Read Q'anjob'al Jer 31 Bible Online

Jer 31 - Q'anjob'al bible

Jer 31

¹A wal caw Jehová chi alon axca ti': A wal yet yajtok tu', ayin ton wal is Diosal in masanil makquiltakil Israel, cax acaw in conob ok yunej, ẍi Cham.

²Chi yal Jehová axca ti': A eb anima max elcan yul k'ab camich, max cha eb in watx'c'ulal bay tz'inan tx'otx', yet lanan sayon eb bay max xewi, ẍi Cham.

³Najattac'al max tx'oxaj ba Jehová ayon, cax max yaloni: Ex Israel, max ex in camc'ulnej yettax yichbanil, c'al yin tojbalk'inal, yuj tu' xan ayc'al oc in camc'ulal e yin.

⁴Ok ex in ca watx'nej ajok. Ok ex canalwok yuj tzalojc'ulal junelxa, ibil oc e pandereta e yuj.

⁵Cax ok e yawon e yuva junelxa bay tzalanlak yul yet Samaria. A mac ok yaw is yuva ok yak' tzalojbok c'ul yetok sat an.

⁶Yujtol ok ajapnok jun c'ual tol a eb makwajwom bay siquilal tx'otx' yul makbej Efraín ok el yaw eb axca ti': Sebaxek, tonek bay Sión bay Jehová co Diosal, ẍi mi eb, ẍi Cham.

⁷Chi yalon Jehová axca ti': Bitnanek yin tzalojc'ulal yuj is conob Jacob, a ton jun miman yelapnok yintak masanil nacionlak. Ablayokab e bit, cax che yalon axca ti': Ach Jehová, col a conob, a ton wal jantakto eb israel chito cani, quex chi.

⁸Ok wi meltzojtek eb bay jun nación bay norte; ok in wajbajtek eb bay lajubal yulyibank'inal. A xol eb tu' ok jayoc eb c'am chi je' yilwi, c'al eb chi ay beyi, eb xal yob ix, c'al eb xal tolto chi watx'ji c'ul; jun wal miman bulan ok meltzojtek cayti'.

⁹Lanan txajli eb, c'al yok' eb yet ok jay eb. Cax ok wiontek eb bay a' aej chi el yakan, yul jun be caw wal ac'al, c'amxa bay ok telc'oj eb. Yujtol mamej wayji bay conob Israel; axa conob Efraín xin, in babel c'ajol yayji ocok, ẍi Cham.

¹⁰Chi yal Jehová axca ti': Ex nacionlak, abek wal in k'anej; alek el bay najat bay is tilakil a' mar axca ti': A Jehová tol max uchon saklem eb israel, ac'al oc chi wajban pax oc tinani'; cax chi taynen axca wal chi yun taynelay no calnel yuj is yilomal, quex chi.

¹¹Yujtol ok in colcan el conobal Jacob, ok in colon eltek bay yul is k'ab jun nación ay wal yip.

¹²Ok jay eb, cax ok bitnen eb bit bay tzalan yet Sión; ok yak' tzalojbok eb c'ul yuj jantak in watx'c'ulalil, a ton trigo, vino, aceite, no calnel, c'al no wacax ok wak' bay eb. Lajanxac'al ok yun eb axca wal junok awoj tol ayc'al oc yal; manxa ok pax yip eb junelxa.

¹³Ok canalwok eb ix k'opoj yuj tzalojc'ulal; ok tzalojbok c'apax eb ach'ej, c'al eb icham winak. Ayin ok wak' mimanil is c'ul eb. Ayin wal caw Jehová in chi wala', tol ok meltzoj oc is cusc'ulal eb yin tzalojc'ulal; yelxac'al miman is tzalojc'ulal eb ok wak'a', yintak yailal max yil eb.

¹⁴A wal loj watx' ok wak' lo eb sacerdote, axa in conob ok yak' tzalojbok c'ul yetok masanil tzet chi wak' bay, ẍi Cham.

¹⁵Chi yalon Jehová axca ti': Chi ablay yoc aw bay conob Ramá, ay mac chi ok' yuj mimek yailal. A Raquel chi ok' yuj eb is yune'. C'amxa chi yochej chi mimanc'ulnelayi yujtol c'amxa eb.

¹⁶Ach Raquel, manchakxa ach ok' miman, manchakxa el yal a sat yujtol ayin wal caw Jehová in chi wala', tol a tzet max on yuj is watx'ilok eb one' tu', ok a cha paktzil. A eb one' ok el eb bay is tx'otx'al eb ajc'ul, cax ok jaycan eb cayti'.

¹⁷Ayin wal caw Jehová in chi wala', tol chi je' aon oc yipok a c'ul yuj tzet ok uj yet yajtok tu': A eb one', ok meltzoj eb bay is conobal.

¹⁸Max wab k'akwi conob Efraín yuj cusc'ulal, chi yalon axca ti': Max on a cuyu' axca chi yun cuylay junok no wacax man yojtakok chi mulnaji, xan mayal on cuychaji. I on meltzoj etok, bekan co c'ul co meltzoji, yujtol ach Jehová co Diosal ach.

¹⁹Max jiel co ba ayach, palta max na ba co c'ul tinani'. A yet max nachaj el co yobtakil juj, toxac'al max con ay nojan yuj q'uixwilal; yaynakilxac'al chi jut co ba, yuj jantak co mul max oc yettax yichbanil, ẍi conob Efraín ayin.

