Read Q'anjob'al Jer 22 Bible Online

Jer 22 - Q'anjob'al bible

Jer 22

¹Max yalon Jehová ayin: Asi' bay despacho eb reyal Judá, cax chalon juntzan k'anej ti'

²satak jun rey tu', a ton jun ayoc reyal q'uexelok David. Chal c'apax satak masanil eb mimek yikbej, c'al satak masanil anima ay bay tu' tol chi taynej eb yab in k'anej ti':

³A tojolal c'al watx'ilal che beybalnej. C'amokabc'al mactxel chi etnen yet animail, c'am chi etnelay eb tx'ok conobal, eb unin c'amxa is mam c'amxa is txutx, yetokc'al eb xal ix camnakxa yichamil. Tamwal che mak'cam eb anima tol c'am is mul bay jun conob ti'.

⁴Tatol yel wali ok e beybalnej juntzan chi wal ti', ok occ'al eb yinatil David yin reyal, ayoc eb yul carruaje c'al yiban chej ok octek eb bay yul is puertail jun despacho ti', ajun masanil eb mimek yopiso c'al eb conob yetok.

⁵Palta ta man ok e cha e yab juntzan chekbanilej max wal ti', ayin wal caw Jehová in chi wak' in ti', tol a jun despacho ti', ok lajwok ayok, ẍi Jehová, cachi, ẍi Cham.

⁶Max yalon Jehová: A despacho eb rey bay Judá, lajan yayji yul in sat axca watx'ilal yili tx'otx' Galaad, axca c'apax jolom witz Líbano. Palta chi wala' tol tz'inan tx'otx' ok wutcantok. C'amxa junok mactxel ok cajay bay jun despacho ti'.

⁷Ok watok eb anima caw wal ay is mitx'k'ab yin owal yin despacho ti', yuj c'ayon el eb. Ok k'akay eb te c'ute' manxa watx'ilok ayoc yin patzabil, ok yak'on tz'a eb.

⁸A juntzan anima ok tit bay xiwilok nación, ok ec'jab cawilal jun conob ti', toxac'al ok k'anlej eb bay junjun: ¿Tzet wal yuj xan caytu' max yut Jehová jun miman conob ti'? ẍi mi eb.

⁹Cax ok tak'wok juntzanxa eb tu': Yujtol max bekcan eb trato max watx'nej yetok Jehová is Diosal, axa bay juntzan tx'ok diosal max oc eb yin ayilal, ẍi mi eb, ẍi Jehová.

¹⁰Manchak ex ok' yuj Josías, manchak ex ok' yuj is camichal. Ok'anek yuj Salum is c'ajol, chi tojxac'al yin junelnej, manxa ok meltzojok; manxa ok yil is tx'otx'al bay max alji. A Jehová chi alon yin is c'ajol Josías chi yik Salum, jun max oc reyalok Judá yet mayal cam is mam tu': Max el cayti', palta majxac'al meltzojok.

¹²A bay jun nación bay max ilaytok tu', a tu' ok camok. Manxac'al ok yil jun nación ti' junelxa.

¹³¡Ok'bal ach c'ul, a wal yuj a yobtakil xan cha watx'nej aj despacho, c'al yetok a mimek na. Chi mulnaj juntzanxa anima oj, palta c'am cha tojlanej c'u eb!

¹⁴Ach chala': Ok in watx'nej aj junok miman despacho, yetok mimek salón bay yet is cab piso. Ok jakay is wentenail, axa bay is paredal, naba c'ute' ok oc yin, cax ok bonlay yetok cak pintura, cachi.

¹⁵¿Chim a na' tol asan yuj ayji ec' bay yulak na tol naba c'ute'xac'al ayoc yin, xan rey tol mimanbil ach? A a mam max yak' wal tzalojbok c'ul yujtol caw wal tojol, watx'c'al tzet max yunej, yuj tu' xan watx'c'al max yun yelocok.

