Read Q'anjob'al Jer 20 Bible Online

Jer 20 - Q'anjob'al bible

Jer 20

¹Max yab cham Pasur c'ajol Imer, tol sat sacerdote yayji bay is templo Jehová, tzet max yal cham Jeremías.

²Yuj tu' max yala', tol chi mak'lay Jeremías, cax chi alay octok yul cepo bay puertail templo ayoc yiban bay yetc'ulal makbej Benjamín.

³Axa yet junxa c'ual max chek ilay el Jeremías yuj yul cepo tu'. Yuj tu xin, max yal Jeremías bay Pasur axca ti': A Jehová max q'uexon a bi yin Magor-misabib (chi yal elapnok ayxac'al xiwc'ulal.)

⁴Yujtol chi yal Jehová axca ti': Ok wawal oc xiwilal eban yetok masanil eb ayoc etok; a satak wali ok ayc'ay eb ayoc etok tu' yuj yespada eb ajc'ul, ok wacan oc masanil eb aj Judá bay yul is k'ab eb aj Babilonia. A eb tu' ok ex iontok bay Babilonia tu', ma ok ex tekcam eb.

⁵Cax ok waon oc masanil is beyomal jun conob ti' yul k'ab eb ajc'ul tu', c'al masanil tzetak yetal ay ayex tol ay is tojol, yetok masanil is beyomal eb reyal Judá ok yitok eb bay Babilonia.

⁶A wal ach ti' Pasur, ok ach ilaytok yin mosejal bay Babilonia, yetokc'al masanil eb cajan etok bay atut. A bay tu' ok ach camok. Junej ok ach mukay yetok eb ayoc etok, eb bay max alcan el lek'tial, ẍi Jehová, ẍi Jeremías.

⁷Mamin Jehová, toc'al max quin a montej. Max wikej bay tzet max ala'. Yelxac'al tec'an a waayi, xan max in ayc'ay oj. Masanilc'al c'ual tzeyejtakbil inc'al. Masanilxac'al eb chin buchoni.

⁸Junjuntakc'al el chin k'anjab elok. Ok ex ayc'ayok, ok ex lajwok elok, quin chic'al bay eb anima. Yuj tu' xan ayc'al oc eb yalon yobal k'anej win, c'al in is buchon eb, yujc'al tol a a k'anej chi wala'.

⁹Ta chi wala' tol c'amxa chach wak' binajok, majxac'al walil a k'anej junelokxa, ta quin chi; axa chi yunej, axcaxa k'ak' chi yut ba a k'anej win. Toxc'a chi tz'atok in bakil yuj, chi wabej. Chi wochej chin mitx' waay in ba walon a k'anej tu', palta c'amxa chi techaj wuj.

¹⁰Chi wabxac'al sajlab eb yin quin buchoni: Ilab nak Magor-misabib, ẍi eb. Chi yalon c'apax eb bay junjun: Tonek, co tz'akek aj k'anej yiban, ẍi eb. Toltax ajun eb watx' wak'on yetok, chi mak eb tzet chi yun wayc'ayi, cax chi yalon eb: Tekan ok monchaj juj, ta ok ayc'ayok, ok ji wal el yowal co c'ul yin, ẍi eb.

¹¹Palta ach ti' Mamin Jehová, ayachc'al ec' wetok, axca wal junok soldado caw wal ay is may. A eb chin ukteni, ok telc'oj eb; palta ayin man ok in ayc'ay yuj eb. Toxac'al ok q'uixwokcan aj eb, tok chito toj c'ayc'ulal bay chi el is q'uixwil eb tu'.

¹²Mamin Jehová, Yajaw ach Yin Masanil, ach cha beyc'ulnej eb tojol; toltax wal yul is nabal eb anima chela'. Ak' wal wil tzet ok yun aon oc yailal yiban juntzan anima ti', yujtol mayal wabenej can oc in ba yul a k'ab.

¹³Bitnejek Jehová, alek e watx' k'anej bay Cham. A' chi colon el eb yabnak yail yul k'ab eb etnewom.

¹⁴Yelxac'al yob jun c'u bay max in alji. C'amokab chi al-lay watx'il yin jun c'ual yet max in alji el yin in txutx tu'.

¹⁵Catabnebilokab nak max alon bay in mam, tol max alji junok is c'ajol, xan max tzalojbiajok.

¹⁶C'ayokab el jun winak tu', axca juntzan conob max c'aylay el yuj Dios yin c'amxac'al yabenc'ulal. Yabokab yel aw yuj yailal yet k'inibalil, c'al aw yin ak'oj owal yet chuman c'u.

¹⁷¿Tzet yuj maj in mak'lay cam yuj jun winak tu' yet c'amto chin alji? Ta caytu', max in canxac'al can yin in txutx, axcaxac'al mi in mukbanilok max yuncanok.

¹⁸¿Tzet wal yuj max in alji? ¿Tom asan wal yuj wilon yatakilal, c'al lajwi in k'inal ti' yin q'uixawtakil? quin chi.