Read Q'anjob'al Jer 26 Bible Online

Jer 26 - Q'anjob'al bible

Jer 26

¹A yet max oc Joacim is c'ajol Josías yin reyal bay Judá, a yet tu' max k'anjab Jehová bay Jeremías.

²Max yaloni: A tu' chach oc waan bay yamak'il templo, cax chalon masanil tzet max wal ayach bay eb anima petoj bay Judá, chi ul yiay ba eb yin ayilal bay templo tu'. C'am junok k'anej tol c'am chala',

³talaj c'uxan ok cha yab eb, cax ok bekoncan eb is yob beybal, cax c'amxa chi waoc yailal mayal in na waon oc yiban eb yuj is yob beybal tu'.

⁴Chal bay eb tol ayin Jehová in chi wala': Yowalil che cha e yabej, che yiken masanil in cuybej mayal wal ayex.

⁵Yowalil che cha e yab tzet max in chek yal eb in chekbej ayex yin xiwil elal, palta majc'al e yikej.

⁶Ta man ok e yikej, ok wut wal jun templo ti' axca max wut in cajlobal bay Silo. A wal ok wutej tol ok jayoc catab yiban jun conob ti' xol masanil nacionlak ay bay yulyibank'inal, ẍi Jehová, cachi bay eb, ẍi Cham.

⁷A eb sacerdote, eb chi yaloc ba chekbejok Dios, c'al masanil eb conob, max yab wal eb yalon el cham Jeremías juntzan k'anej tu' bay templo.

⁸A yet max lajwi yalon el masanil tzet max chek Jehová yala', axa mitx'lay yuj eb tu'. Max yalon eb bay axca ti': ¡Ok ach camok!

⁹¿Tzet wal yuj xan cha tec'baj a ba alon yin bi Jehová tol a jun templo ti' lajan ok yuncantok axca max yun cajlobal Cham bay Silo? Cax chaloni tol ok lajwok ay jun conob ti', cax c'amxa junok anima ok cajaycan ec' bay, ẍi eb. Masanil conob max jay lemnaj bay templo yin yak'on owal yin Jeremías.

¹⁰A yet max yaben eb yajaw yayji bay Judá tzet chi uji, max tit eb bay is despacho cham rey, max toj eb bay templo; a bay ay jun ac' puerta, a tu' max apni oc chotan eb.

¹¹Max yalon eb sacerdote c'al eb chi yaloc ba chekbejal tu' bay eb yajaw c'al bay eb conob axca ti': A jun winak ti' moj wal tol chi cami, yujtol max yala' tol yob tzet ok jay yiban co conob ti'. Ayex ti' max cam wal e yaben tzet max yala', ẍi eb.

¹²Max k'anjab cham Jeremías bay eb yajaw c'al bay eb conob, max yaloni: A Jehová max chekon wal tzet max e yab ti' yin jun conob ti', yin jun templo ti', c'al e yin ayex ti'.

¹³Watx'nejek e beybal c'al tzet che yunej, ikem che yut e ba bay Jehová co Diosal, yet watx' man ok yatek juntzan yailal mayal al-lay el tu' e yiban.

¹⁴Axca ayin ti', ayin ec' yul e k'ab; chi je' che yun tzet yetal chi yochej e c'ul win.

¹⁵Palta xin, ojtaknejek wal el jun ti' sic'libil: Ta ayex yetokc'al eb anima ti' chin e mak'camok, ok oc e mulok yuj che mak'cam junok mac tol c'am is mul, yujtol wal yel, a caw Jehová max in chekon walil juntzan k'anej ti', ẍi Jeremías.

¹⁶Catatu xin, max yalon eb yajaw c'al eb conob bay eb sacerdote c'al eb chi yaloc ba chekbejal tu': Man mojok chi cam jun winak ti' xin, yujtol a yin is bi Jehová co Diosal max k'anjab el ayon, ẍi eb.

¹⁷Ay juntzan eb yicham winakil conob max aj wanok, cax max yalon eb bay eb conob wajan ec' bay tu':

¹⁸A yul is tiempoal Ezequías reyal Judá, a Miqueas aj Moreset max k'anjab el yin is bi Jehová bay masanil conob Judá. Max yal axca ti': A Jehová, Cham Yajaw yin Masanil chi alon axca ti': A Sión ti' ok cancan yin mulnajbal tx'otx'al; axa Jerusalén uchquiltakxac'al ok yuncanok, axa jun tzalan bay ay templo, k'aktelakxac'al ok yunej, ẍi Cham, ẍi Miqueas.

¹⁹Tokwal max mak'lay cam Miqueas yuj cham rey Ezequías, c'al yuj eb conob. A ti' yet eb, max xiw eb, xan max txajli eb bay Jehová. Yuj tu xin, majxa yatek Jehová yailal mayal al-lay el tu' yiban eb. Ta ayon ti' ok co mak'cam Jeremías ok jay yailal jiban, ẍi eb.

²⁰(Yetok c'apax cham chekbej Dios chi yik Urías, is c'ajol Semaías, aj conob Quiriat-jearim, a' max k'anjab el yin bi Jehová yin jun conob ti', c'al yin nación ti', axcac'al wal k'anjab el Jeremías ti'.

²¹A cham rey Joacim, yetokc'al eb ayoc yin yajawilal yetok, c'al eb mimek yikbej, max yab eb tzet max yala'. Max yochejxac'al c'ul cham rey tu' max mak'camok. Axa yet max yaben wal Urías tzet yayji oc xin, max elajok, max tojcan bay Egipto.

²²Max cheklaytok Elnatán is c'ajol Acbor, yetok juntzanxa winak yuj cham rey Joacim bay Egipto.

²³A ton eb max bet iontek Urías, cax max yaon oc eb yul k'ab cham rey tu'; max yal cham tol chi mak'laycamok, cax chi k'oklay aytok is mimanil bay chi muklay eb comon anima.)

²⁴Axa pax Jeremías xin, a cham Ahicam, is c'ajol Safán, max yaoc ba yetok xan maj alay oc Jeremías tu' yul k'ab eb conob yet chi mak'lay camok.