Read Q'anjob'al Jer 21 Bible Online

Jer 21 - Q'anjob'al bible

Jer 21

¹Max chektok cham rey Sedequías Pasur is c'ajol Malquías, yetok cham sacerdote Sofonías c'ajol Maasías, yet chi toj il-lay Jeremías, c'al yal-lay bay axca ti': Yuj wal dios ayach, tewan bay Jehová juj ayon ti', yujtol a Nabucodonosor reyal Babilonia, lanan yak'on owal jin. Axta wal chi el yin c'ul Jehová tx'oxon yipalil, axca max yun yet yalantok, cax chi el Nabucodonosor tu' jin, ẍi eb. Lajwi tu xin max k'anjab Jehová bay Jeremías.

³Axa tak'wi Jeremías bay eb chekbej Sedequías tu' axca ti': Alek bay Sedequías tu',

⁴tol a Jehová co Diosal ayon israel on ti', chi yala': Ok wak' meltzoj eb a soldado yintak, a ton eb chi ak'on owal yetok yejército reyal Babilonia. Axa eb soldado caldeo tu' tol ayic' bay yinlak muralla, oybil ex aj yuj, ayin ok in wajbaj octek eb bay yul jun conob ti'.

⁵Ayin wal ok wak' owal e yin yetok wal wipalil tol ayxamay, yetok wal in k'ak'alc'ulal tol ayxamay yayji ocok.

⁶Masanil cajyom bay jun conob ti', ok wak' camok; masanil anima c'al yetok no no' ok cam yuj jun owal ilya'.

⁷Lajwi tu xin, ach Sedequías, ok ach wacan oc yul is k'ab Nabucodonosor, yetok juntzanxa eb ajc'ul oc en. Ok ach wacan oc yetok eb a chekbej, eb soldado, c'al yetok eb anima okto cancan yin yiquisal bay conob ti' yet chi lajwi ec' ilya', owal c'al wajil. Ayin wal Jehová in chi wala', tol ok ex wak' ak'lay cam yetok espada, yin tol c'amc'al yabenc'ulal.

⁸Alek c'apax el bay xol conob, tol ayin Jehová in chi wala': Chi wak' e sic' tzet beal che yi'. Ay beal k'inalej, ay pax beal camich.

⁹A mactxel chi cancan bay jun conob ti', ok cam yuj owal, yuj wajil ma yuj ilya'. Axa pax eb chi eltok xin, cax chi yaon oc ba eb yul k'ab eb caldeo, a ton eb ayoc yak'on owal yin conob ti' tinani', a eb chi eltok tu', man ok cam eb; asan xin mimanokxac'al tol iquis ec' eb.

¹⁰Ayin wal caw Jehová in chi wala', tol mayal in na' wiontek yatakilal yiban jun conob ti', manxanak watx'ilal ok witek. Tol ok waoc yul k'ab reyal Babilonia, cax a' ok aon oc k'ak'al.

¹¹Alek c'apax bay eb reyal Judá, is yinatil David, tzet yetal chi wal ti': Chi cam wal e yaben k'anej Jehová: Watx'okab che yun yin e beyc'ulal junjun c'u. Che col eb chi etaxi yul k'ab eb chi etnewi, axa talaj chi yunajok, a yuj e yob beyc'ulal tu', cax chi ayc'ay yowal in c'ul axca k'ak'ej tol chi chawi, cax c'amxa mac chi je' buton tanok.

¹³Ex aj Jerusalén, yelxac'al can ayex ajok nan yul jobe, axcaxac'al junok miman ch'en bay ac'al, palta ayin Jehová in chi wala' tol ay yowal in c'ul e yin. Ayex ti' che yala': ¿Mac wal txel ok je' yak'on owal jetok? ¿Mac wal junok ok je' yapni oc bay ay co colbalba ti'? quex chi.

¹⁴Ayin caw Jehová in chi wala', tol ok waoc yailal e yiban, axca wal mojalil e yunben. Ok waoc k'ak'al e k'aktelak. A jun k'ak' tu', ok yak' lajwok masanil tzet ay yinlak e conob, ẍi Cham, ẍi Jeremías.