Read Q'anjob'al Jer 25 Bible Online

Jer 25 - Q'anjob'al bible

Jer 25

¹A yet is can abil yoc Joacim c'ajol Josías yin reyal bay Judá, max yal Jehová jun k'anej bay Jeremías yuj conob Judá. A yet tu' babel abil yoc Nabucodonosor yin reyal bay Babilonia.

²Max yal Jeremías, is chekbej Dios jun k'anej tu' bay masanil eb conob bay Judá, c'al bay masanil eb cajyom bay Jerusalén. Max yaloni:

³Atax yet abil 13 yoc Josías c'ajol Amón yin reyal bay Judá ti', masantac'al tinani', chi yal elapnok ayxa 23 abil tinani', max k'anjab Jehová ayin, xan xiwil el max wal ayex, palta ayex ti' tokwal che cha e yabej.

⁴Caxc'al mi xiwil el max chektek Jehová is chekbej ayex, palta tokwal max e chac'al e yabej, tamwal e yikeni.

⁵Max yal wal eb tu' ayex tol che bekcan e yobtakil c'al e yob beybalil, yet watx' ok ex cajayc'al ec' bay tx'otx' tx'otx' max yak' Jehová bay eb jichmam.

⁶Manchak ex tzakloj yintak comon dios tamwal chex oc ayilal bay. Manchak e tx'emtek yowal c'ul Dios yuj e yoc yin ayilal bay juntzan dios tol ayex che watx'nej ti', yet watx' c'am chi yatek Cham junok yailal e xol, ẍi eb.

⁷Axa tinani', chi yal Jehová axca ti': Ayex ti' c'am chi yochej e c'ul che cha e yab tzet chi wala'. Caw wal che tx'emtek yowal in c'ul yet chex oc yin ayilal bay juntzan e diosal che watx'nej ajok. Yuj tu' xan ayexc'al oc che yitek yailal e yiban, ẍi Cham.

⁸Yuj tu' xan chi yal Jehová Cham Yajaw yin Masanil: Yujtol c'am chi cha yab eb anima ti' tzet chi wala',

⁹xan ok wawtejtek masanil eb conoblak bay norte, c'al yetok in chekbej Nabucodonosor reyal Babilonia, yet watx' chi jay ul yak' owal yin jun conob ti', c'al yin masanil nacionlak ay is cawilal, c'al yetok masanil eb cajyom bay. Ok wak' c'ayil eb masanil. Junelnej ok wak' lajwok ay eb. Axa mac ok ilonok, xiwc'ulaltakxac'al ok yuncan eb, c'al buchwaj eb yin eb.

¹⁰A wal ok yun xol eb tu' wuj, c'amxa bay ok ablay yoc bit yet k'in yuj tzalojc'ulal, tamwal bit yet nupayil, tamwal ayto bay ok ablay bil ch'en ca', tamwal ayto bay ok il-lay tzektebalej.

¹¹Masanil jun nación ti', ok lajwok ayok, uchquiltakxac'al ok yuncantok. Ok occan jun nación ti' yetok juntzanxa nación ay is cawilal ti' yalan yikbej reyal Babilonia yin 70 abil.

¹²Ayin wal caw Jehová in chi wala', tol a yet ok lajwok 70 abil tu xin, catatu' ok in watx'nen yayji yetok reyal Babilonia tu', yetokc'al masanil yul is nación, a ton eb caldeo. A eb tu' ok wak' lajwok ay eb yin junelnej.

¹³Ok wak' ayc'ay yiban jun nación tu' masanil juntzan yailal max wala', tol ok jayoc yiban, a ton masanil tzet tz'ibbil bay yul jun libro ti', masanil tzet yetal maxax yalcan el Jeremías wuj yin juntzan nacionlak.

¹⁴Ok waoc eb yul k'ab mimek nación, c'al eb mimek yajaw tol ay is may yayji ocok, caywal tu' ok yun chaon eb paktzil, axca wal mojalil is yunben, ẍi Jehová, ẍi Jeremías.

¹⁵A Jehová Cham co Diosal ayon israel on ti', max alon ayin: Ila wal jun copa ti', nojnak wal yuj vino, yenel yowal in c'ul. Itok, cax chak'on yuc' masanil nacionlak bay ok ach in chektok.

¹⁶A yet ok yuq'uen eb, ok xab eb yuj, c'al yoc eb yin yaxc'ayinakil yuj, yujc'al jun owal ok watok xol eb tu', ẍi Cham.

¹⁷Max in chaon ec' jun copa tu' bay yul is k'ab Jehová, max wak'on yuc' masanil juntzan nacionlak tu' tzet ayay yul, a ton juntzan bay max in cheklay yuj Cham.

¹⁸Max wak' yuc' eb aj Jerusalén, c'al yetok masanil eb cajyom bay conoblak yul yet Judá; max yuc' eb yetokc'al is reyal eb c'al yetok eb yajaw, yet chi uchchajxac'altok eb, c'al lajwi ay eb. A mac ok ilonok, xiwc'ulaltakxac'al ok yun eb. Ok buchwaj yin eb, c'al catabnen eb, axca lananc'al yunen tinani'.

