a yet ok beyc'altok ti', axca ti' ok yun yalon eb: Yojtak wal Cham Jehová, Cham max ion eltek eb israel bay norte, yetokc'al bay juntzanxa conoblak bay max saklemcantok eb, ẍi mi eb. Yujtol ayin ok wi meltzoj eb israel bay is conobal, a ton bay tx'otx' tx'otx' max wak' bay eb e yichmam.

¹⁶Palta a yet c'amto chi uj jun tu', ok witek eb yajc'ul eb israel yet chi ul mitx'lay eb yuj eb, axca chi yun mitx'on eb txaywom no' txay yetok is txim, ma axca eb uktem no' chi tzakloj yintak no no' bay tzalanlak, chi sayonc'al ec' eb bay yulak na ch'en, c'al bay yulak pojilal satlak ch'en.

¹⁷Yujtol chi wil masanil tzetak chi el yunen eb. C'am junok mactxel chi je' c'uban el ba yul in sat, tamwal chi je' c'uban el eb is yobtakil in satak.

¹⁸Ok wak' paktzebal bay eb yuj is yobtakilal, yujtol max yetnejtok eb in tx'otx' yuj is diosal eb tol c'am yiquisal, tol yajbejtak axca mimanil camnak. Max yun eb tzet yetal tol c'am chi cha in c'ul, ẍi Jehová.

¹⁹Mamin Jehová tol Wipomal ach, in taynemal ayji. Ach wal chin a col yet wal ayin ec' yin yailal. Ok jayoc juntzan nacionlak bay lajubal tx'otx' tx'otx' ul yalon eb ayach: Asan wal juntzan dios c'am yopiso, c'am yipalil, max cha eb jichmam on is satakok.

²⁰¿Tom chi je' watx'nen aj eb anima is diosal? Tatol watx'nebil yuj eb, man diosok chi yal tu', ẍi mi eb.

²¹Max yal Jehová: Yuj tu' xan yin junelnej wal tol ok wak' yojtaknej el eb wipalil. Axca wal tu' ok yun yojtaknen el eb tol ayin Jehová in, ẍi Cham.