Read Q'anjob'al Jer 3 Bible Online

Jer 3 - Q'anjob'al bible

Jer 3

¹Chi yal Jehová axca ti': Ta ay junok winak chi pojlej ba yetok yistzil, cax chi yion ix junokxa winak, tatol chi pojlej pax ba ix yetok nak tu', a nak max yi' ix yet babelal tu' c'amxa chi yilej ba nak yetok ix junelxa. Ta chi yilej ba eb junelxa, a yuj tu' caw wal chi etaxtok tx'otx' tx'otx' yul in sat. Palta ayin Jehová in chi wala' tol caytu' max yut ba conob Israel, max in is bekcanok, max toj yintak comon dios camc'ulnebil yuj; axa tinani', chi yochej c'ul chi meltzojpaxtek ayin junelxa.

²Ajanektok t'anan bay tzalanlak cax che yiloni, ¿tok ayto junokxa tzalan mayayi tu' bay c'am chex mulji? Chex ay chotan bay tilak be e makon jay eb chi mulji e yetok, axca chi yun makon eb árabe yec' eb ec'jabwom bay tz'inan tx'otx'. Max e yetnejtok jun tx'otx' ti' yuj e yajmulal yelxac'al yob.

³Yuj wal tu' xan c'amxa nab yin is tiempoal. Axca wal ajmul ix wal yili e sat, c'am jabok chi cakbi e sat yuj q'uixwilal.

⁴Toltoc'al ti' max e yal ayin axca ti': Ach co mam, tol watx' ak'on jetok yintax junin animail,

⁵¿tom ayc'altek owal jin? ¿Tom ayc'altek yowal a c'ul jin? quex chi. Yak'ban lanan e yalon axca tu', lananc'al e beybalnen jantak ajmulal tol chi je' e yuj e yuneni, ẍi Jehová bay conob Israel.

⁶A yul tiempoal cham rey Josías max yal Jehová ayin axca ti': ¿Max mi el wal tzet max yun eb et conob Israel, tol max yut wal ba eb axca junok ix ajmul ix, tol max toj wal eb yin yaon oc ba yin ajmulal bay tzalanlak, c'al bay yichlak te te' xiwil yenel xak?

⁷Ayin ti' max in nac'alta'a, tol a yet mayal yunc'al axca tu', cax ok meltzojpaxtek ayin, palta maj meltzojpaxtek. A conob Judá, tol tenomtak, max yil tzet chi yun conob Israel tol ayto yuj ba yetok.

⁸Max yilon conob Judá tol max wuktej el conob Israel tu', max in pojlej in ba yetok, yuj ton wal is yajmulal tu'. Palta a conob Judá caw wal c'am jabok is xiwc'ulal, a c'apax jun max toj yin ajmulal.

⁹Yujtol c'am yelapnok ajmulal tu' yul sat conob Israel, max yetnentok tx'otx' tx'otx' yin yaon oc mul, c'al yoc yin ayilal bay ch'en ch'en c'al bay te te'.

¹⁰Caxc'al max yil Judá juntzan ti', tokwal max meltzojtek ayin yin masanil is c'ul, palta toc'al max tz'ak meltzojtek ba ayin, ẍi Jehová.

¹¹Xan max yal Cham ayin axca ti': A conob Israel tol tenomtak, txennej wal is mul yintak conob Judá tol etnewom.

¹²Ach Jeremías, asi' chi toj alcan el jun k'anej ti' bay eb et israelal. A tu' chach toj t'anan bay yetc'ulal norte cax chaloni: A wal caw Jehová chi alon axca ti': Meltzojantek ayin, ex israel tenomtak ex. Man yinok owal ok ex wut in chaoni, man ok ayjokc'al ec' yowal in c'ul e yin yujtol caw wal ay in camc'ulal.

¹³Asan tol ojtaknejek el e yobtakilal, tol yelxac'al tenomtak max e yut e ba ayin Jehová e Diosal in ti'. Ayin wal caw Jehová in chi wala', tol toxac'al max ex toj lemnaj e sayon ec' juntzan tx'ok diosal bay yalanlak te te' xiwil pimal xak. Caw wal maj e yikej in chekbanil, ẍi Jehová, cachi, ẍi Cham.

¹⁴A wal caw Jehová chi aloni: Ex anima tenomtak, meltzojanektek ayin e Yajawil in ti'. Junjun ex ok ex witek bay junjun conob. Catakwan ok yun wiontek yin junjun makan inatilej. Caytu' ok yun ex wak'on meltzoj bay Sión.

¹⁵Ok waoc eb e yilomal axca wal chi cha' in c'ul; axa eb ok yajawbok e yiban yin jelanilal c'al yin bayc'al ijanilal.

¹⁶Ayin wal caw Jehová in chi wala', tol a yet mayal aj can e bisil bay conob tu', tok okto e yak' binajtek te caẍail in trato. Tok okto e natek, tamwal okto tit yul e c'ul. C'amxa tzet ok e na' yin te', tamwal ok e watx'nej junokxa ac'.

¹⁷A Jerusalén ok yikcan aj tol in trono. Masanil nacionlak ok wajbaj ba bay tu' yin yoc yin ayilal ayin. Majxa yak' ba eb yikbelaytok yuj is yob nabalil.

¹⁸A wal yet ok apnok oc jun c'ual tu', junxanej ok yut ba conob Judá yetok conob Israel. Junxanej ok yun e meltzojtek bay jun conob bay norte, axa e jaycan oc bay tx'otx' tx'otx' max wak' sataknej eb e yichmam.

¹⁹Ex aj conob Israel, max in nabalnej el ex in chaon axca wal wuninal, cax chi wak'on jun tx'otx' caw wal ochebil ayex. Asannej oc jun tx'otx' tu' caw wal watx' yili bay yulyibank'inal ti'. Max in na' tol ok in e yaloc e mamok yin junelnej, tol manxa ok ex el in c'atan waloni.

²⁰Palta ayin wal caw Jehová in chi wala', tol lajan max e yut e ba axca junok ix ix yelxac'al yob bay yichamil, axca wal tu' che yut e ba ayin.

²¹Chi ablay yoc nuk'ej bay tzalanlak tol mayayi: a ton eb israel chi oc nuk' yok'i chi k'an eb colwal. Max elcan eb bay yul beal tojolal. Max in toj c'ayc'ulal yuj eb, ayin Jehová in is Diosal eb ti'.

²²Meltzojanektek ayin xin, ex anima tol tenomtak, ok in q'uex e nabal tenomtak tu', ẍi Cham. Max tak'wi eb israel axca ti': Tix on ti'. Ti' chi jaoc co ba yul a k'ab, yujtol ach ti' Jehová co Diosal ach.

²³Tok ay yopiso yuj chon toj bay tzalanlak yin co chaon k'in bay comon dios. Asan wal en, ach Jehová co Diosal, chi ilchaj co colbanil on.

²⁴Yettaxc'al unin onto, a ayilal bay juntzan yechelej ak'om q'uixwil tu' max ak'on lajwok tzet max yi' eb jichmam on, a ton no calnel c'al no wacax, eb c'ajolej c'al eb cutz'inej.

²⁵Ocokonek yin yaynakilal yuj q'uixwilal, yujtol ayon ti', yetok eb jichmam, caw wal yobtakwom onc'al bay Jehová co Diosal. Yettaxc'al unin onto, caw wal c'am on chi jikej bay Cham, ẍi eb.