¹⁹Max wak'on c'apax yuc' reyal Egipto, yetokc'al eb yajaw c'al eb mimek winak, yetok masanil is conob,

²⁰yetokc'al masanil pojanil anima ay bay tu'. Max wak' yuc' c'apax masanil eb rey ay bay nación Uz, yetokc'al masanil mac ay yul is makbej eb filisteo: a ton Ascalón, Gaza, Ecrón, c'al yetok eb ayto can bay Asdod.

²¹Max wak' bay Edom, Moab c'al Amón;

²²yetok masanil eb rey bay Tiro, c'al bay Sidón; yetokc'al masanil eb rey ay bay nacionlak ay bay tilak a' mar Mediterráneo.

²³Max wak' bay eb tribu yet Dedán, Tema c'al Buz, yetok masanil conoblak chi tzukil xil bay tz'eyil jolom.

²⁴Yetokc'al masanil eb rey bay Arabia, c'al masanil pojanil anima cajan bay tz'inan tx'otx'.

²⁵Max wak' c'apax bay masanil eb rey bay Zimri, Elam c'al bay Media,

²⁶yetokc'al masanil eb rey bay norte, a ton eb cawil ay, yetok eb najat ay, max yuc' yin txolilal. Chi yal elapnok, masanil eb rey bay yulyibank'inal max uq'ueni. Yinxa lajubal ok yuq'uen c'apax reyal Babilonia.

²⁷Lajwi tu' max yalon pax Jehová ayin: Ala' tol ayin Jehová, Yajaw in yin Masanil, Diosal in eb israel, max wala' tol yowalil chi yuc' eb cax chi uc'wixac'al an eb yuj, masantac'al ok yal xab eb, ok ayc'ay eb sat tx'otx'. Manxa ok aj wan eb, yujc'al wal owal ok watok xol eb.

²⁸Tatol c'am chi yochej eb chi cha jun copa tu' ayach, c'al yuq'uen eb, al bay eb tol: A Jehová Cham Yajaw yin Masanil chi aloni: Yowalil ok e yuc'c'alta'a.

²⁹Ti wal ok in chail yich waontok yailal yiban jun conob tol wet yayji ocok. ¿Chi mi e na' ayex ti', tol man ok oc yailal e yiban? Ayin wal caw Jehová in chi wala', tol a jun tu' man ok ec'tok jayoc e yiban, yujtol ok watek owal yiban masanil eb cajyom bay sat tx'otx' ti', ẍi Cham, cachi bay eb.

³⁰Ach Jeremías, al masanil juntzan k'anej ti' bay eb: A Jehová ok bil wal yaj yaw yin eb, atac'al bay is cajlobal bay satcan tol asan ay yet. Ok el yaw yin masanil eb cajyom bay sat tx'otx' tx'otx' ti', axca yel yaw eb chi tec'wi uva.

³¹Ok apnoktac'al oc bil bay lajubal tx'otx' tx'otx'. Ay tzet ok yal Jehová yin masanil nación. A wal caw chi yala', tol ok beyc'ulnej el masanil eb anima, cax ok yaoncan oc camich yiban masanil eb yobtakwom, cachi bay eb, ẍi Cham.

³²A Jehová, Cham Yajaw yin Masanil chi aloni: Abek xin, tol txololixac'al ok yun michchaj nacionlak yuj jun yailal ok jayok. Lananxa wajban ba jun miman yailal tu' bay lajubal tx'otx' tx'otx', ẍi Cham.

³³A eb ok cam yuj Jehová yet jun c'ual tu', toxac'al ok aycan bulan eb bay masanil sat tx'otx' tx'otx'. C'am mactxel ok ok' yuj eb, c'am mactxel ok wajon aj is mimanil eb yuj mukoni; toxac'al ok can nilan eb bay sat tx'otx', axca tza no no'.

³⁴Elokab e yaw yuj yailal, ex yilomal conob; balek ec' e ba sat tx'otx', yujtol mayal jay c'ual yet chex mak'lay camok. Ok ex in saklemnejtok. Ok ex ayc'ayok, axa e pojtok axca junok sec' caw wal watx'.

³⁵A eb yilomal conob, man ok je' yelaj eb. A eb ikbajwom man ok colchajcan el eb.

³⁶Abek wal k'akwi eb ikbajwom, c'al yel yaw eb yuj yail, yujtol mayal lajwi ay is nación eb yuj Jehová;

³⁷uchquiltakxac'al max yutcantok Cham yuj yowal c'ul.

³⁸Max eltek jucnaj Jehová bay ayic'ok, axca wal junok no coj, axa is conob juntzan anima tu', max uchchajcan ayok. Yetok wal yowal c'ul Cham max yaontek jun owal ayxamay xol eb.