²⁰Ayin wal caw Jehová in chi wala', tol a jun conob Efraín ti', axca wal in c'ajol camc'ulnebil yayji ocok; yelxac'al ochebil jun ti' wuj. Caxc'al chi wak' cuenta, palta c'am chin bek in naoni; ya'c'al chi yab wanimail, yuj caw wal ay in mimanc'ulalil yin chi wabej.

²¹Ex aj Israel, chi cam e naon tzet beal bay chi ca e toji, ac'ala' bay yul jun be tu' chex meltzojtek junelxa yet chex jay pax oc bay juntzan conob max e bekcan ti'.

²²¿Bak'in ok e bekc'al e yec'jabtok axca junok ix ix tol tenomtak? Ayin Jehová in ok wak' uj junok tzet yetal c'am bay chi uj bay yulyibank'inal ti'; a ix ix ok tx'emtx'on oc yin nak winak, ẍi Cham.

²³A Jehová Cham Yajaw yin Masanil, Cham co Diosal ayon Israel on ti', a' chi alon axca ti': A yet ok wionpaxtek eb israel ti' bayc'alta' cajan, ok yalon eb bay conoblak yul yet Judá junelxa: ¡Yak'okab Jehová yaxilal yiban jun tzalan sic'bil el yuj bay chi beybalnelay tojolal! ẍi eb.

²⁴Junejxac'al ok cajay eb anima yul conoblak yul yet Judá; a eb mulnajwom yin awoj, c'al eb ilom calnel ok cajay ec' bay tu'.

²⁵Ayin ok wak' sicbok c'ul eb c'unbinak, ok wak'on low eb lananxa pax yip yuj wajil, ẍi Jehová.

²⁶Lajwi wilon juntzan ti' max el lenaj in wayan; max in ec' t'ananok. Caw wal watx' max yun in way max wabej.

²⁷A wal caw Jehová chi alon axca ti': Ok apnok wal c'ual, ok wion aj can bisil eb anima c'al no no' bay yul yet Israel c'al bay Judá.

²⁸Ayin wal caw Jehová in chi wala', tol axca max yun wak'on wip wocon ajok, c'al wuchon ayok, c'al wak'on lajwok, c'al in c'ayon elok, c'al wetnentok, ac'ala' axca tu' ok yun wak'on c'apax wip in tz'unon ayok, c'al in watx'nen pax ajok.

²⁹A yet tu', man ok yal eb: A eb mamej max lo eb paj uva, axa eb uninalej, jululixac'al toj pajil yichlak ye eb, man ẍiok eb.

³⁰Yujtol junjunc'al ok cam yuj is mul. A mac ok loon paj uva, a' ok aben pajil, ẍi Cham.

³¹Axca wal ti' yalon Jehová: Ok ajapnok jun c'ual, cax ok in watx'nej junok yet is cab trato yetok eb yinatil Israel c'al yetok eb yinatil Judá.

³²A jun trato tu', man lajanok yetok jun max in watx'nej yetok yichmam eb yet max wion eltek eb bay Egipto; axca tol ocnak in quetzan yin k'ab eb max wion eltek eb. Ayin wal caw Jehová in chi wala', tol a eb tu' maj yikej eb in trato max in watx'nej yetok eb, caxc'al axca tol wetbi max wut eb.

³³Tix ok wut in trato yetok eb yinatil Israel yet yajtok tu': Ayin wal caw Jehová in chi wala', tol ok waoc juntzan in chekbanil yin is nabal eb, axca tol ok in tz'ibejcan oc yin yanimail eb, ayin ok in oc is Diosalok eb, axa eb ok occan in conobok.

³⁴C'amxa junok ok yal bay yet conob: Ojtaknej el Jehová, man ẍiok; yujtol ayin wal caw Jehová in chi wala', tol masanil eb ok in ojtaknen elok, caxc'al unin, caxc'al icham anima. Ok wak' tancan is mul eb, cax c'amxa bak'in ok in natek is yobtakil eb, ẍi Cham.

³⁵A Jehová, Cham max aon oc c'u yet chon is tzektanej yet c'ualil, axa xajaw c'al waycan, yet chon tzektanen yet ak'balil, a ton Cham chi ak'on bilaj a' mar, cax chi aj a' can, a ton Jehová, Cham Yajaw yin Masanil chi alon axca ti':

³⁶Ayin wal caw Jehová in chi wala': Yak'ban c'amto chi c'ayil juntzan tzektebal tu', man ok c'ayil Israel yin nacional in satak.

³⁷Ayin caw Jehová in chi wala': Tok ay bak'in ok echelay satcan, cax ok ojtaknelay el tzetbil yayji yich tx'otx' tx'otx' ti', tamwal ay bak'in ok wintaknej el eb yinatil Israel yuj tzet max yun eb, ẍi Cham.

³⁸A wal caw Jehová chi alon axca ti': Ok apnok oc jun c'ual, tol ok watx'jok aj in conob junelxa, cax chi tojtac'al bay torre Hananeel, cax ok apnok bay jun puerta ay bay jun txiquin.

³⁹T'inanc'al toj mojonail masantac'al bay tzalanil yet Gareb, cax chi coxlojtok bay yetc'ulaltok Goa.

⁴⁰Masanil bay jobeal bay chi mukay eb camnak, c'al bay chi k'oklay el tik'ak'il tan, c'al masanilc'al yiban a' aej chi yik Cedrón, masantac'al bay junxa txiquin bay ay puerta yet no chej, a bay yetc'ulal bay chi ajol c'u, wet ok yuncanok. A masanil juntzan ti', c'amxa yechel ok uchlayayok, tamwal yak'lay lajwok, ẍi Cham.