¹⁶Caw wal max col-lay eb meba' c'al eb ok'bal c'ul yuj. Yuj tu' xan watx'c'al max elocok. Ayin wal caw Jehová in chi wala' tol a yuj beybalej axca tu', a' chi tx'oxon elok tol ojtakbil in yuj.

¹⁷Palta ach ti', asan beyomal chochej che' yin yobal; cha mak'cam eb anima c'am is mul, caw wal chak' yobc'ulalil yin etnen eb a conob, ẍi Jehová.

¹⁸Chi yal Jehová yin Joacim is c'ajol Josías reyal Judá axca ti': C'am mactxel ok ok' yuj is camichal. Tok ay mactxel ok ok'ok, cax ok yalon axca ti': ¡Ay, ach wet animail, ok'bal on c'ul, mayal cam co reyal, tol axca wal co mam yayji ocok! man ẍiok eb.

¹⁹Ok utlay axcac'al chi utlay junok no camnak burro; ok jutxlaycan eltok yinel conob Jerusalén, ẍi Cham.

²⁰Max yal Jehová: ¡Ex aj Judá, ajanektok bay jolom witz Líbano cax chex awji! ¡Caw wal e yip chex awji bay jolomlak witz yul yet Basán, c'al bay tzalanlak yul yet Abarim! Yujtol masanil eb ayoc e yetok mayal lajwi ay eb.

²¹Ayin ti', max wal ayex yet wal elnak wal e yaj can, palta maj e cha e yabej. Cac'al tu' max e yut e ba yettaxc'al yichbanil, toc'alta c'am chi yal e c'ul che cha e yab tzet chi wala'.

²²Ok ilay bey eb e yajawil, axca tol yuj junok owal cak'ek', axa eb ayoc e yetok ok ilaytok eb yin presoal. Toxac'al ok ex q'uixwokcan ajok. Yaynakilxac'al ok e yuncanok, yujc'al wal jantakxa e yobtakilal.

²³A tinani', caw wal tzalojc'ulal ayex ec' bay e na, tol naba c'ute' ibiltek bay Líbano ayoc yin. Palta a wal yet ok jay yailal tu xin, caw wal ok el e yaw yuj yail, axca yail unewal yin junok ix ix, ẍi Jehová.

²⁴Chi yal Jehová bay Jeconías, is c'ajol Joacim, cham reyal Judá: Caxc'al caw ay tzet chach oc wuj, axca wal colk'abej ayoc yin watx' k'ab eb mimek winak, palta ayin wal caw chi wak' in ti', tutun ok ach wi wal elok.

²⁵Ok ach wacan oc yul k'ab eb ajc'ul bay eb caw wal chach xiw bay, a ton eb chi yochej ok ach ak'on camok. Ok ach waoc yul k'ab Nabucodonosor, reyal Babilonia, yetok eb ajun yetok.

²⁶Ok ach wuktejtok yetok a txutx bay jun tx'otx' tol manak tu' max ex alji, a bay tu' ok ex cam e cawanil.

²⁷Yuj tu' xan manxa ok ex meltzojtek cayti', caxc'al mi caw wal ok e yochej ok ex meltzojtek, ẍi Cham.

²⁸¿Tom lajanxac'al Jeconías ti' yetok junok comon xij pojil, c'amxa yopiso, axca junok mitx'k'abej tol c'amxa mac chi ocheni? ¿Tzet yuj xan chi k'oklayxac'al tok yetok yuninal bay jun tx'otx' tol man ojtakbilok yuj?

²⁹¡Ex aj nación ti', chi cam wal e yabeni tzet chi yal Jehová!

³⁰Chi yal Jehová: Tz'ibejekcan ay bay libroal registro, tol lajan ok yuncan jun winak ti' axca junok winak tol c'am yuninal, axca junok winak tol man watx'ok max elocok; yujtol c'amxa junok yinatil ok apnok oc yak'on yajawilal bay is despachoben David, yin yak'on yajawilal junelxa bay Judá, ẍi Cham.