Read Q'anjob'al Jer 28 Bible Online

Jer 28 - Q'anjob'al bible

Jer 28

¹A yet oyebxa xajaw yet jun abil tu', chi yal elapnok a ton yet is can abil yoc Sedequías yin reyal bay Judá, a Hananías c'ajol Azur, aj Gabaón, jun chi yaloc ba chekbejok Dios, max toj bay templo bay ayic' cham Jeremías; satak eb sacerdote c'al satak eb conob, max yala':

²—A Jehová Cham Yajaw yin Masanil, co Diosal ayon Israel on ti', chi yal axca ti': Ok in mak' k'aj jun yugo yet reyal Babilonia.

³A wal yet cab abil nani', cax ok wion meltzoj masanil mitx'k'abej yet templo ibiltok yuj Nabucodonosor bay Babilonia.

⁴Ayin wal caw Jehová in chi wala', tol ok wak' meltzoj Jeconías, c'ajol Joacim reyal Judá, yetokc'al masanil eb anima max toj yin presoal bay Babilonia tu'. Yowalil ok wican el yikbej reyal Babilonia e yiban, ẍi Cham, ẍi Hananías.

⁵Axa tak'wi Jeremías is chekbej Dios bay Hananías satak eb sacerdote, c'al satak masanil conob ayic' bay templo. Max yalon axca ti':

⁶—¡Ja toni! ¡Matawal chi yun Jehová axca tu'! ¡Matawal chi yun Cham axca wal juntzan k'anej chal tu', tol chi meltzojtek masanil mitx'k'abej yet templo ibiltok bay Babilonia, yetokc'al masanil eb anima max ilay c'apaxtok!

⁷Palta ab wal juntzan chi wal ayach ti', c'al bay eb conob ti'.

⁸A juntzan chekbej Dios max ec' yet payxa, yet c'amto chon alji etok, max yalil eb tol ok jay owal, yatakilal, c'al ilya' yiban juntzan nacionlak tol mimek yayji oc is yipalil.

⁹Palta a junok chekbej chi alon pax elok, tol ok aj can watx'ilal bay nacionlak tu', masantac'al ok yunej, catatu' ok txecloj elok tol a wal caw Jehová max chekoni, ẍi Jeremías.

¹⁰Axa yion el Hananías jun yugo ayoc yin nuk' Jeremías tu', max mak'on k'ajok.

¹¹Satak wal eb conob max yal axca ti': —Chi yal Jehová axca ti': Yet wal cab abil tinani', cax ok wion el yugo ayoc yiban nacionlak, tol a ton Nabucodonosor max aon ocok, palta ayin ok in mak' k'ajok, ẍi Cham, ẍi Hananías. Axa toj Jeremías tu'.

¹²A yet max eq'uel jun tiempoal yet mayal mak' k'aj Hananías jun yugo max yiel yin nuk' Jeremías tu', max k'anjab Jehová bay Jeremías. Max yaloni:

¹³Asi' bay Hananías, cax chaloni tol ayin Jehová in chi wala': Max je' a mak'on k'aj te yugo; palta axa junok yugo tol hierro, ok wak' is q'uexelok te te' tu'.

¹⁴Palta ayin Jehová, Yajaw in yin Masanil, Diosal in c'apax Israel chi wala': Max wawal oc jun yugo tol hierro yiban juntzan conob ti' yet chi oc yin mosejal bay Nabucodonosor reyal Babilonia. Toltax no xolakilteal no' max wacan oc no' yalan yikbej jun rey tu', ẍi Jehová, cachi, ẍi Cham.

¹⁵Lajwi tu xin, max yalon Jeremías bay Hananías axca ti': —Hananías, ab wal tzet ok wala': Ach ti', manak Jehová max ach chekontek. Caw wal man yelok tzet yetal lanan aon oc yipok c'ul eb conob ti'.

¹⁶Yuj tu' xan chi yal Jehová axca ti': Ok ach wielok yet chach c'ayaj bay sat tx'otx' tx'otx' ti'. A yet jun abil ti' ok ach camok. Yuj a k'anej xan max yikejtok jun conob ti' pitnen ba ayin, ẍi Jehová, ẍi Jeremías.

¹⁷Xan a yet is suk xajaw yet jun abil tu' max cam Hananías.