Read Q'anjob'al Jer 27 Bible Online

Jer 27 - Q'anjob'al bible

Jer 27

¹A yet tolto max oc Sedequías c'ajol Josías yin reyal bay Judá, max k'anjab Jehová bay cham Jeremías.

²Max yalon axca ti': Watx'nej juntzanok tz'um yetok junok yugo, cax chaon oc yin a nuk'.

³Chi lajwi tu', cax chaontok junok chekbanilej bay eb reyal Edom, Moab, Amón, Tiro c'al Sidón. A bay eb chekbej, eb chi jayoc bay Jerusalén yuj ul yilon rey Sedequías, a tu' chatok.

⁴Al bay eb tol chi yal eb bay is yajawil, tol ayin Jehová, Yajaw in yin Masanil, is Diosal in Israel ti' chi wala':

⁵Yetok wal wipalil tol miman yayji ocok, max in watx'nej yulyibank'inal ti' yetok masanil tzetak yetal ay bay. Max in watx'nej eb anima, c'al no no'; xan chi je' wak'on bay tzanc'al mactxel bay chi yochej in c'ul.

⁶Yuj wal tu xin, ayin chi wacan oc masanil nación ti' yul k'ab in chekbej Nabucodonosor, reyal Babilonia. Toltax no' xolakilteal no', chi wa c'apax oc no' yalan yikbej.

⁷Masanil nacionlak ok can yul k'ab Nabucodonosor, yul k'ab is c'ajol, c'al yul k'ab yitxiquin, masantac'al yet ok jay c'ual yayc'ay Babilonia. Catatu' ok can Babilonia tu' yul k'ab xiwil nación, c'al yul k'ab juntzan rey caw wal mimek yayji oc yikbej.

⁸Ayin wal caw Jehová in chi wala', ta ay junok nación c'am chi yaoc ba yalan yikbej Nabucodonosor, ok waoc yailal yiban, a ton owal, wajil, c'al ilya', masantac'al ok yal lajwok yuj jun rey tu'.

⁹Yuj wal tu', manchak e cha e yab tzet yetal chi yal juntzan eb chi ak'on e yunej tol c'am che yaoc e ba yalan yikbej Nabucodonosor, reyal Babilonia, a ton eb chekbej tol chi je' naon el k'anej, c'al tol chi je' watx' alnen el eb wayichej yaloni, c'al eb tz'akan ay c'ul tol chi yalil eb tzet yetal ok uj yet yajtok tu' yaloni.

¹⁰A masanil juntzan tzet yetal chi yal eb tu', lek'tialc'al, axa tzet ok e yi' yin ayex ti', tol ok ex ilaytok bay junokxa tx'ok nacional. Ayin ok ex wuktejtok, a bay tu' ok ex camok.

¹¹A pax tzanc'al nacional tol bekan c'ul yaon oc ba yul k'ab reyal Babilonia xin, ayin wal caw Jehová in chi wala' tol ok wak'c'al cajay ec' eb bay is tx'otx'al, ok mulnaj eb bay tu', ẍi Jehová, cachitok, ẍi Cham.

¹²Xan max in cayic'nej walon juntzan ti' bay Sedequías reyal Judá. Max cam wal walon bay: Aoc a ba yalan yikbej reyal Babilonia, yetokc'al is conob cham, yet watx' c'am chex cami.

¹³¿Tzet wal yuj xan toxac'al ok a bek cam a ba yetok a conob yuj owal, yuj wajil, c'al yuj ilya'? Yujtol mayal yal Jehová tol a juntzan tu' ok on masanil nacionlak tol man ok yaoc ba yul k'ab reyal Babilonia.

¹⁴Manchak ekejtok tzet yetal chi yal juntzan chi yaloc ba chekbejok Dios, chi aloni tol c'am chaoc a ba yalan yikbej reyal Babilonia tu', yujtol a tzet yetal chi yal eb tu', naba lek'tialc'al.

¹⁵A Jehová max aloni tol manak Cham cheknej eb yal juntzan tu', naba lek'tial chi yal eb, tol a Cham chi aloni. Ta chekejtok tzet chi yal eb xin, ok ach uktelay el cayti' yetok eb lek'ti chekbej chi alon ayach tu', cax ok ach cam yetok eb, quin chi bay cham rey.

¹⁶Lajwi tu', max walon c'apax bay eb sacerdote, c'al bay masanil conob axca ti': A wal Jehová chi aloni: Manchak e cha e yab tzet yetal chi yal juntzan chi yaloc ba chekbejal tu'. Chi yalon eb ayex, tol yin aymanil ok meltzoj masanil mitx'k'abej yet templo ibiltok bay Babilonia. A juntzan tu', lek'tial k'anej chi yal eb ayex,

¹⁷xan manchak e cha e yabej. Aek wal oc e ba yul k'ab reyal Babilonia, yet watx' ok ex cajayc'al ec' cayti'. ¿Tzet wal yuj xan tol a jun conob ti', toxac'al ok uchchajcan ayok? ẍi Jehová.

¹⁸Tatol yel chekbej yayji eb yuj Jehová, Cham Yajaw yin Masanil, xan ibil oc k'anej Cham yuj eb, k'anokab eb bay, yet watx' c'am chi ilaytok juntzanxa mitx'k'abej yet templo bay Babilonia c'al yetok tzet yetal ayto bay despacho is reyal Judá, c'al bay Jerusalén, quin chi bay eb.

¹⁹(A yet max ilaytok Jeconías, c'ajol Joacim reyal Judá yuj Nabucodonosor reyal Babilonia, max ilayc'al tok yetok eb mimek winak bay Judá tu' c'al eb bay Jerusalén. A yet tu', maj ilaytok juntzan mimek oy, jun miman pila tol naba bronce, tamwal batxlub yich, tamwal juntzanxa mitx'k'abej yet templo.)

²¹Max yal Jehová: Abek tzet chi wala', ayin Jehová, Yajaw in yin Masanil, e Diosal in ayex israel ex ti', chi walon yuj juntzanxa tzet yetal maxto cancan bay templo tu', c'al bay despacho eb reyal Judá, yetokc'al bay Jerusalén.

²²Ayin wal caw Jehová in chi wala', tol ok ilaytok bay Babilonia, a bay tu' ok canc'al canok, masantac'al yet ayin ok ex witek junelxa bay e conob ti', quin chi, ẍi Cham.